Agami Hoda ar Nanan
Hoda Paranar Bor
14
Hospanagan togo, aptar boran baari dhap gorsio, bes gorinei muni dogkie gori hoda hobar sawh. 2 Haron je nanan hodadi hoda hoi, the manjiore no hoi hintu the Itchiorore hoi. Haron huno jone tar hodagani no bujon tar aptabuodi oghur gubono hoda hoi hinottei. 3 Hintu je gorei tulibartei, uschoni tulidibartei ar shantona dibartei hoi the muni dogkie gori manjiore hoi. 4 Je nanan hodadi hoda hoi the nijore-nije gorei tule, hintu je muni dogkie gori hoda hoi the mondoli gorei tule. 5 Mor mone hoidie tumi begkune nanan hodadi hoda hobartei. Hintu sittun bes mor mone hoidie tumi muni dogkie gori hoda hobartei. Haron nanan hodadi hoda hoiebuoi judi mondoli gorei tulibartei ortho bhangi no de, sale muni dogkie gori hoda hoiebuoi tartun dangor.6 Bheilog, hintu ikkie judi tomar idu einei nanan hodadi hoda honggi, ar Itchiore phogodang gori die hoda darai, gyeno hoda darai, muni dogkie gori hoda hona darai ok sigkie hoda darai ok mui tomare no hole mui tomartei hi lab om? 7 Poran neie jinij, bashi ok bina ok thik gori no bajilie, ek jone bashi bazar nahi bela bazar hingori hobor pa jebo? 8 Thik sedogkie gori, begolo ro judi porak-porak no ole, honna judduo goribartei jugol obo? 9 Thik sedogkie gori, manjie sohoje bujon para hoda tomar ho poribo. A no ole, tumi hi hor hingori thara hobor pebak? Haron boierot tomar hoda hoi para obo. 10 Songsarot nanan doronor ro thei pare ar prottiek ror ortho age. 11 Ek jone judi morloi hoda hoi ar mui tar hodagan no bujilie, mui tartei bi-deji dogkie om ar the mortei bi-deji dogkie obo. 12 Ieno siendoi ekkui, ar tumi aptar borani dhap goro hinottei, mondoli gorei tulede aptar boranit alajhala obartei togo.
13 Senottei, ek jone judi nanan hodadi hoda hoi, ortho bhangi dibartei the bor magok. 14 Haron mui judi nanan hodadi bor magong, mor aptabuoi bor mage hintu mor bujonaganot phol no thai. 15 Senottei mui hi gorim? Aptadi ar mor bujonagandoio mui bor magim. Aptadi ar mor bujonagandoio mui gid geim. 16 Anole, tumi jokke aptaloi hujhi hoda hoba, barendi manus siot thele tumi Itchiorore hujhi hoda hole the tomar hodagan no buje hinottei, “Amen” hingori hobo? 17 Haron tumi daw gome hujhi hoda hor, hintu oinnio jon gorei no uttuon. 18 Mui mor Itchiorbuore hujhi hoda hong, haron tomar begkunottun bes mui nanan hodadi hoda hong. 19 Huno jone no buschie hoda mui nanan hodadi dos azar hoda hona darane manjiore sigeibartei mondolit paschan hoda mor monedi holeio gom obo.
20 Bheilog, guro dogkie no bhappo, bojong bhabonat guro dogkie oio, hintu gyenedi bujunor dogkie oio. 21 Niomanot legkie,
“Ei manuschunore mui oinnio hodadi ar oinnio manjiore uttaniloi holeio, thara mor hoda no sunibak,”
Probuie hor.
Hoda Ekkan Sinno
22 Senottei, nanan hodadi hoda honagan bischiasigunottei noi, aw-bischiasigunottei sien olode ekkan sinno. Hintu muni dogkie gori hoda honagan aw-bischiasi-gunottei noi, bischiasi-gunottei. 23 Judi goda mondolibuo ekkan jagat thubeile ar begkune nanan hodadi hoda hole, ar siot hobor no peie ok bah Aw-bischiasi ok ele, thara pagol hobakke noi ni? 24 Hintu ek jon Aw-bischiasi ok bah hobor no peie ok judi begkune muni dogkie gori hoda hode ele, tare begkune duj degei dibag ar porikkie goribak. 25 Sedogkie gori tar gubonio ontoran hulo jebo. Sebeden the nije bukpari porinei Itchior tobona gorinei hobakke je Itchiorbuo hamakkai tomar loge age.
26 Bheilog, senottei hi gora poribo? Jokke odosat tumi eksomare thubeile, prottiek jonor ekkuo baini gid thok ar sigkie ok, nanan hodadi hoda hona ok, Itchiore phogodang gorsie hoda ok, oinnio hoda ortho bhangi denagan thana dorkar. Gorei tulibartei begkani gorana osit. 27 Judi huno jone nanan hodadi hoda hon, di tin jone ok, tin jonottun bes no hodok. Gada bolla gori hodok ar ek jone ortho bhangi duok. 28 Hintu judi huno jon ortho bhangi die no thele, mondolit olor gori thana osit. The sube-sabe nijore ar Itchiorore hok. 29 Di tin jone muni dogkie gori hoda hode, oinniogune olor gori shagi sadok. 30 Itchiore judi huno ekkan phogodang hoda hai-hure bojsie manuschuore janei de, polim manuschuoi sub ona osit. 31 Haron ek jon ek jon gori tumi begkune muni dogkie gori hoda hoi paro hinottei begkune shigon para ar begkunore tumi uschoni tuli diparo para gorsio. 32 Munigune tharar aptaguno ugure domon gori paron. 33 Haron Itchiorbuo jagulugkie Itchior noi, hintu the olode shanti Itchior, ar sadhu manuschunor beg mondoli-gunot agede dogkie Itchior.
34 Mondoligunot miliegune sub gori thana osit ar tharar hobar ugum nei. Haron Niomane hoidie doge thara odino tole theinei sub gori thana. 35 Thara judi huno hitchu shigibar san ghorot tharar nijor negkuottun pujor gortok. Haron mondolit miliei hoda hona lajor hoda oi.
36 Itchioro hodagan tomartun nigillie ni na, nahi bana tomar idu ejchiede? 37 Je, the nije muni bah aptar manus mone gore, mui tomare legongotte sieni Probur ugum bili the gome-dalei bujok. 38 Hintu je aw-bujunor the aw-bujunor gori thok. 39 Bheilog, tumi muni dogkie gori hoda hobar dhap goro. Nanan hodadi hoda hobar badha no duo. 40 Begkani gome-dalei ar upojukto gori gorana dorkar.