Bhagottun Ugursie
Israel Manuschun
11
Salen mui hong, Itchiore tar manuschun phelei dilo ni na? Hamakkai noi. Haron muio daw ek jon Israel manus, Abrahamor bongso, Benjamin gojadtun. 2 akke dhori hobor paidie tar manuschun Itchiore phelei no de. Nahi, Sastroie muni Elijar sombonde hi hoie sien hobor no po de? The Itchiorloi Israel manuschuno biruddie edogkie gori abitti die, 3 “PROBU, thara tor munigun morei phellion, tor pallieng-ghorani bhangi phelei duon, ar bana mui bagi agongge. Ar more morei pheleibartei togadon.” 4 Hintu Itchiorbuottun hi uttor elo? Itchiore tare hoie, “Baal mokti Itchiorbuore adu pari salam no gorsie sat azar jon mortei mui sara di thoiong.” 5 Sedogkie oleio, doyeganor basoni darai ejosong ek dagire bhagottun ugurei thuo oie. 6 Ar sigun judi doyer darai oi, salen hamo darai noi. Anole doyegan doye no obo. Hintu hamo darai ole, doyer darai no obo. Anole, haman ham no obo.7 Salen hi? Israel manuschune togande sien thara no pan, hintu bhagottun ugursiegune sien peion, ar bagigunore han gori die oie. 8 Sastrot edogkie lega age,
“Itchiore tharare gyen neie apta die. Sogedi no degon para, hanedi edchie song no sunon para.”
9 Ar Davide hoie,
“Tharar tebilani idi ar unduro hijik ok. Ujuot hebar ghuttie ar hena ugureie ok.
10 Tharar sogkun no degon para andhar odog, ar tharar pidtani onsur gujong ok.”
Itchioro Polop Gorsie Dhela
11 Salen mui hong, Azar hebartei thara ujuot helak ni na? Hamakkai noi. Hintu thara pab gorsion hinottei tharare huttieri tuli dinei muktigan jene Be-jadtune pan para. 12 Ar tharar pab goranagan judi songsaro manjiortei lab oi, ar tharar phola phol no oinei Be-jadtunottei lab ole, thara hodog poripunno odak ar!
13 Oh Be-jadtun, mui tomare hongor: mui Be-jadtunottei ek jon apostol hinottei mor haman baini gorim. 14 Je huno prokare mui huttieri tuli dinei di mor jadottun hoiek jon mukti goribartei. 15 Haron Israelunore phelei dinei songsarloi judi milie-mili ole, tharare grohon goranagan hi obo, morattun jiei ude para obode noi ni? 16 Haron polim pholluo judi pobitro ole, goda dolabuo pobitro obo. Ar goragan judi pobitro ole, dhelagunio pobitro obak.
17 Ar hoiekkun dhela judi bhangi dinei, ar tumi jharbuo oliv gajchun, tharar loge tomare polop bani die oi, sebeden tumi tharar loge goragano bhag peie ar gajchuor ros bhag peie ola. 18 Senottei, dhelagunor biruddie bar no gorsio. Hintu tumi judi bar goro, monot rageio jei tumi goraganore no palor hintu goragane tomare palar. 19 Salen tumi hoi paro, “Dhelagun bhangi die oie jene siot more polop bani die oi.” 20 Thik age. Bischias no goron hinottei tharare bhangi phelei die oie ar tumi Bischiasor darai tigi ago. Phodani no gorsio, hintu doreo. 21 Haron Itchiore judi ajol dhelagun bad no dile, the tomareo bad no dibo.
22 Senottei, Itchioror goman ar pakka-pakkigan bhabi sawh. Je porsie tharattei hodin, hintu tomartei ole tumi judi tar gomanot eksottie thago tar goman tomartei thebo. Anole, the tomare habi phelei dibo. 23 Ar Israelunoreio judi bischias no gorsieganot eksottie no than, salen tharare polop bani die obo. Haron Itchiore aro tharare polop bani di pare. 24 Itchiore tomar jharbuo elade sien habi phelei dinei gom oliv gajchuot noi die sien polop gori die hinottei, Itchiore ajol dhelagun tharar nijor gajchunot polop bani no dibo ni na?
Beg Israel Manuschune
Mukti Pebak
25 Oh bheilog, ei oghur gubonanot tumi aw-gyen bili mui tomare mone no gorongor. Anole, tumi nije gyeni bili mone goriba. Be-jadtunor somoien no phuroi song Israel manuschunore dol ham gori die oie. 26 Senottei, Sastrot lega agede doge beg Israel manuschune mukti pebak:
“Uddhar goriebuo Zaion sohorottun ebo. The Jakobor manuschunor aw-dharmigkan dabei dibogi.
27 Haron ien olode mor thararloi protiggiagan ar, sokkene mui tharar pabpani dhoi phelei di dim.”
28 Gom hoboranottei thara tomar sottru, hintu bajiteiegunor sombonde Purbo-puruschununottei thara olakke Itchioro agojorun. 29 Haron Itchioro danan ar daganagan olode phirei no parsie. 30 Haron eksomoi tumi Itchior aw-mannio ela, hintu ikkie tumi tharar aw-mannioganottei tumi doyegan pela. 31 Thik sedogkie gori, tharaio ikkie aw-mannio elak jene, tomare die jeiede doyegano darai tharaio doyegan pan para. 32 Itchiore tharare begkunore aw-mannio bili mannie hinottei, the begkunor ugure tar doyegan ragei die.
33 Itchioror gyenan ar hobor panagan hodog shanggadik gobhin! Tar bijieran honna togei paribo ar tar podtan honna shub pebo? 34 Haron “Honna PROBUR monan hoi parsie? Honna tare bujei parsie?” 35 “Itchiore jene phirei de para honna tare akke die?” 36 Haron beg jinijchani tartun, tar darai ejchie ar beg jinijchani tartei. Mohimagan umore-umor tar ok. Amen.