Apostolunor Hāmāni
Jisure Sorgot Tuli Neja Olo
1
Oh Theophil, mui akke tortei legilung Jisu jieni gorsie ar sigkie die arambo gorsie sienir sombonde. 2 Tare tuli neja oiede dinno song sieni the gorsie. Pobitro Aptar darai the bei tulliede apostolunore ugum die. 3 Jisu hosto bhug gorana porendi, the siguno sidu dega dineigoi the jeda age bili tharare onek bujon para proman diegoi. The tharar sidu solis dinottun bes dega dineigoi Itchioro rejjior sombonde hoie.4 Thararloi ekkan Temmangot, the tharare ugum dede jei thara Jerusalem sohoran sari no jeinei, hintu Babe soittio dede sien barsei thebartei. Jisu holo, “Ien olode mui hoiongge soittiogan.” 5 Haron Johone hamakkai paniloi baptisma gori die, hintu tomare hoiek din porendi Pobitro Aptaloi baptisma gori die obo. 6 Sebeden thara eksomare einei tartun pujor gorilakki, “Probu, ei somoibuot tui Israelunore rejjiogan phirei anidibe ni na?” 7 Jisu tharare holo, “Babe Tar nijor odhiharot thoiede sieno somoibuo bah sei halluo tomar hobor pebar noi. 8 Hintu jokke Pobitro Apta tomar ugure ebo tumi hemoda peba, ar Jerusalem sohorot, goda Judea rejjiot, goda Samaria rejjiot ar pittimir jagai-jagai mor shakki oba.”
9 Sebeden ei hodagani Jisu honar porendi, thara sei thagke-thagke tare sorgot tuli neja olo, ar ekkan megsage tare andol goreie. 10 Jisu sorgot uderloidie lokke thara begkune ekrini sei thagke, dijon dhub-habor ursie gori tar somare thieie gori degilak. 11 Sei manuschune holak, “Oh Galili hulliegun, hittei thieinei sorgo hitte rini sei ago? Jei Jisu tomartun sorgot tuli neja olo, the sorgot jade tumi degilade dogkie gori aro ebo.”
Apostolune Mothiare
Bei tulilak
12 Sebeden Oliv moun honde siottun thara Jerusalem sohorot phiri elak. Sei mounnuo Jerusalemo hai, ek Jireni Dinor adana pod . 13 Jokke thara ghoro bidirie somilakkoi, thara uguro tolat gelak. Siot Pitor, Jakob, Johon, Andrio, Philip, Thoma, Bartholomai, Mothi, Alphaior puo Jakob, dej-bhokto Simon, ar Jakobor puo Juda dagi thedak. 14 Thara begkune ekmon oinei eksottie bor magkuon ar manjiortei bor magi duon. Hoiekkuo milie, ar Jisur mabuo Meri, ar tar bheiun tharar somare elak.
15 Siot begkune eksho huri jon. Sei lokke Pitoror sisjioguno moiddiettun thieinei holo, 16 “Bab-bheilog, Jisure dhoribartei nejeiede Judar sombonde Pobitro Aptai akke dhori Davidor darai hoiede ei Sastro hodagan ghodi jana dorkar. 17 Haron tare amar loge gonat bhora oie, ar the ei hamanot phagot sommie.” 18 Ete be-dhormi hamo bedondoi sebeden ekkan jaga hinnie. Siot the ugudo-jabada gori pori, moiddie phadi jei tar beg adorigano nigili jeie. 19 Jerusalem sohorot theiegune begkune sien hobor peion. Senottei, tharar hodadi sei jagagan Akeldama nang thoi duon. Sieno ortho olode, (Lor Mad.)
20 “Haron Baini Gido Boibuot lega age:
‘Tar thebar jagagan sara porok, ar huno jon siot no thagodok.’ Ar, ‘Tar podobigan oinnio jone lodok.’
21 “Senottei amar loge elakke sigunottun ek jon bei tulona dorkar. Jisu amarloi ejana-jana gorsiede beg somoiunot sibie amar somare theiebuo ona dorkar. 22 Johone baptisma gorsiede siottun dhori amattun Jisure tuli neja oiede dinno song, amar somare Jisu jiei uduonagano shakki diettun ek jon uo poribo.” 23 Sebeden thara dijon bei lolak. Dijonottun ek jon olode Joseb, jare Barsaba dagon ar tar hellie-nangan olode Justa. Aro ek jon olode Motthia. 24 Thara bor magode holak, “Oh Probu, tui begkuno monani hobor pas, ei dijonottun hare ei hamanot beg lobartei ar apostolo podobigan lobartei tui bei lole amare dega. 25 Juda sei hamano ar apostolo podobigano biruddie jeinei tar nijor jagaganot jeie.” 26 Sebeden thara ak seinei Motthiar nangan udilo. Ar tare egaro jon apostolo somare boreilak.