10
Oh bheilog, mor ontorane horte ar Itchiorottun mui bor magi duongge Israel manuschune mukti pan para. 2 Haron tharar sombonde mui shakki duongge jene, Itchiorottei tharar agoj thai hintu gyeno doge noi. 3 Haron thara Itchioro dharmigkan hobor no pan. Ar Itchioro dharmigkan no togeinei nijor dharmigkan goreibartei togan, ar Itchioro dharmigkanot gojei no duon. 4 Haron je bischias gore tartei Kristo olode Niomano thumanottei dharmigkan.5 Haron Mosi Niomano dharmigkano sombonde legkie: “Manjie thara goronde hamani darai bajibak.” 6 Hintu bischiaso dharmigkane edogkie gori hoie, “Ontorot tui no hos, ‘Honna sorgot udibogoi?’ (Ugurottun Kristore anibalottei.) 7 Bah, ‘Honna tolanei gattuot jebo?’ (Kristore morattun jeda gori anibalottei.)” 8 Hintu Sastroie hi hoi? “Hodagan tor hai agegi, tor han ar ontorot.” (Sien olode ami prosar goridie bischiaschano hodagan.) 9 Itchiore Jisure morattun jiei tullie bili judi tui tor ontorot bischias goros ar muendi tare Probu bili haam haas, tui mukti pebe. 10 Haron ontoredi bischias gorinei dharmigkan pan, ar muendi muktigan haam haan. 11 Haron Sastroie hoi, “Je tare bischias goribuo, the huno din laj no pebo.” 12 Haron Judai manjior ar Grik manjior sere hitchu judo nei. Haron ekkui Probure je dage sigunottei the alajhala. 13 Haron, “Je PROBUR nangan dage the mukti pebo.”
14 Jare bischias no goron, tare hingori dagibak? Jar sombonde no sunon, sibiere hingori bischias goribak? Ar prosar gorie sara hingori thara sunibak? 15 Di no padeile hingori thara prosar goribak? Sastrot lega age,
“Gom jinijor gom hobor ar gom hoborano shanti hodagan prosar goronde sigunor thengani hodog doul!”
16 Hintu beg bhage gom hoboran no manon. Haron muni Isaiai hoie, “Probu, honna amar hoda bischias goribuo?” 17 Senottei, sunilie bischiaschan eje ar sunonagan ejede Itchioro hodaganottun. 18 Hintu mui hongge, thara suinnion ni? Thara suinnion daw.
“Gom hoboran annionde manuschunor sobdobuo goda songsarot jeie. Ar tharar hodagan pittimir thumsong jeie.”
19 Hintu mui hongge,
“Israel manuschune hobor no pan ni na?” Polim Mosi edogkie gori hoie, “Jigun jad noi siguno darai mui tomar ugure pijhum gori di dim. Murukko jadtuor darai mui tomare rak tuli di dim.”
20 Sebeden muni Isaiae baari sahoj gori Itchioro hodagan edogkie gori hoie,
“More no togande sigune more sup peion, ar more pujor no goronde siguno sidu mui dega oionggoi.”
21 Hintu Israel manuschunore the hoie,
“Hoda no manonde ar ulluo manuschunore goda dinnuo mui ad babeie elung.”