Apta Darai Jibon
8
Senottei, je Jisu Kristor iot theinei heyet doge no solinei, Aptar doge sole tar huno duj nei. 2 Haron Jisu Kristo iot jibon dede Aptabuor Niomane morei pelaidie pabor niomanottun more halas gori die. 3 Haron heyeganot norom hinottei Niomane hitchu gori no pare hinottei, Itchiore tar nijor Puobuo pabir manjior heye dogkie gori di padeie. Pabottei the heyeganot pabpan duj die. 4 Aptadi no solinei, heyedi solidie manuschunottei gom Niomor Nioman purei dibartei tar Puo di padeie.5 Haron jigune heyet pokke solon, tharattun heyet jinij mone hoi. Hintu jara Aptadi solon, tharattun aptar jinij mone hoi. 6 Haron heyet monan olode moranagan hintu Aptar monan olode jibon ar shanti. 7 Heyet monan Itchioro sottru hinottei, Itchioro Nioman no mane ar gorio no pare. 8 Senottei, jigune heyet pokke agon thara Itchior hujhi gori no paron.
9 Hintu tumi heyet pokke noi, Aptar pokke, ar judi jodepode gori Itchioro Aptabuo tomar iot thai. Jar Kristo aptabuo nei, the tar manus noi. 10 Ar judi Kristo tomar iot thai, pabor nange heyegan morsie, hintu dharmigkanottei Aptabuo olode jibon. 11 Hintu Jisure morattun jiei tulliede sibier Aptabuo judi tomar iot thai, Kristore morattun jiei tulliede sibier Aptabuoio tomar morede heyeganore tar Aptabuor darai tomar iot thaidie sibiei jibon dibo.
12 Bheilog senottei, ami olongge Horoj heie, heyet doge thebartei heyeganor noi. 13 Haron tumi judi heyet doge thago tumi moriba. Hintu tumi judi Aptabuor darai heyeganor hamani morei pelo tumi bajiba.
14 Haron jedog jon Itchioro Aptabuoi nejai, sigun Itchioror puo-shaba. 15 Haron tumi aro banidajit poribar dhoranaganor aptabuo no po, hintu tumi palok aptabuo peio jiber darai ami hoi, “Oh Abba , Ba.” 16 Itchioro Aptabuoi amar aptabuoloi shakki dede jei ami olongge Itchioro puo-shaba. 17 Ami Itchioro puo-shaba hinottei, ami Itchioro odhiharo sompotti peiegun ar Kristor somare odhiharo sompotti peiegun olong. Ami judi tar somare hosto pei, tarloi eksomare oborugio obong.
Porendi Mohimagan
18 Haron mui mone gorongge amar ikkie hosto bhug goranagani amar iot jei mohimagan dega dibogi siendoi tulona goribar upojukto noi. 19 Itchiore sristi gorsiede songsarane Itchioro puogun sebartei asha gori barsei age. 20 Haron sristigan aw-gunorano tole banidajit thuo oie. Mone hoinei noi, hintu Itchiorbuor darai ashagan no pureibartei. 21 Haron sristigano poji jaidie banidajittun nije Itchioro puoguno oborugkan shadinanot gojei die obo.
22 Haron ami hobor pei jei, goda sristigane ikkie song guro obar ped pirie dogkie gori mojora-hojora har. 23 Bana sien noi, hintu amio jigun Aptar ak-phol, amio nije-nije ontorot dug peir. Ar amar heyegan uddhar obartei, palokkan asha gori barsei agi. 24 Haron ami ashaganot mukti peiei, hintu dega jaidie ashagan asha noi. Salen, dega jaidie ashagan hittei asha gori thana? 25 Hintu ami judi no degidie sien asha gori thei, ami sien ega hore dhorjio dori asha gori thebong.
26 Thik sedogkie gori, amar bolneieganit Aptabuoi amare bol de. Haron amar hi bor magana osit ami hobor no pei. Hintu Aptabuoi amattei bor-nijes phelei phelei bor magi di die jien hoi para no jai. 27 Je ontoran porikkie gore the hobor pai Aptabuoi hi sintie gore. Haron Itchioro ischie doge sadhu manuschunottei Aptabuoi bor magi dide.
Jidiegunottun Bes
28 Ami hobor pei Itchior hos pande sigunottei ar tar uddischuoi doge daga oiede sigunottei beg jinijchanie gomortei eksomare ham gore. 29 Haron jigunore the akke dhori hobor pai, sigunore honatto tar Puobuor subhi doge obartei akke dhori the thik gorsie jene the onek bheilogottun polim puobuo oi para. 30 Sei bara, jigunore the akke dhori thik gorsie sigunore the dakkie. Ar jigunore the dakkie sigunore the dharmig gonnie, ar jigunore dharmig gona oie sigunore oborug gorsie.
31 Salen, ami sienire hi hobong? Itchior judi amar pokke thai, honna amar biruddie obo? 32 Je tar nijor Puobuoio amattei bad no dinei, amattei die, tar logeo amare beg jinijchani hulomela gori a hittei no dibo? 33 Itchiore beiloiegunor biruddie hi duj ebo? Dharmig goniebuo nije Itchiorbuoi. 34 Honna duj badei dibo? Kristoi the nije morsiegi. Aro sei bara, tare jiei tullie, ar Itchioro denedi amatteio bor magi derloi. 35 Kristor hospana-ganottun honna amare pharok goreibo? Hostogane ni na, dugkane ni na, uttiesarane ni na, bhadorattane ni na, uttie langdagane ni na, bipodtane ni na, nahi horgogane? 36 Sastrot lega agede doge,
“Tortei goda dinnuo morilong. Morei pheleibar bera-shagolo dogkie amare gona olo.”
37 Hintu ienit begkanit amare hos peiede sibier darai ami jidiegunottun bes. 38 Haron mui shokto gori hobor pangge jei huno ekkane amare Itchioro meyeganottun pharok gori no paribo. Moranagane ok, jibonane ok, sorgo-dude ok, sason-gorie ok, hemoda-bolai ok, bortoman jinije ok bah bhobisot jinije ok. 39 Uguro jinije ok, nijo jinije ok, oinnio sristi gorsie jinije ok amar Probu Jisu Kristo iot Itchioro hospanaganottun amare pharok gori no paribo.