Jisure morei
Pheleibar Temmang
14
Rokkie Utchobpan ar moli agullie pidie Utchobpan bana di din bagi elo. Rajguru-thagurune ar dhormo niomor mastorune Jisure gubone dhorinei tare morei pheleibartei pod togadon. 2 Thara holak, “Utchobo lokkene tare no dhorsio. Adikkie manuschune jagulug tulibak.”3 Jisu Bethani adamot pharangi Simonor ghorot elo. The bhat poiot boinei ekkuo miliei alabaster sijirit gori shanggadik dami hati ador tel anilo. Sebeden miliebuoi sijiribuo bhangi telan Jisur siriebuot dali dilo. 4 Siot elakke manuschunottun hoiek jone rak udinei thara-thara huobula gorilak, “A hittei ei ador telan borbat phelelo? 5 Ei telan tin shot denariδ loinei bejido, Sebeden tengagunδ gorib-dugkiere di parilun.” Ar thara miliebuore shanggadik gubilak. 6 Hintu Jisu holo, “Tare bad duo! Tumi tare a hittei jagulugot pelor? The daw mortei gom ham gorsie. 7 Gorib manuschun daw tomar loge onsur agon. Tomar jokke mone hoi sokkene tumi tharare sahajjio gori paro. Hintu tumi more onsur peda noi. 8 The jittur gori pare gorilo. Mor heyegan garebartei the akke dhori einei tel guli dilogi. 9 Mui tomare soittio hodagan hongor, goda songsarot ei gom hoboran jidu prosar gortak sat, ei miliebuoi gorilode hamanio thara hoi pebak, ar sengori tare monot rageibak.” 10 Sebeden baro jon sisjiottun ek jon Juda Iskariode Jisure dhori dibartei rajguruthagurunor sidu gelo. 11 Tar hodagan suninei rajguruthagurune hujhi olak. Tare tengaδ dibartei thara soittio dilak. Senottei the Jisure dhori dibartei gom sujuk toga dorilo.
Probur Bellie Haanabuo
12 Moli agullie pidie utchobor polim dinnuot rokkie utchobor bera-shagolo shawh dali duonde sei dinnie Jisur sisjiogune tartun pujor gorilak, “Rokkie Utchobor haana hebartei ami hubot jeinei tortei jugol gori didonggoi tortun mone hoi?” 13 Sebeden Jisu di jon sisjio phadelo. The tharare holo, “Tumi sohoro bidirie jo. Ek jon morode hummoi pani bode tomare lagot pebo. Tar pune-pune jeio. 14 The jei ghoranot somaigoi, sei ghoro girojchuore hoio, ‘Guruthagure hoiede, “Mor sisjiogun somot Rokkie Utchobor haana hembe gorba gudhibuo hudu?” ’ 15 The tomare uguro tolat ekkuo jugol gorsie ar sajeie dangor gudhi dege dibo. Siot amattei jugol gorogoi.” 16 Sisjiogune Jisure phelei jei sohorot somilakkoi. Jisu tharare hoiede doge thara degkuondoi. Sebeden Rokkie Utchobor haanagan jugol gorilak.
17 Reid oinei Jisu tar baro jon sisjio somot sidu gelo. 18 Thara hadonde lokkene, Jisu holo, “Mui tomare soittio hodagan hongor: Tomartun ek jone more dhora bajei dibo. Sibiei mor loge har.” 19 Sebeden sisjiogunor baari monot dug uo dollio, ar ek jon ek jon gori Jisure hodon, “Sibie mui ni na?” Ar ek jon holo, “Sibie mui ni na?” 20 Jisu uttor dilo, “Sibie olode tomar baro jonottun ek jon. The mor loge pidiegan hodorabuot buror. 21 Munischioro Puobuor sombonde Sastrot lega agede doge ghodi jebo. Hintu Munischioro Puobuore dhora bajei dibode sibier ugure hobal puribo! The judi jormo no odogi, tartei gom olun.”
22 Thara hadonde lokkene, Jisu pidiegan loinei donniobad dinei hotta dilo. Sebeden pidiegan tar sisjiogunore dinei holo, “Loinei ho. Ien mor heyegan.” 23 Tar porendi Jisu golojchuo adot lolo. The donniobad dinei tharare dilo. Sebeden thara begkune golojchuottun helak. 24 Jisu tharare holo, “Ien olode mor nuo niomanor logan, jien onek manjiortei dali die oie. 25 Mui tomare soittio hodagan hongor: Ikkiettun dhori mui jedog din song Itchioror rejjiot nuo gori ien no haanggoi, sedog din song ei angguro roschan mui hedung noi ar.” 26 Sebeden thara ekkuo Itchioro baini gid ganar porendi, thara Oliv Mounnuot gelak.
Pitore Jisure Bharebode Agami Hodagan
27 Sebeden Jisu tharare holo, “Edchie reidot mortei tomar begkunor bischiaschan jhuri poribo. Haron Sastrot ien lega age,
‘Mui bera-shagol Soreiebuore mugureim, sebeden bera-shagolun settera obak.’
28 “Hintu more jiei tulonar porendi, mui tomartun akke-akke Galili dejot jeim.” 29 Sebeden, Pitore Jisure uttor dinei holo, “Tor harone begkunor bischiaschani jhuri porileio, mor bischiaschan hono din jhuri porido noi” 30 Jisu tare holo, “Mui tore soittio hodagan hongor: Edchie dinnuot, reidot radai di bar dag no harte, tui tin bar more bharebe.” 31 Hintu Pitore aro doromoro gori holo, “Judi tor loge mor mori ja porileio mui tore shobai no bharem.” Ar sei doge thara begkune holak.
Gethsemane Baganot Jisu
32 Jisu ar tar sisjiogune Gethsemane honde jaganot lungilakkoi. Jisu tar sisjiogunore holo, “Mui jedogkon song bor magongoi sedogkon song tumi iot thago.” 33 Pitorore, Jakobore ar Johonore tar loge nilo. Ar the monot duge shanggadik sintiet porilo. 34 Sebeden the tharare holo, “Mor aptabuo baari sintiet porinei, morana soman olo. Iot theinei shojage thago.”
35 The hottur durot janar porendi madit bukpari pori bor magilode je, judi sombob ole, ei dugor somoibuo tartun hadei jok. 36 Ar Jisu holo, “Oh Abba , Ba, tortei begkani sombob oi. Ei golojchuo mortun neja. Hintu mor ischie doge no oinei, tor ischie doge ok.” 37 Sebeden the phiri einei tharare ghum jadonde deginei, the Pitorore holo, “Simon, tui ghum jotte nahi? Ek ghontaio jagkie gori tui thei no parilede? 38 Tumi jagi thago ar bor mago adikkie lubbot poriba. Aptabuor jodepode mone hor hintu heyegane no der.”
39 Jisu aro ek bar jeinei hoiede doge-doge aro bor magilogoi. 40 The phiri einei thara aro ghum jadonde degilogi. Thara sogkun ghume mela no jadon hinottei, thara Jisure hi uttor dibag hoi no parilak. 41 Jisu tin bar phiri ejanar porendi tharare holo, “Tumi hi ejosong arame ghum jor nahi? Obo ebol. Somoibuo lungilogi. Sawh, Munischioro Puobuore dhorinei pabi manjior adot gojei die awr. 42 Uduo jei. Sawh, more dhoridiebuo lungiegi.”
Jisure Dhorilak
43 Ar the horte lokkene, sawh, Juda, baro jonottun ek jon sisjio adikkie gori siot lungilogi. Ek jhag manus horgo ar mugor dhorinei tar loge elak. Rajguruthagurune, dhormo niomor mastorune ar borjonnune tharare padeion. 44 Sei lokkene tare dhoridiebuo sigunore the ekkan sinno dinei holo, “Mui jare sumonggoi, the sibie sie. Tumi tare dhorsio ar gomedale nejeio.” 45 Juda Iskariode lungiegio Jisur hai einei tare holo, “Robbi! Robbi!” Sebeden the Jisure sumilo.
46 Sebeden manuschune Jisure dhorilak. 47 Ar Jisur hai thiei elakke sigunottun ek jone tar horgogan hueilo. The moharajguruthagurbuor banidajibuore beja urei sibier hanan habi phelei dilo. 48 Jisu tharare holo, “Mui daget ni na, tumi more dhoribartei horgoloi ar mugorloi ejchiode? 49 Din bagene mui tomar loge elungge lokkene mondiro sidu sigkie duong, hintu sokkene daw more no dhoro. Hintu Sastro hodaganor doge uo poribo.” 50 Sebeden beg sisjiogune tare phelei dhei gelak. 51 Ek jon gabur-morode tar uttie heyet ad-habor bereinei Jisur pije-pije jar. Gabhuschiegune tare dhorsion. 52 Hintu the uschie haboran pheleinei uttie-buttie thara siottun dhei gelo.
Jisu Sanhedrinuot Azil Ologoi
53 Sebeden Jisure moharajguru-thagurbuor ghorot nilak. Siot beg rajguruthagurun, borjonnun ar dhormo niomor mastorun thubeion. 54 Pitore durot gori Jisur pune-pune jeinei, moharajguru-thagurbuor ghoro udonot gelo. The siot mondiro polischuno somare boinei agun phuo dorilo. 55 Sei lokkene rajguruthagurune ar goda sanhedrinuor manus-chune Jisure mijie shakki dinei morei pheleibartei haidie togadon. Hintu thara huno ekkan shakki no pelak. 56 Onek manjie Jisur biruddie mijie shakki di selak. Hintu tharar ekkan shakkio no hadilo. 57 Sebeden hoiek jon manjie thieinei Jisur biruddie mijie shakki dilak. 58 Thara holak “The edogkie gori hode ami suinnei, ‘Ei adtoi tullie mondirbuo bhangi pheleim ar tin dine aro ekkuo adtoi no tullie mondir mui tulim.’ ” 59 Hintu tharar ekkan shakkio no hadilo. 60 Sebeden moharajguruthagurbuoi begkunor song moiddie thieinei Jisuttun pujor gorilo, “Tui ieni ekkanio uttor no dibe? Tor biruddie ei manuschune ieni hi shakki dedon?” 61 Hintu Jisu ekkanio uttor no dinei olor gori rolo. Moharajguruthagurbuoi tartun aro pujor gorilo, “Tui hi Kristo, baini goridie Itchioro Puobuo ni na?” 62 Jisu holo, “Oi mui. Ar Munischioro Puobuore Hemoda-bolabuor denedi bojsie gori agajot megsagot gori ette tumi degiba.” 63 Sebeden moharajgurutha-gurbuoi tar uschie haboran phadi pheleinei holo, “Oinnio jon shakki die amar a hittei lagette ar? 64 Itchiorore the sorjaidie ien tumi sunila daw. Tumi hi mone goro?” Thara begkune Jisur moronor sasti pebar lak bilinei thik gorilak. 65 Sebeden hoiek jon manjie tare sep phelei die dorilak. Ar thara Jisure sog bani dinei bugkei-bakkai holak, “Gona sadei!” Ar mondiro polischune tare ninei ni podas-podas suoreilak.
Pitore Jisure Bharelo
66 Pitore toledi udonot elode lokkene moharajguruthagurbuor ekkuo sagorsie gabur-milie tar sidu gelo. 67 The Pitorore agun phuode degilo ar tare gome-dalei seinei holo, “Tuio daw Nazareth hullie Jisu loge ele!”
68 Hintu bharenei Pitore holo, “Tui hi hole sien mui hoi no parongor ar noio bujongor.” Sebeden the girieganor duoro barendi nigiliegoio ekkuo radai dag harilo. 69 Sagorsie gabur-miliebuoi Pitorore aro deginei siot thiei agonde sigunore the huo dorilo, “Ei manuschuo olode tharar dolottun ek jon.” 70 Hintu Pitore aro bharelo. Ar hanekkon porendi tar hai thiei agonde sigune Pitorore aro holak, “Tor gajcharabuo loi hobor pai, tui ek jon Galili hullie senottei hamakkai tui tharar dolottun ek jon oi.” 71 Hintu Pitore tare the geil di ar the sobot heinei sigunore holo, “Tumi horte Manuschuore mui no sinong.” 72 Jogon-togon radai di bar dag harilak. Sebeden Pitore Jisu tare hoiede hodagan monot tullie, “Radai di bar dag no haribar age, tui more tin bar bharebe.” Ar Pitore sien monot udi gujhi-gujhi hanilo.