Jugor Sejo Sinnogani
13
Jisu mondiro jaganottun nigili jade, tar ek jon sisjioi tare holo, “Guruthagur, sah, hi asarjio doul pakka dalan!” 2 Sebeden Jisu tare uttor dilo, “Ei dangor-dangor ghorani tumi degor? Ek din ekkuo silo soga-sok gori thedo noi. Begkun lugimari phelei die obo.” 3 Sei porendi Jisu Oliv mounnuot mondiro mokkie gori bojilo. Sebeden Pitore, Jakobe, Johone ar Andrio dagi nibirot pujor gorilak, 4 “Homole sieni ghodi jebo, tui amare ho? Ar sieni ghodi jade hi-hi sinno thebo?”5 Jisu tharare uttor die dorilo, “Huno jone tomare thogei no paron para uijkare thagkuo. 6 Haron onek jone mor nange einei hobakki, ‘Mui deie the.’ Ar thara onek jonore thogeibakki. 7 Tumi jokke judduor hobor suniba ar manjie judduor hoda mue-mue gorte suniba, sidie no gorsio. Sieni eneio ghodi ja poribo, hintu sokkeneio thuman je no ebo. 8 Haron ek jade oinnio jador biruddie obak, ar ek rejjioi oinnio rejjior biruddie judduo goribak. Jagai-jagai bhujol bebo, ar bhadorad poribo ar gondogul obo. Ieni begkani olode dug-hosto arambogani.
9 “Tumi nije-nije uijkare thagkuo. Haron thara tomare sanhedrinot gojei dibagkoi. Synagogot tomare pidibag. Mortei tumi sason-goriegunor ar rajagunor mujungot tharare shakki dibartei thiei pebagoi. 10 Ar gom hoboran beg jador sidu akke prosar gora poribo. 11 Ar jokke tomare dhorinei gojei duondoi, sokkene tumi hi hobagoi sieni akke dhori sintie no gorsio. Jokke somoibuo ebo, jieni Pobitro Aptai tomare jobeide, sieni hoiogoi. Haron hoiebuo obode Pobitro Aptabuo. 12 Ar bheibuoi tar bheibuo morei pheleibartei dhora bajei dibo. Ar babpuoi tar puobuo morei pheleibartei dhora bajei dibo. Puogun tharar bab-ma biruddie oinei manjie tharare morei pelan para goribak. 13 Mor nanganottei beg manjie tomare hos no pebak, hintu je thumsong thori thei paribo, tare uddhar gora obo.
14 “Senottei muni Daniele hoi jeiede, ‘Itchiore bis degede nasgoriebuoi’ no thieibar jaganot thieibogi.” (Je ien madai, the buji lok.) “Jokke the siot thieibogi je sien degon, sokkene Judea dejot agonde sigune moununot dhei jadok. 15 Je salo ugure thebo, ghorot no lamokkoi ar tar ghoro bidiriettun hono poja nigilei anibartei the no somogkoi 16 Je hedot thebo, the tar haboran anibartei phiri no jok. 17 Hintu sokkene pedoli-miliegunor ar hujhi pormagunor hobal poribo! 18 Tumi dhei jei pebade dinnuo jarhallie no oi para bor mago.
19 Sei lokkene edogkie uttiesar obo. Itchiore songsar sristi gorsiede siottun dhori ejo song sedogkie no oi, ar tar porendio huno din odo noi ar. 20 Probu judi sei dinun homei no dido, sale, huno jon no bajilakkun. Hintu Itchiore bei tulliede sigunottei sei dinun the homei die. 21 Sei lokkene, huno jone judi tomare hon, ‘Sawh, iot Kristo age,’ bah, ‘Siot age,’ sien bischias no gorsio. 22 Haron Sokkene nogoli kristo ar nogoli muni bar oinei, manjiore thogeibartei, thara dangor dangor sinno ham ar amok ham degebakki. Sombob ole, Itchiore bei tulliegunoreio thogeibak. 23 Hintu tumi uijkare thagkuo. Mui tomare akke dhori begkani hoi dilung.
24 “Hintu sei lokkene, sei uttiesar dinun ghodi jebo io, belan andhar obo ar, junone jun phor no dibo. 25 Taragun agajottun jhuri poribakki. Agajor hemodagani digdigei die obo. 26 Sei lokkene Munischioror Puobuo dangor hemodagandoi ar oborugkandoi megot ette manjie degibak. 27 Sebeden the tar sorgo-dudtunore dipadebo ar tar bei tulliegunore sero hittetun dhori, pittimir begor durottun dhori sorgor begor durot song tubeibak.
28 “Ar dumur gajchuottun tulona hoda sigi lo. Jokke sigon dhelagunot hujhi dikh nigilinei pada phudo doribo, sale, gorom din ejer bili mone gorsio. 29 Ei sedogkie gori jokke ieni ghodi jade degiba, sokkene tumi buji paribade somoibuo hai ejchie, ar duorot agegi. 30 Mui tomare soittio hodagan hongor: Sieni begkani ghodi no gele, ei jugko lugi jedo noi. 31 Sorgo ar pittimigan lugi jebo, hintu mor hodagani huno din lugi jedo noi.
Dinnuo ar Somoibuo
Hobor no pan
32 “Hintu huno jone sei dinnuo ar somoibuo hobor no pan, sorgot sorgo-dudtuneio ar Puobuoio hobor no pai. Hintu bana Babe hobor pai. 33 Uijkare thagkuo! Sojag gori theinei bor mago. Sei somoibuo hokke ebo tumi hobor no po. 34 Ien ek jon manjie tar ghor-duor phelei bi-dejot jadte dogkie. Tar sagorsiegunore jon bagene ham dinei di tharare odhihar dilo. Ar duor subi theiebuore sojage thebartei ugum dilo.