12
Sebeden Jisu tharare tulona hodadi holo, “Ek jon manjie ekkan anggur bagan tulilo. The bagananor sero hitte tengera beri dilo. The angguro ros phereibartei ekkan ghani-hol bojeilo, ar subi dibartei tong ekkan banilo. The hoiek jon bagan suliere tar anggur baganan daw-bhagi denar porendi bi-dejot gelo. 2 Anggur sinibar okto oinei, the tar bhagkuo anibalottei tar sagorsie ek jon do-bhagi diede sigunor sidu phadelo. 3 Hintu sigune tare dhorinei dhori mari marai suduo adtoi phirei dilak. 4 Sebeden girojchuoi aro ek jon tar sagorsie do-bhagi dede sigunor sidu phadelo. Tare sil meladi, tar siriebuot gha gori duon. Ar tare thatta gori phirei dilak. 5 The aro ek jon sagorsie phadelo. Sibiereo thara morei phelei dilak. The aro bhaluk jon sagorsie phadelo. Thara ek dagire pidilak ar ek dagire morei pheleilak. 6 The padebartei bana tar ekkuo gori agojor puo, sibie bagi thelo. The mone gorilo, ‘Mor puobuore thara sorman goribak,’ sebeden bego jere tar puobuoreo phadelo. 7 Hintu do-bhagi loiegune thara-thara huobula gorton, ‘Ete daw porendi sompottir girojchuo obo. Jei, ami tare morei phelei. Sebeden ami ei bagananor giroj obong.’ 8 Sebeden thara tare dhorinei dhori baganor barendi phelei dinei morei pheleilak. 9 Sebeden baganor girojchuoi tharare hi goribogi sei? The einei do-bhagi dede sigunore morei phelei aro oinnio manjiore tar anggur baganan do-bhagi dibo. 10 Ien tumi Sastrot no mado ni na?‘Ghor-tulliegunor monot no porede silluo, hunot begottun gunor silluo olo.
11 Ien PROBUIE gori dilo, amar ien sade hodog shoba lage!’ ”
12 Haron thara buji parilakke Jisu ei tulona hodagan tharar biruddie hoie. Senottei thara Jisure dhoribartei seresta gorilak. Hintu thara manuschunore dorelak. Sebeden thara Jisure phelei jei siottun jeiondoi.
Hazana Dena Sombonde
13 Sebeden sigune hoiek jon Pharisi ar Herodor manus Jisure hodat phajeibartei Jisur idu padelak. 14 Thara einei Jisure holak, “Guruthagur, ami hobor pei, manjie gom bannie bhabi no sade tui soittio hodagan hoi duos. Tui begkunore eksong gorinei Itchioror soittio podtanor hodagan janei duos. Tui amare ho, Moharaja Kaisarore ami hajana di die sien niom oi ni noi? 15 Ami tare hajana didong na no didong?” Hintu Jisu tharar hu-sokra monani hobor peinei holo, “Tumi a hittei more phajeibar sor? More ekkuo denariδ aninei degogi.” 16 Thara ekkuo poijieδ ani dilak. Ar Jisu tharattun pujor gorilo, “Ibie har subhi? Ar har nang lega age?” Thara holak, “Kaisaror.” 17 Sebeden Jisu tharare uttor dilo, “Kaisaror jinijchani Kaisarore duo ar Itchioror jinijchani Itchiorore duo.” Ar thara Jisur hodagan suninei amok olak.
Morattun Jiei Uduonar Sombonde
18 Sebeden hoiek jon Sadduki, jiei uduonagan nei honde sigune Jisur idu einei tartun pujor gorinei holak: 19 “Guruthagur, Mosi amattei legi di jeie: Judi ek jon manjie mog loinei bongso no peie gori mori gele, tare bongso rokkie gori dibartei, sibier guro bheibuoi tar bhojchuore luo poribo. 20 Ek ghorbuot sat bhei elak. Bego dangor bheibuoi mog lo-lo. The bongso neie gori mori gelo. 21 Tar toledi guro bheibuoi tar bhojchuore loinei, theo bongso no peie gori mori gelo. Ar tin lombor guro bheibuoio sedogkie gori mori gelo. 22 Thara sat bheie ekkuo mog loinei bongso neie gori begkun mori gelak. Bego jere sei miliebuoio mori gelo. 23 Senottei, jiei uduonaganot jokkene thara jiei udibag sibie har mog obo? Haron thara sat bheie begkune tare mog ijebe loion.”
24 Jisu tharare uttor dinei holo, “Senottei tomar bhul oiede noi ni? Haron Sastrogan ar Itchioror hemodagano no bujo. 25 Haron jokke thara morattun jiei udibag, thara ar neg-mog thedak noi ar neg-mogo lodak noi. Hintu thara sorgo-dudtuno dogkie obak. 26 Morattun jiei uduona hodagan Mosir boibuot angie hero jaburbuo hodagan tumi no mado ni? Siot legkie agede, Itchiore Mosire hoie, ‘Mui Abrahamor Itchior, Isaakor Itchior, ar Jakobor Itchior.’ 27 Itchiorbuo daw moragunor Itchior noi, hintu The olode jedagunor Itchior. Senottei tumi mone gorotte ien shanggadik bhul.”
Begottun Dangor Uguman
28 Ek jon dhormo niomo mastor einei hai hurettun thara torga-torgi gortonde ieni suni agegi. Jisu Saddukigunore dolei gori uttor dede sien the hoi parinei, theo Jisuttun ekkan hoda pujor gorilo, “Ugumanir moiddie begottun dangor uguman hubon?” 29 Jisu tare uttor dilo, “Begottun dangor uguman olode ien, ‘Oh Israel manuschun tumi suno. PROBU amar Itchiorbuo olode ekkuo PROBU. 30 Tor PROBU Itchiorbuore tor goda ontorandoi, tor goda aptabuoloi, goda tor monandoi, ar tor goda bolandoi tui hos pei pebe.’ Ien olode begottun dangor uguman. 31 Di lombor dangor uguman olode ien, ‘Tore tui hos paschie dogkie tor paralliegunoreio hos pa poribo.’ Ei ugumani bade huno dangor ugum ar nei.” 32 Dhormo niomor mastorbuoi Jisure holo, “Guruthagur, oi daw, tui hoioschie ien soittio. Itchior olode ekkuo, the bade ar huno jon nei. 33 Itchiorbuore goda poranandoi, goda gyenandoi, goda ontorandoi ar goda bolandoi hos pa poribo. Nijere-nije hos pa jaidie dogkie, paralliegunoreio hos pa poribo. Ei dibie shilie dan ar dali denattun bes dangor.” 34 Jisu sei dhormo niomor mastorbuoi gyeni manjior dogkie gori uttor dede deginei tare holo, “Tui Itchioror rejjioganottun bes durot noi.” Siottun dhori Jisuttun huno ekkan pujor goribar huno jonor sedame no hulelo.
Messaia Har Puo?
35 Jisu mondirot sigkie dede, the pujor gorilo, “Dhormoniomor mastorune Kristo Davidor Puo bili hingori hon? 36 Haron Davide nije Pobitro Apta darai hoie,
‘PROBUIE, mor Probure hoie, “Tor sottrugun jedogkon song, tor thengot tole no thong, sedogkon song mor denedi boji thak.” ’
37 Davide nije tare ‘Probu’ hoie. Salen, the hingori tar Puo oi pare?” Shagor manjie Jisur hodagani hujhi oinei suni agon.
38 Tharare sigkie dede Jisu holo, “Dhormo niomor mastorunottun tumi uije thagkuo. Lamba shilum urinei bereibar tharattun mone hoi. Ath-bazarot manjiortun salam hebar tharattun mone hoi 39 Synagogot begottun moillioban bojibar jaga ar haana-meitbanot begottun gom jaga tharattun mone hoi. 40 Thara rani-milieguno ghorani hari lon. Barendi degebartei lamba-lamba gori bor magon. Thara shanggadik sasti pebak.”
Gorib Rani Miliebuor Danan
41 Ar Jisu dan goronde jaganor uju bojilo. Manuschune mondiror dan-baksubuot tengaδ bhorei dedon. 42 Sebeden ekkuo gorib rani-milie einei dibie pidolor poijieδ bhorei dilogi. Sei dibie pidolor poijie olakke ekkuo kodranorδ moillio. 43 Jisu tar sisjiogunore daginei tharare holo, “Mui tomare soittio hodagan hongor: Ei gorib rani-miliebuoi oinnio jonottun bes dan-baksubuot bhorei dilogi. 44 Oinnio jone daw beg tharar ugursie dhonottun duondi. Hintu ei gorib rani-miliebuoi tar goribpanottun tar poranan bajibartei rageiede sien begkan dan-baksubuot bhorei dilogi.”