Luke
Porisoi
1
Amar moiddie ghodi jeiede ghotonani sombonde legibartei balukjone seresta gorsion. Sieni olode jodepode ami bischias goridie ieni. 2 Jigune polliettun dhori degkuon ar hodaganor sagorsie elak, thara amare legi phelei dijeion. Senottei, thara jedogkie gori amare legi phelei dijeion, thik sedogkie gori mui legilung. 3 Oh moha mannio Theophil, polliettun dhori sieni begkani mui doledalei sigi loiong hinottei, muio bhabi selungge sieni tore mui gome-dalei legile gom obo. 4 Oinnio jone tore jei hodagani sigei duon, sieni hamakkai oi hinei tui puro gori hobor pebartei mui legilung.Johonor Jormor Agami Hoda
5 Judea dejor Herod raja amolot, Zekaria nange ek jon dhormo mastor elo. The olode Abija dolo manus. Zekaria mogkuo Elizabethi olode Aronor bongso. 6 Itchioro doge, thara duo jon dharmig. Huno ekkan duj di no parsie Probur beg shiliegun paleidak ar niomani manidak. 7 Elizabethi bhaj hinottei thara puo no pan. Ar ikkie thara duo jon buro oion. 8 Zekaria tar dolot Dhormo mastoro ijebe Itchioro samne ham gorte seiet, ien tar ghodilo. 9 Dhormo mastoro ijebe ham goribartei, the ak selo. Tar haman porilode Probur pobitro jaganot jeinei dhub-hadi anganagoi. 10 Ar the dhub-hadi angande somoi, beg manuschune Mondirbuo barendi bor magodon. 11 Sebeden Probur ekkuo sorgo-dud tar idu dega dinei dhub-hadi angande sienor denedi thiei agegi. 12 Zekaria sorgo-dudtuore deginei jagulug olo ar dorelo. 13 Sebeden sorgo-dudtuoi tare holo, “Tui no dores. Tor Itchiorbuoi tui bor magkuosie sien suinnie hinottei, tor mogkuoi Elizabethi tore ekkuo morod puo phudei dibo. Tare ‘Johon’ nang thoi dis. 14 Tor mon hujhi ar utchob obo. Ar jokke the jormo obo, sagor manjie hujhi obak. 15 Haron the Probur ijebe oborug obo. The tar gorbhot thagkettun dhori Itchiore tare Pobitro Aptabuottei dibo. Ar huno din angguro ros ar mod hedo noi. 16 The shagor Israel manus Probu, tharar Itchiorbuo idu phirei anibo. 17 Elija aptabuoloi ar hemodagandoi the Probur akke-akke jebo. ‘Babpunor monani tharar puoguno idu phirei dibo.’ Hoda no manonde manuschunore dharmig manuschune bhabonde dogkie bhabon para gori dibo. Probuttei jugol oie manus the banebo.” 18 Zekaria sorgo-dudtuottun pujor gorilo, “Hamakkai sien obo bili mui hingori hobor peim? mui buro oiong ar mor mogkuoio baari buro oie.” 19 Sorgo-dudtuoi uttor dilo, “Mui Gabriel. Mui Itchiorbuo mujungot thiei thang. Mui torloi hoda hobartei ar sei gom hoboran tore hobartei Itchiorbuoi more dipadeie. 20 Ar sunis, tui mor hodagan bischias no gorilie hinottei, ieni thara olode ghodi no jaisong ikkie bub obe ar hoda hoi no paribie.” 21 Manuschune Zekariare barsei agon. Mondirbuot edokkon song the diri gori age hinottei thara amok olak. 22 The nigili einei, the thararloi hoda hoi no parilo. Madi no parsie gori the thararloi ijiriedi hoda hor hinottei thara buji parilakke pobitro jaganot the azilie peie. 23 The tar dhormo haman phureinei, the ghorot gelo. 24 Sei porendi tar mogkuo Elizabethi pedoli olo. Pas mas song ghoro bidiriettun the no nigililo. 25 The holo, “Probuie ien mortei gori di die. Ingillie the tar doyegan degelo ar manuschuno moiddiettun The mor bodnaman tuli nilo.”
Jisur Jormor Agami hoda
26 Shoi majot, Itchiore sorgo-dud Gabrielore Galili dejor Nazareth adamot dipadelo. 27 The ekkuo shodi gabur-milie sidu gelo. Shodi gabur-miliebuo nangan olode Meri. Tare Josebpoi jodon bani duon. Josebe olode Davidor bongso. 28 Sorgo-dudtuoi tar sidu jeinei hologoi, “Monggol ok! Probuie tore hos peie. Probu tor loge age. Milier moiddie Probuie tore asirbad gorilo.” 29 Hintu Meri Gabrielore deginei, tar hodagandoi the jagulug olo. Ar tare the pujor gorer: Sei salamano orthogan hi? 30 Hintu sorgo-dudtuoi tare holo, “Meri, tui no dores. Haron Itchiorottun hospanagan tui peios. 31 Sunis, tui pedoli obe ar ekkuo morod puo phudebe, ar tare “Jisu” nang thoi dis. 32 The oborug manus obo ar tare Begottun Dangor Itchiorbuor Puo hobak. Ar Probu Itchiore tar Purbo-puruschun Davidor singasonan tare dibo. 33 The Jakobo ghorbuoguno ugure umore-umor sason-goribuo. Tar rejjiogan huno din thum odo noi.”
34 Meri sorgo-dudtuore holo, “Mui olungge shodi gabur-milie, mor hono morodtoi ai pai nei sien hingori obo?” 35 Sorgo-dudtuoi uttor dilo “Pobitro Apta tor ugure ebo, ar Begottun Dangor Itchiorbuor hemodagane tar shababuoloi tore dagibogi. Senottei, tui phudebede pobitro gurobuore Itchioror Puo hobak. 36 Sunis, tor sodorsie Elizabethio buro-hale pedoli oie. Manjie tare bhaj milie hon, hintu the pedoli oiede shoi mas olo. 37 Itchiore no pare para hitchu nei.” 38 Meri holo, “Shah, mui olungge Probur banidaji. Tui holede doge mor ok.” Sebeden sorgo-dudtuo tar siottun gelogoi.
Meri Elizabethi
Sidu Bera Gelo
39 Sei lokke Meri jhadi gori udi Judea dejot ekkan muro adamot gelo. 40 Zekaria ghoro bidirie somilogoi ar Elizabethire salam gorilo. 41 Elizabethi Meri robuo suninei, tar pedo bidirie puobuo sattei udilo. Ar Elizabethi Pobitro Aptaloi boron olo. 42 Birat ro gori the holo, “Milier moiddie Itchiore tore asirbad gorsie. Tor pedo bidirie puobuoreo Itchiore asirbad gorsie. 43 Hintu a hittei tui mor Probur mabuo more hobor dhora elede? 44 Shadei, tui more salam gorsioschie robuo mui suinniongoi, mor pedo bidirie puobuo hujhie sattei uttie. 45 Bischias gorsios hinottei tui hoballie. Haron Probuie tore hoiede sieni purei dibo.”
Meri Probure
Gidodi Baini Gorilo
46 Meri holo,
“Mor ontorane Probure shanggadik baini gore.
47 Ar mor aptabuoi, mor mukti gorie Itchiorbuo iot baari hujhi oie.
48 Haron, mui, tar niroit banidajibuore the selo hinottei mor aptabuo hujhi oi. Sunis, ikkiettun dhori juge-juge manjie more Itchioro asirbad peiebuo hobak.
49 Haron Hemoda-bolabuoi mortei dangor ham gori die ar tar nangan olode pobitro.
50 Ar jigune tare bhokti goron, juge-juge tharare the doye gore.
51 Tar adtandoi bolimondo ham gorsie. Jigunor ontorot phodani age sigunore the settera gorsie.
52 Hemoda-bola manuschunore the tharar singasonanittun lameie. Hintu The niroit manuschunote ojolot tullie.
53 Ped pora hande manuschunore the gom jinij ped borei die. Hintu thagoie manuschunore the suduo adtoi dipadeie.
54 Tartun doyegan monot thai hinottei, the tar nijor sagorsie Israelore sahajjio gorsie.
55 The amar purbo puruschundoi soittio gorsiede doge, Abrahamore ar tar bongsogunore the juge-juge sahajjio gorsie.”
56 Sebeden Meri Elizabethi loge perai tin mas thanar porendi tar ghorot phiri elo.
Johonor Jormo Hoda
57 Elizabethir guro obar somoi oinei, the morod puo ekkuo phudelo. 58 Tar paralliegune ar tar sodorsiegune Probuie tare shanggadik doye gorsie bili suninei, thara tar somare hujhi olak. 59 Attio dinot gurobuore thara sundu-sam habi dibartei gelak. Tar babo nange-nange tare Zekaria nang thoi dedon. 60 Hintu tar mabuoi holo, “Noi, noi, tar nangan obode Johon.” 61 Sebeden thara-thara holak, “Sei nangan daw tomar sodorsie moiddie haror nei.” 62 Tar bab Zekariai gurobuore hi nang thoi dibar sai pujor goribartei, thara-thara ijiriedi holak. 63 The legibar jinij ekkan maginei, legilo: “Tar nangan Johon.” Ar thara begkune amok olak. 64 Sebeden Jogon-togon Itchiore Zekariar muon ar jilan huli dilo, ar the madi parinei Itchiorore baini gorilo. 65 Beg paralliegune dorelak. Ar goda Judea muro dejchanot, manuschune sieni sombonde huobula gorton. 66 Sieni zara sunon thara mone-mone eksottie bhabidak. Tare pujor goron, “Ibie henjannie guro obo?” Ar Probur shoktigan tar loge elo.
Zekariar Gidtuo
67 Tar bab Zekaria Pobitro Aptaloi boron olo. Sebeden the muni dogkie gori holo. 68 Probu tar manuschuno idu einei tharare uddhar gorsiegi hinottei,
“Probur Israelo Itchiorbuore baini gori.
69 The amattei tullie ek jon mukti die David tar sagorsie Davidor ghorottun.
70 Tar pobitro muniguno muoni darai the agendi protiggia gorsiede doge sien olo.
71 Amar sottrugunottun ar amare hos no pande sigunor adottun amare rokkie goribartei the amarloi protiggia gorsie.
72 Amar purbo puruschunore doye goribartei ar the tar pobitro suktigan idot tulibartei the protiggia gorsie.
73 Amar Purbo-puruschun Abrahamboi the sobot heinei protiggia gorsie.
74 The protiggia gorsiede, amar sottruguno adottun The amare rokkie goranar porendi, ami tare no doreie gori tobona gori para.
75 Ami jedog din baji thei, pobitro ar dharmig gori tar mujungot ami tare tobona gori para.
76 Oh put, tar podtani tartei jugolei dibartei tui Probur akke-akke jebe hinottei, tore begottun dangor Itchioror munibuo hobak.
77 Tharar pabpani mab gorinei Itchiore tharare mukti dibo gori tui jeinei tar manuschunore gyen dibegoi.
78 Amar Itchioror meyet darai the tharar pabpani mab gore ar ugurottun amar idu bennie belo sodogkanδ elo.
79 Jigune andharot boi agon ar jigune morono shabat tole agon sigunore phor dibartei the elo. Amar thengani shanti podedi adei nibartei the elo.”
80 Gurobuo dangor-digowl oinei aptadi shokto olo. Israel manus-chuno mujungot hulomela gori the no eje song, the moruobomit roie.