Jisur Jormo Hoda
Mot 1:18 -2:1 -2
2
Sei lokke moharaja Kaisara Augusto ugum dede, songsaro manuschune jon bagene nijor-nijor jagat tharar nangani manus gonanat legidak. 2 Kurini Syria rejjiogan sason gorette lokke polim sei manus gonanagan gora oie. 3 Jon bagene nijor-nijor sohorot nang legibartei gelak. 4 Ar Galili dejot Nazareth adamortun, Josebeo Judea dejot gelo. The Davidor bongso ar Davidor ghorbuo hinottei, Davidor adamanot, Bethlehemot the gelo. 5 The Meri somot nang legibartei jeie. Meri, tar jodon bannie mogkuo guro ong-ong oie. 6 Thara siot elakke lokke, Merir gurobuo obar din pureie. 7 Ar Meri tar polim morod puobuo phudelo. Thara porbhajchie ghor no pan hinottei, gurobuore lengera haniloi bereinei tare ekkan phiongot porei tholak.Bera-shagol Soreiegun ar Sorgo-dudtun
8 Sei lokke, sei bamot bera-shagol soreiegune madot thedak. reidot tharar bera-shagolun subi agon. 9 Ar sawh, Probur ekkuo sorgo-dud thara sidu dega dilogi. Probur mohimagan tharar seropala phor gori phudilogi. Sebeden thara shanggadik dorelak. 10 Hintu sorgo-dudtuoi tharare holo, “No doreo, Haron suno, beg manuschunottei shanggadik hujhi obar gom hobor mui aniduong. 11 Haron edchie Davido adamanot tomartei ek jon mukti gorie jormo oie. The olode Probu Kristo. 12 Ien tomar idu sinno obo: Ekkuo huji guro lengera haniloi bereie gori ekkan phiongot porei thoie gori debagoi.” 13 Addikie gori, birat ek jhag sorgo-dud Itchiorore baini gori-gori sei sorgo-dudtuo somare dega dilakki. 14 Thara hodon,
“Begottun ugure Itchioror mohima ok. pittimit shanti ar, manjiortei monggol ok.”
15 Sorgo-dudtune janar porendi, bera-shagol soreiegune thara-thara holak, “Bethlehemot ami ikkie jei. Probu amare holo, sien hi olo seigoi.” 16 Sebeden thara hijie-hijchie gori gelak. Gurobuore ekkan phiongot porsie gori ar Meriloi Josebore thara suph pelakkoi. 17 Gurobuore tare deganar porendi, sorgo-dudtuoi gurobuor sombonde tharare hoiede hodagan thara phogodang gorilak. 18 Bera-shagol soreiegune sien holak ar sei hodagan sunieni beg manuschune amok olak. 19 Hintu Meri sieni begkani idot udi mone-mone hub bhabi sar. 20 Sebeden bera-shagol soreiegune, sorgo-dudtuoi tharare hoiede sieni begkani suninei ar deginei, thara Itchiorore mohima ar baini gori-gori phirei gelak.
Jisure Itchioro Sidu
Gojei Die Hoda
21 Gurobuore sundu-sam habi dibar attio dinot, thara tare Jisu nang thoi dilak. The pedot no ode, tare sorgo-dudtuoi sei nangan thoi die. 22 Mosir Niomo doge, tharar sudduo-shanggo oionde dinun phureinei, Probu sidu gojei dibartei thara Jisure Jerusalemot anilak. 23 Probur Niomanot Mosi legkiede doge, “Polimmo morod puo ole, PROBUR sidu pobitro ijebe mone gora obo.” 24 Probur Niomo doge, “Ek jur hodor bah, ek jur haw-shawh,” utchorbo goribarlottei tare Jerusalemot nejeilak.
25 Ar sawh, Jerusalemot Simeon nange ek jon dharmig, ar Itchior bhokto manus elo. Israel jadtuore dug muson goridibode sibiere asha gori the barsei elo. Tar ugure Pobitro Aptabuo elo. 26 Pobitro Aptai tare janei dede, Probur Kristore no degkie gori the morto noi. 27 Pobitro Aptai tare Mondirbuot nejeilo. Ar guro Jisure tar bab-magune Mondirbuot nejeilak. Thara tartei Niomo dosturo doge gorton. 28 Sebeden Simeone Jisure adot loinei Itchiorore baini gorinei holo,
29 “Probu, tor hoda doge ikkie tor banidajibuore shantie jebartei de.
30 Haron mor sogkundoi tor muktigan degilung.
31 Ien tui begkunor mujungot jugolei duos.
32 The be-jadtuno sidu phor obo ar the Tor Israel manuschunor mohimagan obo.”
33 Simone gurobuor sombonde hode suninei, Josebpoi Meri amok olak. 34 Sebeden Simeone tharare asirbad dinei gurobuor mabuo, Merire holo, “Sha, Israel manjiortun shagor manus udibartei ar jhuri poribartei Itchiore ei gurobuore thik gorsie. Biruddie gori thara madibagke sienor sinnogan The obo. 35 Siennie gori Itchiore shagor manjior mono hodagani phogodang gori dibo. Mono dugkan dhar horgo dogkie gori tor nijor ontorot phudibo.”
36 Siot Anna nange ekkuo milie munio elo. The olode Asher goza, phanuelo jhi. The neg lonar porendi, the shodi elode siottun dhori bana sat bojor giritti gorsie. The shanggadik buro oie. 37 The perai surasi bojor rani oinei elo. The huno din mondirbuottun no jai. Dine-reide ubos thei ar bor magi-magi the Itchior tobona gori-gori roie. 38 Thik sei lokke, theo einei Probure baini gorilogi. Itchiore Jerusleman uddhar goribode sien asha gori agonde beg manuschunore the gurobuor sombonde holo.
39 Sebeden Josebpoi Meri Probur Niomo doge begkani gori phureinei, thara Galili dejot nijor Nazareth adamot phiri gelak. 40 Gurobuo dangor-digowl oinei, aptai ar gyene boron olo. Ar Itchioror doyegan tar ugure elo.
Mondirbuot Guro Jisu
41 Bojor bagene Jisur bab-magune Rokkie Utchobo lokke Jerusalemot jedak. 42 The baro bojor oinei, dosturo doge Utchobo lokke thara Jerusalemot gelak. 43 Utchobo dinun ses onar porendi, thara ghorot phiri jadon. Guno Jisu Jerusalemot roiede sien Josebpoi ar Jisur mabuoi hobor no pan. 44 Thara dolot The age bili mone gori, thara ek din gelak. Sebeden tharar sodorsie ar somarsiegune siot tare togei selak. 45 Tare suph no peinei, thara Jerusalemot phiri togadondi. 46 Tin dino porendi Mondirbuot tare suph pelak. The dhormoniomo mastoruno loge boi age. The tharar hodagani suni age ar the tharareo prosonno pujor gorer. 47 Jigune Jisur hodagani suinnion, sigun begkune tar bujonagan deginei ar tar juobpani suninei shanggadik amok olak. 48 Tar bab-maguneo tare deginei amok olak. Tar mabuoi tare holo, “Porannie, a hittei amare tui ien gorilie? Shadei, monot dug gori tor babpuo ar mui tore togeir.”
49 Jisu tharare holo, “A hittei tumi more togana? Mui mor Babo hamot lagi peimbe tumi hobor no po.” 50 Hintu The tharare hi hor sien thara no bujilak. 51 Sebeden the thara loge Nazareth adamot gelo, ar tharar hoda manilo. Hintu tar mai sei hodagani begkani tar monot rageilo. 52 Itchioror ar manjior hospanat gyenodi ar heyedi, Jisu dangor-digowl olo.