Jisur Jerusalemot Somana
11
Thara Jerusalemot lungibar hadallie Oliv mounnuor hai Bethphage ar Bethani adamanit lungilakki. Sebeden Jisu tar di jon sisjio padeilo. 2 Jisu tharare holo, “Tomar mujungedi adamanot jo. Adamanot somibagoio ekkuo gadha shawh bannie gori debagoi. Sei gadha shawhbuor pidit huno jone no soron. Sibie hueinei idu anogoi. 3 Ar judi huno jone tomare hon, ‘A hittei tumi ien goror?’ Sale, tumi hoio, ‘Probur ibie lager.’ The aro jhadi gori idu thoidie bajei dibo.” 4 Thara jeinei gadha shawhbuo banniettun huei dilak. 5 Siot hoiek jon manus thiei elakke sigune tharattun pujor gorilak, “Gadha shawhbuo tumi a hittei hulor?” 6 Jisu hoiede doge sisjiogune tharare holak, ar sei manuschune gadha shawhbuo anibartei onumoti dilak. 7 Sebeden di jon sisjioi gadha shawhbuore Jisur idu anilak. Sibier pidi ugure tharar haborani bijei dilak, sebeden Jisu gadha shawhbuor pidit udilo. 8 Ar shagor manjie tharar haborani podot bijei dilak. Ar hoiek jone gajottun pada-bola dhela habi aninei podot bijei dilakki 9 Sebeden Jisur mujungedi jadonde sigune ar pijendittun ettonde sigune joi jogar pari-pari holak:“Hossana! ‘PROBUR nange eiebuo donniobad gori thok.’
10 Amar bab Davidor ejette rejjiogan donniobad gori thok! Begottun ugure Hossana!”
11 Jisu Jerusalemot somanar jogon-togon mondirot gelo. The seropala begkani rini selo. Bel jeiegoi hinottei tar baro jon sisjio somot Bethanit gelak.
Jisu Mondirbuo Hajelo
12 Tar hellie Bethanittun janar porendi Jisur ped puro dorilo. 13 Sebeden Jisu durottun ekkuo jhubur dumur gaj degilo. Gulo agon bili sebartei the gajchuo hai gelo. Hintu dumur gulo okto noi hinottei the gajchuo hure jeinei bana padagani degilogoi. 14 Jisu gajchuore holo, “Edchiettun dhori umor song tortun huno jone guluo no hadok ar.” Tar sisjiogune sien The hode suinnion.
15 Ar thara Jerusalemot elak. Sebeden Jisu Mondirbuot sominei, siot beja-hine goronde sigunore dabei dilo. Tengaδ bodoli duonde sigunor tebilani ar hodor bejiegune bojonde jagagani the ullei phelei dilo. 16 Jisu mondiro udonedi huno malmatta nibar no dilo ar. 17 Sebeden the manuschunore sigkie dinei holo, “ ‘Beg jador manuschunottei mor ghoran bor magede ghor huo obo,’ ien legkie agede noi ni? Hintu tumi ienore ‘dagedor haath’ banei phellio” 18 Dhormo niomor mastorune ar rajguruthagurune ien suninei thara Jisure morei pheleibartei pod toga dorilak. Beg manuschune Jisur sigkiegani sunilie amok on hinottei thara tare dorelak. 19 Ar sajonnie ole Jisu tar sisjiogundoi sohorottun nigili jai.
Dumur Gajchuo Shidie Olo
20 Tar hellie beinnie poittie thara porendi jade, dumur singorottun dhori sidie oiede thara degilak. 21 Pitoror tun idot udinei Jisure holo, “Guruthagur, sah, tui geil duoschie dumur gajchuo shidie oie.” 22 Jisu tharare uttor dilo, “Itchiorore bischias goro. 23 Mui tomare soittio hodagan hongor, ek jone tar ontorot aw-bischias no aninei hintu jien hobo sien obo gori bischias gorinei judi ei mounnuore hoi, ‘Uguri jeinei sagorot polloi.’ Sale, tartei ien gori die obo. 24 Senottei mui tomare hongor, tumi bor magode jien mago sien peio bili bischias gorsio, sebeden tumi sieni peba. 25 Jokke tumi bor magibartei thio, judi huno jone tomar biruddie duj goron, sieni tharare mab duo. Sebeden tomar Bab sorgot agede ibiei tumi niom bhonggo gorode ieni mab dibo. 26 Hintu judi tumi tharare mab no duo, tomar Bab sorgot agede ibieio tumi niom bhonggo gorode ieni mab dido noi.”
Jisur Odhiharo Sombonde
27 Thara aro Jerusalemot lungilakki. Jisu mondirot berade seiet rajguruthagurune, dhormo niomor mastorune ar borjonnune tar idu elak. 28 Thara Jisure holak, “Ieni hi odhihare tui goror? Ar ieni goribartei honna Tore ei odhiharan die?” 29 Jisu tharare uttor dinei holo, “Mui tomare ekkan prosonno dorim. Tumi more uttor duo. Sebeden mui tomare hom, ieni hi odhihare mui gorongor. 30 Johonor baptismagan sorgottun nahi, manjiortun? More uttor duo.” 31 Thara-thara huobula gorte holak, “Ami judi hoi, ‘Sorgottun’ salen, the hobo, ‘A hittei tumi tare bischias no goro?’ 32 Hintu judi ami hoi, ‘Manjiortun’ sio, ami jonogonore dorei.” Haron beg manuschune Johonore ek jon muni bili mani loion. 33 Senottei thara Jisure uttor dinei holak, “Ami hobor no pei.” Sebeden Jisu tharare uttor dinei holo, “Ieni hi odhihare mui gorong muio tomare no hom.”