Sara-Sari Sombonde
Jisur Sigkie
10
Sebeden Jisu sei jagagan sari jei Jordan soragan par oi Judea rejjiot elo. Manus jhag-jhag tar idu elak. The gorede doge manuschunore aro sigkie dilo.2 Hoiek jon Pharisi Jisu idu einei tare joga sebartei holak, “Ek jon manjie tar mogkuore sari dibar niomot age nahi?” 3 Sebeden Jisu tharare uttor di holo, “Mosi tomare hi niom die?” 4 Thara holak, “Mosi onumoti dede shur hagos leginei mog sari di pare.” 5 Jisu tharare uttor di holo, “Tumi akkol han hinottei Mosi sei nioman tomartei legi diede ai. 6 Hintu, Itchiore sristi arambo gorsiede lokkene ‘tharare milie ar morod gori baneie.’ 7 ‘Senottei daw mor odtuoi tar bab-magun phelei jei tar mogkuoloi egottor obogoi. 8 Ar thara di jone ekkan heye obak.’ Senottei thara di jon noi ar hintu ekkan heye olak. 9 Senottei Itchiore jien joragori di die, sien manjie pharok no gortok.” 10 Thara ghoro bidirie elakke aro tar sisjiogune sei hodagano sombonde Jisuttun pujor gorilak. 11 Jisu tharare holo, “Jei manuschuoi tar mogkuo sari dinei judi oinnio milieloi, sale, tar puron mogkuo biruddie biebijier obo. 12 Ar jei miliebuoi tar negkuo sari dinei judi oinnio morod loi, sale, tar puron negkuo biruddie biebijier obo.”
Jisu Sigon Gurogunore Asirbad Dilo
13 Hoiek jon manjie sigon guro Jisur idu anilak, jen The tharar ugure adtuli de. Hintu Jisur sisjiogune sei manuschunore aw-hoda holak. 14 Sebeden Jisu ien deginei baari rak gorinei tar sisjiogunore holo, “Sigon gurogunore mor idu ebartei duo, tharare mana no gorsio. Haron Itchioror rejjiogan olode ei sigon guroguno dogkien. 15 Mui tomare soittio hodagan hongor, je Itchioror rejjiogan sigon guroi gojhi londe sannie gori gojhi no loi, sale, the huno din Itchioror rejjioganot somi patto noi.” 16 Sebeden Jisu sei sigon gurogunore horot lolo. Tharar madat adtuli dinei tharare asirbad dilo.
17 Jisu podedi jadte lokkene ek jon manus tar idu daba-daba elo. The Jisur mujungot adu pari salam gori porinei tartun pujor gorilo, “Gom Guruthagur, ononto jibon pebartei mor hi gora poribo?” 18 Hintu Jisu tare uttor dinei holo, “Tui a hittei more gom hole? Itchior bade ek jono gom nei ar. 19 Tui shilegun hobor pas daw, ‘Shanda no goris,’ ‘Hun no goris,’ ‘Sur no goris,’ ‘Mijie shakki no dis,’ ‘Manjiore no thogeis,’ ‘Tor bab magunore sorman goris.’ ” 20 Manuschuoi Jisure holo, “Guruthagur gaburottun dhori sei beg ugumani mui palei ejongor.” 21 Jisu tare rini seinei hos pelo. Sebeden tare holo, “Ek pod bagi age, sien tor gora poribo. Ja tor hi-hi age bejinei tengagunδ gorib dugkiere bhag gori degoi. Sebeden sorgot tor dhon thebo. Tar porendi einei kroschan buginei mor loge eis.” 22 Hintu ei hodagani suninei the suduo muo olo. The monot dug peinei gelogoi. Haron tartun onek dhon-sompotti age.
23 Seropala seinei Jisu tar sisjiogunore holo, “Jigunor dhon-sompotti age sigunor Itchioror rejjioganot somade hodog aghattie!” 24 Sisjiogune Jisur hodagan suninei amok olak. Hintu Jisu tharare aro uttor di holo, “Sawh, jigune dhon-sompottir ugure nirbhor goron, sigune Itchioror rejjioganot somade hodog aghattie! 25 Ek jon dhoni manus Itchioror rejjioganot somana darane ekkuo uth sujor pajidi sominei nigili janagan bes utchuo.” 26 Ei hodaganottei thara shanggadik amok oinei thara-thara huobula gora dorilak, “Salen, honna mukti pebo?” 27 Hintu Jisu tharare rini seinei holo, “Itchiorottei begkani sombob hinottei ien manjiortei aw-sombob oleio hintu Itchiorottei sombob.”
28 Sebeden Pitore Jisure holo, “Sah, ami beg phelei einei tor loge elong.” 29 Jisu tare uttor dilo, “Mui tomare soittio hodagan hongor, je mortei ar gom hoboranottei ghor-duor, bhei-bon, bab-ma, mog-puo, ar jaga-jobin phelei ebo, 30 Ei jugkuot thara ek shot dunuo pebak. Ghor-duor, bhei-bon, ma, puo-jhi, jaga-jobin ar dug-hosto thara pebak. Ar ejette jugkuot thara ononto jibon pebak. 31 Hintu onek manus akkuol oi agonde sigun jer poribak, ar jero sigun akkuol obakkoi.”
Jisur Moranar
Agami Hoda
32 Jokke thara Jerusalem song jebartei podot uttuondoi, Jisu tar sisjiogunotton akke-akke jar. Senottei tar sisjiogune amok olak. Jisur pune-pune jadonde siguneo dorelak. Sebeden Jisu baro jon sisjiogunore aro ek huredi ninei hi-hi ghodibo sieni tharare huo dorilo. 33 The holo, “Suno, ami Jerusalem song jeir. Sidu Munischioro Puobuore rajguruthagurunor ar dhormo niomor mastorunor adot gojei die obo. Thara tare dujot pelanar porendi tar moribar dorkar bili thik goribak. Ar sebeden Be-jadtunor adot tare gojei dibag. 34 Sigune tare thatta ureibak. Tare sabukkoi baschiebak ar sep phelei dibag. Ar tare morei pheleibak. Tin dino porendi the aro jiei udibo.”
Jakob Ar Johonor Hujoli
35 Sebeden Jebedaior puo Jakob ar Johone Jisur idu einei tare holak, “Guruthagur, amattun mone hoidie sien ami magilie tui amare dis.” 36 Jisu tharare holo, “Mui tomartei hi gori didung tomartun mone hoi?” 37 Thara tare holak, “Tui jokke tor oborug singasonot bobe, sokke tor denedi ek jon, bangedi ek jon tor loge ami bojibartei sei.” 38 Hintu Jisu tharare holo, “Tumi magilade ien tumi hobor no po. Mui heimbe golojchuottun tumi hei pariba parapang? Mui lombe baptismagandoi tumi baptisma oi pariba parapang?” 39 Ar thara tare holak, “Ami paribong.”
Ar Jisu tharare holo, “Mor golojchuottun tumi hamakkai heba, ar mui lombe baptismagan tumi loba. 40 Hintu mor denedi ok, mor bangedi ok bojeibar mor odhihar nei. Jigunottei banedie sigune bojibak.” 41 Jokkene oinnio dos jone ien sunilak, thara Jakobor ar Johonor ugure rak uduo dorilo. 42 Hintu Jisu tharare diginei holo, “Tumi hobor pode Be-jadtune sason goronde sigunor odhihari on ar tharar murubbigune sigunor ugure ugum salei ni paron. 43 Hintu tomar moiddie siennie no obo. Je tomar moiddiettun dangor obar sai, the tomar sagorsie uo poribo. 44 Ar je tomar moiddiettun bego dangor obar sai, the begkunor banidaji uo poribo. 45 Haron Munischioro Puobuoio manjiortun ham hebartei no eje, hintu The manjiore ham gori dibartei ar onek manjior muktir dam ijebe tar poranan dibartei ejchie.”
Bartimai Hanare
Jisu gom Gorilo
46 Sebeden Jisu ar tar sisjiogune Jerikko sohorot lungilakki. Jisu tar sisjiogundoi jhag-jhag manus somot Jerikkottun nigili jade, ek jon han manus raj podor pazarat boinei bikkie mager. Tar nangan olode Bartimai, Timaior puo. 47 Jokke the Nazareth hullie Jisu bili sunilo, the jogar pari-pari dagi huo dorilo, “Jisu, Davidor Puobuo, more doye gor.”
48 Onek manjie tare jhaji dinei tare sub gori thebartei holak. Hintu the sie bes jogar pari-pari huo dorilo, “Davidor Puobuo, more doye gor.”
49 Jisu mow oinei tare dagibartei ugum dilo. Sebeden manuschune hanare dagi holak, “Hujhi aw. Uth, the tore dager.” 50 Sebeden the uri agede haboran lugimari dinei udinei Jisur sidu gelo.