Pobitro Ar Aw-pobitro
7
Sebeden hoiek jon Pharisi ar dhormo niomor mastor Jerusalemortun einei Jisur hai thubelakki. 2 Thara degilak Jisur hoiek jon sisjioi hajor adtoi hebartei bojchion. Hajor ortho olode adhoie. Senottei thara-tharar ugure abitti gorilak. 3 Pharisigune ar beg Judaiune tharar borjonnune die dostur mojim thara dolei ad no dhole hitchu no haan. 4 Bazarottun thara elegoio burinei no gadile thara hitchu no haan. Ienor bade thara aro bhalukkani dostur palei pan. Sieni olode goloj, hum, pidolor pilie, ar ghum jaidie ogirani dhona.5 Sebeden Pharisi ar dhormo niomor mastorune Jisuttun pujor gorilak, “Tor sisjiogune borjonnune die dosturano doge no adinei a hittei thara ad no dhoie gori bhat haan?”
6 Jisu tharare uttor dinei holo, “Tumi phagaragun! Tomar sombonde muni Isaia thik gori hoi di jeie. Tar boibuot edogkie gori legkie age:
‘Ei manuschune tharar muendi more sorman goron. Hintu tharar monani mortun pharok.
7 Manjie baneie niomani thara sigan hinottei thara more tobona goronde ien aittie magana.’
8 Tumi Itchioror ugumani no maninei, manjie die dosturani tumi palor. Ei dosturani doge tumi hum, ar goloj dhoi po. Aro seienie onek tumi goro.” 9 Jisu tharare holo, “Tomar nijor dosturani paleibartei Itchioror uguman tumi aw-mannio goror. Sedogkie gorilie baari gom bilinei tumi mone goror. 10 Mosi hoie, ‘Tor bab mare sorman goris.’ Ar ‘Je tar nijor bab mare gobe, tumi tare morei phellio.’ 11 Hintu tumi hode, ‘Ek jon judi hoi, “Mor bab-magunore sahajjio goribar tengagunδ korban oie.” ’ Sienor ortho olode Itchioro sidu utchorbo gora oie. 12 Senottei tumi tar bab-Mattei ar hitchu no goribar mana goro. 13 Esannie gori tomar borjonnune die dosturani sigkie dinei Itchioror hodagan tumi aw-mannio goror. Ar sedogkie ham onek goro.”
14 Sebeden Jisu beg jonogonore tar idu dagi tharare holo, “Tumi begkune mor hoda suno ar buji lo. 15 Bharettun jieni manjior bidirie jai, sienie manjiore aw-pobitro gori no pare. Hintu manjior bidiriettun jieni nigili eje, sienie manjiore aw-pobitro gore. 16 Jar sunibar han age, the sunok.” 17 Ar Jisu manuschunore phelei jei ghoro bidirie somilogoi. Sebeden tar sisjiogune tartun sei tulona hodagano sombonde pujor gorilak. 18 Senottei Jisu tharare holo, “Tumio ien buji no parotte parapang? Bharettun jieni manjior bidirie some, sienie tare aw-pobitro gori no pare. 19 Ienor haronan olode, sien daw tar ontorot no some, hintu tar ped dor bidirie some ar tar porendi heyettun nigili jai. Ei hodagandoi Jisu bujei dilode, beg haidie jinijchani pobitro.” 20 Jisu aro holo, “Manjior bidiriettun jieni nigili eje, sieni manjiore aw-pobitro gore. 21 Haronan olode manjior bidiriettun, mane ontorottun ejede hu-bhab, shanda, porpagol, hun gorana, 22 Sur, lubbo, phagara, hanggi, geil dena, manjior thogana, sorjana, podani ar aw-gyen. 23 Ei beg horabpani manjior bidiriettun nigili eje ar manjiore aw-pobitro gore.”
Ekkuo Grik Miliei
Bischias Gorilo
24 Jisu sei jaganottun jei Tyre ar Sidon bamot elo. Tartun mone holode tare huno jone hobor no pedak. Senottei the ekkan ghorot somilogoi. Hintu The pollei thei no parilo. 25 Ekkuo miliei Jisur hobor sunilo. Tar jhibuo hajorchie aptai peie hinottei the Jisu idu einei Jisur thengot bukpari salam gori porilogi. 26 Sei miliebuo olode Grik milie. Tar jormo olode Syria, Phoenikia dejot. Tar jhibottun bhudtuo dabei dibartei the Jisure hujoli gorilogi. 27 Hintu Jisu tare holo, “Akke gurogune ped boron hadok. Gurogunottun pidie hari loinei hugurunore dena gom noi.” 28 Sebeden miliebuoi Jisure uttor di holo, “Probu, enedo oi. Hintu gurogune haade tebilor tole pidie guri jhuri pole hugurune daw haan.” 29 Ar Jisu tare holo, “Ei hodagan hole hinottei tui jei paribie. Tor jhibuottun bhudtuo nigili jeiegoi.” 30 Ar tar jhibuottun bhudtuo nigili jeie hinottei the ghorot jeinei tar jhibuo ogirot Porsie gori degilogoi.
Jisu Ek jon Haal
Ar Bub Gom Gorilo
31 Jisu aro Tyre ar Sidon baman sari Dekapolis bamot phuri jei Galili sagorot lungilogi. 32 Hoiek jon manjie Jisur idu ek jon haal aro bub manus anilak. Ar sei Manuschuor ugure tar adtani tuli dibartei thara Jisure hujoli gorilak. 33 Sebeden Jisu sei manuschore manjior jhagor bidiriettun ek huredi ninei, tar di-hanot angul di dilo. Ar sep dinei tar jilan dhori dilo. 34 Sebeden Jisu agajor hitte seinei bor-nijes iridi manuschuore holo, “Ephphatha.” Sienor ortho olode, “Huluo ja.” 35 Ar jogon-togon tar hanani huluo gelo. Tar jilano huluo gelo ar the gome-dalei hoda hoi parilo 36 Ar Jisu thara harore no hobartei tharare mana gorilo. Hintu jedog tharare the mana gorilo, sedog thara prosar gorilak. 37 Ar thara begkune baari amok oinei holak, “The beg dolei gorilo. Halore sunon para ar bubore hoda hoi paron para gori dilo.”