Bhude peie Manuschuo
Gom Olo
5
Sebeden Jisu ar tar sisjiogun somot Galili sagoro uhule Gadara manjior dejot lungilakki. 2 Jisu nawganottun uttiegoio, ek jon hajorchie aptai peie manus sojan holattun tar idu elo. 3 Ei Manuschuo sojan holat thedo. Tare huno jone singolloio bani rage no paron. 4 Manjie tare tar adot thengot singolloi bani thodak. Hintu the ador thengot singolani sini pelai. Huno jone tar loge borei no ejon. 5 Dine-reide onsur sojan holai-holai ar ek murottun aro ek murot hijiek hari-hari beredo. Ar dhar silloi tar nijor heyet habido.6 Jisure durottun denei, the daba-daba elo ar tar mujungot bukpari salam gori porilo. 7 Ar the birat ro gori Jisure holo, “Jisu, begottun Dangor Itchioror puobuo! Tui more hi gorte sas? Itchioror nage mui magongor, tui more hosto no dis.” 8 Haron Jisu tare hoiede, “Hajorchie aptabuo, ei manuschuottun nigili ja!” 9 Sebeden Jisu tartun pujor gorilo, “Tor nangan hi?” Ar sei manuschuoi uttor dilo, “Ami jakkuo hinottei, mor nangan olode Legionδ.” 10 Ar the Jisure bar-bar hujoli gorer jen tharare sei jaganottun dabei no de. 11 Sokkene sei mounnuor hai dangor ek pal sugor sorton. 12 Beg bhudtune Jisure hujoli gori holak, “Sugorunor bidirie somi pari para, amare dipada.” 13 Ar jogon-togon Jisu tharare somibartei ugum dilo. Hajorchie aptagune manuschuottun nigili jei sugorunor bidirie somilakkoi. Sebeden goda sugoro palluo jhok pori tarengodi porinei sagorot dubi mori gelak. Sei sugoro palluot perai di azar sugor elak. 14 Jigune sei sugorun soradon, thara sokkene daba-daba jeinei sohoror ar hai-hure beg jaganit ei hoboran holakkoi. 15 Jokke thara Jisur hai lungilakki, sei azar bhude peie manuschuoi habor uri, lokki gori boi agede deginei thara dorelak. 16 Ei ghodonagan jigune degkion, sigune sei bhude peie Manuschuor hoboran ar sei sugorunor hoboran manus-chunore holak. 17 Ar manuschune tharar bamottun jebartei Jisure hujoli gora dorilak. 18 Jisu jekke nawganot uder, sokkene, jei Manuschuore agendi bhude peie, the tar loge jebartei Jisure hujoli gorilo. 19 Hintu Jisu tare loge jebar no dilo. Senottei the tare holo, “Tui tor ghorot phiri ja. Ar probu tortei hodog dangor ham gori die ar tore hodog doye gorsie sieni tor ghorbuogunore jeinei hogoi.” 20 Sebeden Manuschuoi siottun jeinei goda Doschan sohorot berei-berei Jisu tartei hodak dangor ham goridie hologoi. Senottei, jigune tar hoboran sunon sigune amok on.
Mora Milie-shawh
Ar Pirie-bola Miliebuo
Mot 9:18 -26; Luk 8:41 -56
21 Jisu aro nawt gori sagoro uhule par oinei, jhag-jhag manus tar idu thubelakki. The sokkene sagoro parot elo. 22 Jaira nange ek jon synagog lobiot gorie Jisur idu einei tar thengo hure bukpari salam gori porilogi. 23 The Jisure thajei hujoli gori holo, “Mor sigon jhibuo morong-morong oie. Doye gori einei Tor adtani tar ugure tuli dille the gom obo ar bajibo.” 24 Sebeden Jisu tar loge gelo: Ar Jisur pune-pune jhag-jhag manus thela-theli gori jadon. 25 Ar siot ekkuo baro bojorchie ridupirie-bola milie elo. 26 Onek daktoror adot hosto peie. The jedog pare sedog horoj gorilo. Sokkene gom obo, aro bes oiede. 27 Jisur hoboran the suni, manjior jhag siri einei Jisur haborot dhorsiegi. 28 The mone-mone holo, “mui bana tar haboran dhorilieo gom om.” 29 Ar jogon-togon tar lo poranagan gom oie bili nije tar heyet hobor pelo. 30 Sebeden Jisu tar bidiriettun ham gori parede hemodagan nigilie bili jogon-togon tar ontorot hobor pelo. Manuschunor hitte muo phireinei holo, “Honna mor haborot dhorsie?” 31 Tar sisjiogune tare holak, “Edukkun manjie Tore thelonde degor, a hittei tui hor, ‘More honna dhorsie?’ ” 32 Sebeden Jisu tare dhorsiede miliebuor seropala selo. 33 Ar sei miliebuoi tar heyet hi ghodi jeie sien hobor pei, dore girgirei-girgirei einei Jisur mujungot bukpari salam gori pori tare beg soittio hodagan holo. 34 Ar the tare holo, “Jhi, tor bischiaschane tore gom gorilo. Shantie jagoi, ar tor edogkie hosto no ok ar.”
35 Jisu hoda horte lokkene Jairar ghorottun hoiek jon manus elak. Thara Jairare holak, “Tor jhibuo nei ar. A hittei Guruthagurore dug lagor?” 36 Hintu Jisu sei manuschunor hodagani sunonar jogon-togon Jairare holo, “No dores. Bana bischias gor.” 37 Ar Jisu Pitorore, Jakobore ar Jakobor bhei Johonore bade huno jon tar loge no nilo. 38 Jokke thara synagog lobiot goriebuor ghorot lungilakki, Jisu joul gortonde degilogi. Manuschune ek dajie gujhi-gujhi handon ar ek dagie gujhi-gujhi handonde degilogi. 39 Jisu ghoro bidirie jeinei manuschunore holo, “Tumi a hittei joul goror ar hanor? Milie-shawhbuo no more, hintu ghum jar.” 40 Ar ei hodagan suninei manuschune Jisure azilak. Senottei the begkunore barendi nigilei dilo. Sebeden milie-shawhbuor bab-ma ar tar tin jon sisjio somot milie-shawhbuo agede siot somilakkoi 41 Jisu tare addot dhorinei holo, “Talitha koumi.” Sienor orthogan olode, “Nagori, mui hongor, tui uth.” 42 Jogon-togon milie-shawhbuoi udinei bera dorilo. The olode baro bojorchie milie. Manuschune sien deginei shanggadik amok oi sadhu olak. 43 Hintu Jisu tharare huno jonore no hobartei shokto gori mana gorilo. Sebeden Jisu milie-shawhbuore hebar jinij dibartei holo.