Biji Shidiebuor Tulona
4
Sebeden sagoro parot jhag-jhag manus Jisur idu thubelakki. Senottei Jisu panit ekkan nawt bojilo. Beg manuschunore sigkie dibartei sagoro parot tar mokkie muo gori boja bajei dilo. Sebeden Jisu tarahre sigkiedie dhorilo. 2 Ar the tharare tulona hodadi onek sigkie dilo. Jisu tharare sigkie dede holo, 3 “Suno! Sawh! Ek jon biji shidiei biji shidibartei gelo. 4 Ar edogkie olo, the biji sidi dede gulodok biji podo pazarat porilag. Sigun pheigkune einei hei phelliekki. 5 Ar gulodok biji madi padol sadara jagat porilag. Madi padol hinottei jhadi gejeilak. 6 Hintu jokke belan udinei rode shegilo, ar singor nei hinottei sidie oi gelak. 7 Ar gulodok biji hada bonot porilag. Hada bonan ojol oinei bijigunore dagi ragelo hinottei phol dori no parilak. 8 Hintu aro gulodok biji gom madit porilag. Igunottun sara udinei sawh loi-loi bari gelak ar phol dorilak. Hoiekkunottun tiris dunuo, heit dunuo, ar ek shot dunuo gori phol dorilak.” 9 Sei porendi Jisu holo, “Jar sunibar han age, the sunok!” 10 Ar gai-gai elode lokkene Jisur baro jon sisjio ar tar seropala elakke sigune sei tulona hodaganor sombonde pujor gorilak. 11 Jisu tharare holo, “Itchioror rejjior gubonan buji paribartei tomare gyen die oie. Hintu barendi agonde sigunore tulona hodadi beg huo oie.12 “Senottei:
‘Thara sade sebak, hintu buji loi partak noi. Sunde sunibak, hintu bujtak noi. Seienie no ole tharar monani phireibak ar tharar pabpani mab die obo.’ ”
13 Ar Jisu tharare holo, “Ei tulona hodagan buji no parotte parapang? Sedogkie ole a hingori beg tulona hodagani buji pariba? 14 Biji sidiebuoi Itchioror hodagan sider. 15 Hoiek jon manus olakke sei podo pazarat porsie bijigunor obostani dogkie. Thara sunonar jogon-togon soitannuoi eje ar sigunor ontorot sittie Itchioror hodagan nigiliei nejai. 16 Thik sedogkie gori hoiek jon manus olakke sei madi padol sadara jagat porsie bijigunor obostani dogkie. Itchioror hodagan thara sunile jogon-togon thara hujhi gori mani lon. 17 Hintu tharar ontoro murot song singor nei hinottei bana hanekkon gori tigi thei paron. Jogon Itchioror hodaganottei hosto ele, ar manjie uttiesar gorilie, jogon-togon odot jhuri poron. 18 Ar hoiek jon manus olakke sei hada banot Porsie bijigunor obostani dogkie. Itchioror hodagan thara sunonde oi. 19 Hintu thara ei halor sintiettei, dhon-sompottir lubbot bajhi, aro oinnio lub somi, Itchioror hodaganore dagi ragai hinottei phola phol neie on. 20 Hintu hoiek jon manus olakke sei gom madit porsie bijigunor obostani dogkie. Itchioror hodagan thara sunon ar mani lon hinottei thara phola phol on. Ek dagie tiris dunuo, hoi ek dagie heit dunuo, ar ek dagie ek shot dunuo phol utponno goron.”
Serago Tulona
21 Jisu tharare holo, “Serag ogiro tole bah leio tole thobartei ano ni na? Serag dagi thona oi ni noi? 22 Haronan olode manjie jieni gubei thon, Itchiore sieni phogodang gori dibo. Jien dagi tho oie sien hulo obo. 23 Jar sunibar han age, the sunok.”
24 Aro Jisu tharare holo, “Uijkare suni thago! Tumi jei mabpoi mabo, tomareo sei mabpoi maba obo. Aro ekka bes gori tomare maba obo. 25 Haron jar age tare aro bes die obo. Hintu jar nei, tar jien age sieno tartun hari luo obo.”
Biji Uttie Tulona
26 Jisu aro holo, “Itchioror rejjiogan edogkie: Ek jon manjie madit biji sidilo. 27 The reidot ghum jei ar dinot jagi theinei somoi hadeilo. Sei somoio bidirie bijigun gejeilak ar sara udi dangor-digol olak. Sei Manuschuoi tar hedtan henjannie olo hoi no pare. 28 Madigane gai-gai saragun dangor-digol goreilo, ar biji dorilak. Akke pada phudilo, tar porendi thor nigililo, ar tar porendi biji boron gori shora nigililo. 29 Jokke bijigun pagilak, habibar okto olo. Sebeden manuschuoi tar sharigan loi haba dorilo.”
Sorjio Biji Tulona
30 Jisu holo, “Itchioror rejjiogan hiloi tulona goribong? Hior tulona hodadi ien bhangi di paribong? 31 Ien olode tumi madit sidode iottun ekkuo sorjio biji dogkie. Sorjio bijibuo olode madit sidonde biji moiddie begottun sigon. 32 Hintu sidenar porendi, ibie dangor oi. Beg shak padorottun bes dangor oi. Dangor-dangor dhela loi. Senottei pheig ejon ar sorjio gajo shabat tole bhah goron.” 33 Shagor edogkie tulona hodadi Jisu manuschunore Itchioro hoda hoi die. Thara jittur buji paron sittur The tharare hoi dilo. 34 Hintu Jisu bana tulona hodadi tharare hoi die. Manus no thande lokkene, the tar sisjiogunore begkani bhagi de.
Jisu Jhoran Thameilo
35 Sei dinnie beillie Jisu tar sisjiogunore holo, “Ami uhule jei.” 36 Sokkene sisjiogune manuschunore dipadanar porendi, Jisu jei nawganot elo sei nawganot gori thara tare loinei gelak. Siot aro oinnio sigon noio elo. 37 Tokkanot borboh bah dorilo. Pani tubol nawganot abor hei nawganot pani somer. 38 Jisu nawganor pazandi balos sidendi ghum jar. Tar sisjiogune tare jaginei holak, “Guruthagur, ami daw mori jer, amare ekka sah nah!” 39 Sebeden Jisu udi boieranore gubilo, ar sagoranore the holo, “Thama! Olor awh!” Sebeden boieran thameilo, ar jodepode olor olo. 40 Tar porendi Jisu tar sisjiogunore holo, “A hittei edok dorelade? Ejo song tomar bischias shokto no oi?” 41 Sebeden thara Jisure shanggadik dorelak. Thara-thara huobula gorilak, “Ibie henjannie manus? Boierane ar sagoraneio tar hoda mani pai.”