Ɛfɛshu 5

Bəne bə Kleto yee bə́ dūŋh ye bəne bə kinchaa lə

Ye bə́ duŋ lə bwɔni bə Chu bbəŋ i lèki gbaaŋ, yee bə dûŋ ye i duhŋ lə. 2 Yee bə dûhŋ ə kinleki mə dəŋ yəəŋ ye Kleto mà leki lə be bwo nə gbo wiih yu be. Kinnə kiih kɨhŋ mà duŋ ntofi nnu i fù chee nwaa bə Chu.

3 Bieŋ ye kiwaali bə fwɔ wi nyɛninə winhliŋ maa díi ŋəŋge, kə duŋ nə bbɨŋ bə́ chɔɔ ma ki bi lə bi bie ə bəŋ mə kə, yulahalə bieŋ bɨhŋ kə duŋ nə bbɨŋ duŋ ə yee bi dūŋ ə bəne bbəŋ bə́ dùŋ bə Chu mə kə. 4 Fi kə nwaa lə dududu lə biyɔɔnə bi nyɛninə ləkə bi nfili ləkə bimbunə binya yee bi fū ə bəŋ jə kə. Yee bə nə̂ kwaa ə duŋ kimbaafɛɛ bə Chu.

5 Yee bə kə̂lə bə kichɛɛŋ lə mbɛɛ nnu i waali kiwaali, ləkə mbɛɛ nnu i fə̀ nyɛninə, ləkə mbɛɛ nnu i gè díi, kənə lə dɔhɔ ə muŋkɨŋ mu Kleto bəə Chu mə kə. Mbɛɛ díi ŋəŋge jə̀ bieŋ ye chu wi lə. 6 Bə kə bemi lə mbɛɛ fihi bəŋ bə biyɔɔnə binya ki bieŋ bɨhŋ kə. Yee bə kə̂lə lə, ə bieŋ bɨhŋ bbɨŋ bi bwò bi fə̀ biwɛɛ bi Chu fwèe bə bəne bbəŋ bə́ dùŋ kə woo wu. 7 Nəni bə kə yee bə bûhuŋ go bə dɨŋ kintu ki bəne bə bimbini bie kə. 8 Fwii màa dūŋ bə dùŋ bəne bə jɨbə. Kwaalə fidiɛɛ ye bə buhuŋ lə gbo bə Baba, bə duŋna bəne bə kinchaa. Yee bə dûhŋ ye bəne bə kinchaa lə. 9 Fieŋ ffɨŋ kinchaa bwò bə fi lə fwɔ winwaa bə wintiiŋ maa wwuŋ wi nyìi kichɛɛŋ. 10 Bə ju bəŋkələ fieŋ ffɨŋ fi nwaa bə Baba. 11 Bə kə yee bə yîi kwáŋ ŋieeŋ ə bieŋ binya bi jɨbə mə kə. Bə tɔhi bi bu tɔhinə. 12 Ə fieŋ fi giaali bən'yɔɔ ki bieŋ bbɨŋ dɨŋ bəne bəmbini bie fə̀ ə nələ mə. 13 Kwaalə fieŋ finhliŋ ffɨŋ kinchaa tə̀ ə fi go, nyìee bə́ ŋə̀ŋ ə fi go, 14 yu fieŋ finhliŋ ffɨŋ fi nyìee lə kinchaa. Fiee fieŋ ffɨŋ fi fə̀ bə́ hlə yee bə́ yɔ̄ɔ fieŋ fidi lə,

“Wə nnu wə nɔ̀ŋ kinɨŋ, ŋənə!

Fu ə kpe mə, kinchaa ki Kleto ya yee ki tə̄ ə wə go.”

15 Nəni bə jə bwɔɔ ye bə jaa lə. Bə kə yee bə dûhŋ ye bənfili lə kə. Yee bə dûhŋ ye bəne bbəŋ bə́ kə̀nə bufe. 16 Bwɔɔ nnu bə bənə je bənfə fieŋ fidi, bə ŋəŋ lə bwɔɔ mbini yo kə kaah kwe nya kə, yu joo ŋəŋ duŋ ŋəŋ'waha. 17 Nəni bə kə duŋ nə bənfili kə. Yee bə jû bəŋkələ fieŋ ffɨŋ Baba kìɛɛ lə yee bə fə̄. 18 Bə kə yee bə ŋwî mbihŋ mə kwò bəŋ kə. Fɨhŋ lə fieŋ ffɨŋ fi bìhi bəne bu bihinə. Yee bə dûŋ bə fiila ə duŋ bə Fiana Wɛɛŋ. 19 Yee bə yɔ̂ɔ bə go ŋieeŋ ə yíi ŋə nteenə mə, ŋŋəŋ ŋə fù ə Kiŋwaati ki Ŋkohi^ª mə, maa yíi ŋəndi ŋə ŋkohi maa ŋŋəŋ Fiana Wɛɛŋ nə̀ bəŋ. Yee bə têe nəni bə dòhi Baba ə tɔ́ŋ ŋieeŋ go. 20 Yee bə nə̂ kimbaafɛɛ bə Chu Tah bwɔɔ mənhliŋ ə fieŋ finhliŋ mə, ə yii li Baba ya Jisho Kleto bəŋ.

Keehnə ki bəkwɛɛ bə bənəə bə bə́

21 Yee bə nə̂ go ŋieeŋ bə mbɛɛ bənhliŋ bələ kinyohi kkɨŋ bə kənə ə Kleto mə. 22 Bəkwɛɛ bə bəne, yee bə nə̂ go ŋieeŋ bə bənəə bieeŋ ye bə nə̄ lə bə Baba, 23 yu nyo dùŋ kwoo ki kpɛ, ye Kleto duŋ lə kwoo ki kimbumə ki bəne bə kimbemi. Kimbumə kie dùŋ gbo wiih, ə duŋ wu kibɛɛ nnu i dùŋ Nchuu Fwoo ki. 24 Nəni bəkwɛɛ bə bəne duŋ lə bənnə go ŋəbə bə bənəə bəbə ə fieŋ finhliŋ mə, yəəŋ ye kimbumə ki bəne bə kimbemi nə̀ lə gbo wi ki bə Kleto.

25 Bəŋ bənəə, yee bə lêki bəkwɛɛ bieeŋ dəŋ yəəŋ ye Kleto mà leki lə kimbumə ki bəne bə kimbemi i nə gbo wiih, kpe yu ki. 26 I mà nəə gbo wiih bənfə lə kimbumə kie yee ki chāa ye i mà wiilə ki bə ŋgwiŋ maa die yi. 27 I mà bwɛɛla kimbumə ki bəne bə kimbemi kie nəni fo mə jə ki ə wu go ye kpɛ nnu i dùŋ miɛmiɛmiɛ kə kənə niini ləkə finiɛɛ, ləkə fieŋ fidi fiwaha ə wu go, i chàa, i dùŋ kə kənə gbenə ə wu go kə. 28 Ə lə dəŋ yəəŋ ye bənəə dùŋ lə yee bə́ lēki bəkwɛɛ bəbə dəŋ ye bə́ lèki lə go ŋəbə. Ə mbɛɛ lə leki kpɛɛ, kəə i lèki ə duŋ gbo wiih. 29 Mbɛɛ ju hləŋ həmə nnu i bwò i lòh bə gbo wiih. I lèe wi bu leenə, i jə̀ bwɔɔ, i fwòŋ wi kinwaakə. Ə lə dəŋ yəəŋ ye Kleto fə̀ bə be bbəŋ kkə dùŋ bie kimbumə ki bəne bə kimbemi, 30 yu kkə duŋ bikəllə bi gbo wiih. 31 Ə fieŋ ffɨŋ bə́ mà bieŋna ə Kiŋwaati ki Chu mə lə,

“Ə yu fɨhŋ ffɨŋ nyo kənə fie bənshe bə tili bə mahni,

bə́ buhuŋ bəə kpɛɛ,

bə́ bəfwe hlə chu mbili mwi.”

32 Fieŋ fidi fie fi nimi ə yo ni mə ffɨŋ fi kò gbaaŋ, ŋŋəŋ ŋkwo ŋgwəŋ lə, fi yɔɔ ki Kleto bə kimbumə ki bəne bə kimbemi. 33 Maa ye ŋkaani lə n'yɔ̄ɔ nəni, mbɛɛ mənhliŋ ə bəŋ mə kənə bənleki kpɛɛ ye i lêki lə gbo wiih, kpɛ ŋəŋ dəŋ lə yee i nə̄ kinyohi bə nyimi.