Ɛfɛshu 4

Yee bəne bə Kleto dūŋh mbuhuŋ

Nəni, mi Pwɔɔ nnu ndùŋ nu mbɛɛ ə chəŋ munfwa mə yu Baba Jisho, nnōŋ bəŋ bu noŋnə lə yee bə dūŋ kinduŋh kkɨŋ ki wuna kkɨŋ Chu mà diila bəŋ lə bə duŋ ə ki mə. 2 Yee bə bwɔ̂kwe, bə dùŋ shiiiŋ, bə kwàa tɔ́ŋ. Yee bə jə̂ mbɛɛ mənhliŋ ye i dùŋ lə ə kinleki mə. 3 Yee bə jû gbaaŋ bənduŋ kwaa mbuhuŋ ə Fiana Wɛɛŋ mə nnu i bwò bə ki ə bəŋ mə ye bə duŋ lə ə kindunshiiŋ kkɨŋ ki bùhuŋ bəne. 4 Gbo wi bəne bə kimbemi duŋ mwe, Fiana Wɛɛŋ duŋ mwi. Ə duŋ dəŋ yəəŋ ye fieŋ ffɨŋ Chu mà chee be lə yee kkə kēe fwi ə fi go dùŋ dəŋ fimwi. 5 Baba dùŋ kwaa mwi, kimbemi dùŋ dəŋ mwe, n'yii nnu bə́ yii yo bəne ə njɔ dùŋ dəŋ mwi. 6 Chu dùŋ kwaa mwi nnu i dùŋ Baba ya bənhliŋ. I dùŋ ə bieŋ binhliŋ bəŋ, i nɨ̀ŋ kah ə be mə bənhliŋ, i dūŋ dəŋ ə be mə bənhliŋ. 7 Fi duŋ dəŋ lə Kleto nəə nnə bə mbɛɛ mwi mwi bə be bə̄lə kinfɛhiŋ ki nnə liih bə mbɛɛ yo. 8 Ə fieŋ ffɨŋ bə́ bieŋna ə Kiŋwaati ki Chu mə lə,

“Bwɔɔ nnu i mà biŋ gəŋ buh,

i mà fəə bəne bbəŋ i mà kwo yee bə́ bə̄lə wu.

I mà nəə nnə́ bə bəne.”

9 Bən'yɔɔ lə, “I mà biŋna gəŋ buh” duŋ lə laha lə? Fi nyìi lə i mà bwɔɔ gəŋ dəŋ ə shishɔ kwe.^ª 10 Nəni, wu nnu i mà bwɔ yo ə shishɔ mə, ə kwaa wu dəŋ nnu i mà biŋ kah buuli linhliŋ gəŋ buh, fo bidɔhɔ binhliŋ lə duŋ bi yiila bə wu. 11 Ə wu dəŋ nnu i mà nə bəne nnə́. I mà nə bədi bbəŋ bə́ lə yee bə́ dūŋ bəne biih bə faŋnə, i nə bədi bbəŋ bə́ lə yee bə́ yɔ̄ɔ bieŋ bbɨŋ bə́ wò Chu yɔ̀ɔ, bədi bbəŋ bə́ lə yee bə jāa bə dòntə hlɨŋ nwaa Chu, bədi fwòŋ kimbumə ki bəne bə kimbemi baa keeh dəŋ bəne. 12 I mà nə nnə́ ŋəŋ bəmbwɛɛ bəne bbəŋ bə́ dùŋ bə Chu mu, ə bə́ wunə bbəŋ bə́ lə yee bə́ nɨ̄ŋ nimi liih, wɛɛ gbo wi Kleto wwuŋ wi dùŋ kimbumə ki bəne bə kimbemi, 13 gəŋ bwii bwɔɔ nnu kkə yáa kkə dūŋ mbɛɛ mwi ə kimbemi kiaa mə bə ə fieŋ ffɨŋ kkə kə̀lə ki Ŋwa Nchu. Ə kkə dùŋ nəni, ə fi fə ə kkə ta wunə gəŋ kpee həŋgbɔŋ, ə yee kkə dūŋ dəŋ ye Kleto dùŋ lə kiɛkiɛ. 14 Nəni, ə kkə nakə baa lə duŋ dəŋ ye bwɔni bə wɛ lə, bbəŋ dɨŋ bikeehnə bilaha kàh bi fìinə bə bə́, bə́ gə̀ŋ fwi, bə́ chù dɨŋ ye fieŋ ffɨŋ fwee fɨ̀ɨŋkə lə bə fi. Kkə baa lə duŋ dəŋ ye bəne bbəŋ bəne bbəŋ bə wɛɛnə bə́ fihi bə́ bə yó yi kaalənə yyɨŋ bə́ bwɛ̀ɛ kə. 15 Kkə kənə bən'yɔɔ ŋkwo ya ə duŋ kichɛɛŋ ə kinleki mə, kkə kò ə jé yinhliŋ mə bəmbwo duŋ ye Kleto nnu i duŋ yo kwoo kiaa. 16 Ə wu nnu i fə̀ bikəllə bi gbo wiih winhliŋ bbɨŋ bi buma buhuŋ ə wu go yee bi kò, bi wɛ̀ɛ gbo wiih ə kinleki mə, ye kəllə nɨŋ li ki nimi kidi kəllə nɨŋ li ki nimi kinwaa.

Fwɔ wiko bə wifwɔ

17 Fidiɛɛ, ə yii li Baba bəŋ, ŋkiɛɛ lə mbaa n'yɔ̄ɔ nchù bəŋ lə bə kə baa lə duŋ ye bəne bbəŋ bə́ nɨhŋ Chu kə. Munhlenə mubə dūŋ kwaa munya. 18 Bufe bubə dùŋ bu jɨbə. Bə́ dùŋ je nyɛɛkə ə kinduŋh kkɨŋ Chu nyìi mə, yu bə́ nɨhŋ Chu ə nɨhŋ mə, ə duŋ yu bə́ tà bikuu. 19 Bə́ dùŋ nə bə giaali kə. Bə́ yiila bikuu bibə ə nyɛninə ki kiwaali mə, go ŋəbə shì kwaa bənfə dɨŋ bieŋ bi nyɛninə binhliŋ.

20 Fɨhŋ lə fieŋ ffɨŋ bə́ mà laanə bəŋ ki Kleto kə. 21 Nhle lə bə mà woo kiih, bə́ keeh'la kaa bəŋ bbəŋ bə duŋ bie mbuhuŋ bə wu bə kichɛɛŋ ki Jisho. 22 Bə fwoo gbo wiko wwuŋ bə màa bə dūŋ we bə wi ə kinduŋh kiko mə, wwuŋ wi beela yu bieŋ bi nyɛninə bbɨŋ bə màa bə fə̄. 23 Bə gaanə munhlenə mweeŋ yee mwi dūŋ munfwɔ. 24 Bə lee ə duŋ gbo wifwɔ ə bəŋ go, wwuŋ Chu fəə wi bù wu. Wuhŋ lə gbo wi kinduŋh kkɨŋ ki dùŋ kichɛɛŋ, kintiiŋ bə kiwɛɛŋ.

25 Fi hlə yee fi dūŋ lə, bə tukwaŋ ə yo kaalənə go, yee mbɛɛ yɔ̄ɔ ə duŋ kichɛɛŋ bə maani yu be bənhliŋ duŋ bikəllə bi mbili mwi. 26 Ə mbɛɛ fwoo lo, i jə bwɔɔ lə i kə jaa fə yiwaha kə. I kə chiee lə kitaŋ chɨŋ i kaani i fwōo lo kə. 27 I kə nəə je lə fiŋkwini lɛɛ mə kə. 28 Ə mbɛɛ duŋ nnu i yi buyi, i tukwaŋ ə bwi go yee i nɨ̄ŋ ə duŋ nimi linwaa bə kwáŋ ŋiih, fo mə kənə fieŋ ffɨŋ duŋ ə yee i chɨ̄nə dəŋ bəne bənjɨnənə mu. 29 Yee bə jə̂ bwɔɔ lə die yi nshwaamə kə yee yi fū ə bəŋ jə́ kə. Yee mbɛɛ yɔ̂ɔ ə duŋ fieŋ finwaa ffɨŋ duŋ ə fi wɛɛ bəne bə fieŋ ffɨŋ bə́ lèki, fo die ye lə yee i bwō ə duŋ bə mbɨŋ bə bəne bbəŋ bə́ wò. 30 Bə kə yee bə fə̄ fieŋ ffɨŋ Fiana Wɛɛŋ Chu lə hlaŋ kə. Fiana nu duŋ kidahŋ ki Chu bə bəŋ bənyii lə ə wu nnu i kənə bəŋ, butuu bwe yá bwo wunə ə i kaŋnə yah bəŋ ə ŋgə kwáŋ. 31 Bə lɛɛ tələ tɔ́ŋ ŋə nfweenə bə tɔ́ŋ ŋənlo maa tɔ́ŋ ŋənshi maa bikpənini maa bəmbihi yíi ŋə bəne maa tɔ́ŋ ŋəŋ'waha. 32 Yee bə kə̄nə ə duŋ fwɔ winwaa bə tɔ́ŋ ŋənwaa ə mbɛɛ go ə mbɛɛ go. Ə mbɛɛ fə yiwaha bə mbɛɛ, i laamə nə wu dəŋ yəəŋ ye Chu mà kah lə ə Kleto mə laamə nə yíwaha yeeŋ.