Ɛfɛshu 3

Pwɔɔ duŋ mbɛɛ keehnə bəne bbəŋ bə́ dùŋ kə duŋ nə Bəjuu

Ye Chu fəə lə ba bieŋ bɨhŋ bə bəŋ nəni, nhlə n'yee nchēe Chu bə bəŋ. Mi Pwɔɔ nduŋ ə chəŋ munfwa mə yu hlɨŋ nni duŋ ki Jisho Kleto. Nnɨŋ munfwa muhŋ nəni yu bəŋ bəne bbəŋ bə dùŋ kə duŋ nə Bəjuu. 2 Nhle lə bə woo ye Chu mà bwaa mi nə nimi lə n'yɔ̀ɔ ki tɔŋ linwaa liih bə bəŋ. 3 Fieŋ fimbini fɨhŋ duŋ ffɨŋ fi mà duŋna ə nələ mə Chu wɛ díi ŋəŋŋ ŋŋəŋ ə fi go. Mbieŋna ki fi chɛɛ bə bəŋ. 4 Ə bə chee, ə bə hlə kələ fieŋ ffɨŋ ŋkələ ki finələnə ffɨŋ fi dùŋ ki Kleto. 5 Ə mà duŋ fwii fwii Chu mà kə fəə lə ŋkáani yi bəne ə bwɔɔ yo bəŋ kələ finələnə fie kə. Fidiɛɛ Fiana Wɛɛŋ nyiila bə bəne bə faŋnə bəwɛɛŋ bə Jisho bəhŋ maa bə bəne bbəŋ bə́ dòntə hlɨŋ Chu, bə́ kə̀lə. 6 Fieŋ finələnə fɨhŋ duŋ lə bəne bbəŋ bə́ dùŋ kə duŋ nə Bəjuu duŋ Chu nəə dəŋ bə́ bishələ bɨhŋ bbɨŋ i mà kili bə bəne biih. Bə duŋ mbili mwi bə bə́, ŋkaachi nnu Chu mà kaachi yo bə Bəjuu yu Jisho Kleto duŋ dəŋ bə bə́ kah ə hlɨŋ nwaa nni bə́ bema ye mə.

7 Chu mà fəə mi lə n'yee ndūŋ mbɛɛ nimi hlɨŋ nwaa ni. Nimi llɨŋ mà duŋ nnə llɨŋ i mà nəə bə mi yu tɔŋ liih linwaa. I mà jəə muŋga mwii nɨŋ bə mwi ə mi go bənnə nimi lɨhŋ bə mi lə n'yee nnɨ̄ŋ. 8 Ŋkə ŋwunə dəŋ mbɛɛ tənə dududu ə kintu ki bəne bənhliŋ mə bbəŋ bə́ dūŋ bə Chu kə. Kwaalə Chu mà nyii kwaa tɔŋ liih linwaa bə mi nə nimi lɨhŋ lə ŋgəŋ n'yee ndōntə hlɨŋ nwaa ni ki kiŋkuntaŋ ki Kleto nnu i dùŋ kə kənə mantanə bə bəne bbəŋ bə́ dùŋ kə duŋ nə Bəjuu. 9 Fi mà duŋ lə fo bəne bənhliŋ lə kələ wɛɛŋ kindɔ chi ki fieŋ finələnə ffɨŋ Chu nnu i mà fə yo bieŋ binhliŋ màa i nə̄lə bigoŋ bə bigoŋ. 10 Ndɔ chi nu mà duŋ lə ə yá bwo duŋ ə bwɔɔ fidiɛɛ nu bəŋ, ə Chu kah ə kimbumə ki bəne bə kimbemi mə, fə bənchinda bə bəfiana bbəŋ bə́ kə̀nə múŋga munhlaanə bidɔhɔ bi buh, ŋəŋ bufe bu Chu bbuŋ bu dùŋ ə jé mə chili chili. 11 I mà fə nəni bələ ye i mà bwɛɛ chi həmɛɛ. I fəə fieŋ fɨhŋ kah ə Kleto Jisho Baba ya mə. 12 Ə yu Kleto nnu kkə kənə je lə yee kkə bwō baha ə Chu go kə lɔɔ kə, ləkə naamə yu tɔŋ llɨŋ kkə yìi le ə wu mə. 13 Ye fi duŋ lə nəni, nhlə n'yee ŋkwī bəŋ kwáŋ lə biwɛɛ kə kpee bəŋ yu ŋgə nnu n'yu ŋ'wō nu yu bəŋ kə. Bə yá yi wo njənjə yo.

Pwɔɔ baa chee Chu bə bəne bə Ɛfɛshu

14 Ə yu bieŋ bɨhŋ bbɨŋ mbɛŋ núh ə Tah ya fwi, 15 nnu yíi ŋə bichəŋ binhliŋ bi buh maa bi kwe fù ə wu kwáŋ. 16 Mbɛŋ núh nnòŋ lə, bələ kiŋkuntaŋ kiih kkɨŋ ki dùŋ gbaaŋ, i nəə bəŋ muŋgeni kah ə Fiana wi mə, mwi fə̀ tɔ́ŋ ŋieeŋ tà. 17 Nəni, ə Kleto hlə yee i dūŋh ə tɔ́ŋ ŋieeŋ mə ye bə yiilə tɔ́ŋ ə wu mə. Nchēe Chu dəŋ lə yee kinleki dūŋ ə bəŋ mə, ki fə̀ bə tà gɛŋ ye tiɛɛ bə ye chəŋ nni bə́ wɛɛla ə kichili kintaabə bəŋ, 18 fo bəŋ bə bəne bənhliŋ bbəŋ bə́ dùŋ bə Chu lə yee bə́ kə̄nə bufe bbuŋ duŋ ə bə kələ kinleki ki Kleto. Kinleki kiih kɨhŋ duŋ kiŋgbɔɔŋkɔ gbaaŋ, ki kə̀nə bude bə kibəŋ gbaaŋ, ki duuŋ gbaaŋ. 19 Nchēe Chu lə duŋ ə bə kələ kinleki kiih kkɨŋ ki kàh bəne bəŋkələ, fo bə lə yee bə dūŋh bə yiila bə fieŋ ffɨŋ Chu duŋ ə fi mə finhliŋ. 20 Kkə hlə yee kkə kōhi Chu. Ə wu nnu i fə̀ fieŋ finhliŋ bə muŋga mwii mmuŋ mu nɨ̀ŋ ə be mə. Ə duŋ ə i fə kah ye kkə bīi lə ləkə ye kkə hlè lə. 21 Yee kiŋkohi dūŋ bə wu yu kimbumə ki bəne bə kimbemi maa yu Jisho Kleto bwɔɔ mənhliŋ kə kaa. Yee fi Dûŋ lə.