Ɛfɛshu 2

Chu mà buhaŋ be bə Kleto fwoo ə kpe mə

Ə mà duŋ bwɔɔ nnu fwii, bə dùŋ bəne bbəŋ bə kpee ə fiana mə yu bəŋkɨnə bə Chu bbəŋ bə màa bə bwūŋ bə yíwaha, 2 bbəŋ bə màa bə dùhŋ bə fə̀. Bə màa bə dūŋh bə bə̀lə ə duŋ je nni bəne bə mbiŋ nu duŋ ye ə yi mə, baa bələ dəŋ ŋkɨŋ muŋga ə fwee mə. Ə wu fiana yo nnu i nɨ̀ŋ fidiɛɛ bə bəne bbəŋ bə́ tà bikuu bə Chu. 3 Ə lə dəŋ ye kkə màa kkə hlāa kkə dùhŋ. Kkə màa kkə dūŋh kkə fə̀ bieŋ bbɨŋ gbo wi fwinə kìɛɛ, kkə bə̀lə bieŋ bbɨŋ nyaŋ ni go bə munhlenə mwaa kìɛɛ lə yee kkə fə̀. Be ye bəne bəko, kkə mà duŋna ye bəne bbəŋ tɔŋ fwèe Chu bə bə́, dəŋ yəəŋ ye mbɛɛ ŋkee mənhliŋ duŋ lə. 4 Kwaalə Chu nnu i fiili yo bə hlɨŋ yi kwonə mà leka be gbaaŋ, 5 i buhaŋ be bə Kleto fwoo be ə kpe mə maa ye kkə màa kkə kpē lə yu bəŋkɨnə bə Chu bbəŋ kkə màa kkə bwūŋ. Chu mà fwoo bəŋ ə duŋ yu tɔŋ liih linwaa. 6 Ye i mà buhuŋ lə be bə Kleto Jisho fwoo ə kpe mə nəni, i hlə kohi be bihiŋ chi be bə wu ə kitɨŋ ki buh mə. 7 I mà fə nəni, fo ə yá bwo chu bwɔɔ nnu i ya bwo yo, ə i nyii kinleki kiih kiŋkuntaŋ kkɨŋ dùŋ ə mbɛɛ nakə fɛhiŋ kə. Tɔŋ liih linwaa lɨhŋ duŋ i nyiila li bə be ə kinleki kiih mə kah ə Kleto Jisho mə. 8 Yee bə kə̂lə lə Chu mà fwoo bəŋ ə duŋ yu tɔŋ liih linwaa llɨŋ i mà nyii bə bəŋ kah ə tɔŋ llɨŋ bə mà yii le ə Kleto mə. Fɨhŋ lə nfə weŋ kə. Ə nnə li Chu. 9 Ə yu nimi lidi llɨŋ mbɛɛ mà nɨŋ hlə bənə kə, fo mbɛɛ ju lə nakə duŋ nə nnu mə lə ja yee i hlə̄ə kə. 10 Fieŋ ffɨŋ fi dùŋ, duŋ lə, kkə duŋ ye kkə duŋ lə fidiɛɛ nəni, ə duŋ Chu nnu i nɨŋna bə kwáŋ ŋiih. I buhaŋ be bə Kleto Jisho fə yee kkə dūŋ bəne bəfwɔ, fo kkə lə yee kkə nɨ̄ŋ nimi linwaa llɨŋ i mà bwɛɛla le chi ə kaani fwoo lə ə li llɨŋ kkə lə yee kkə dūŋh kkə nɨ̀ŋ.

Bichəŋ bi bifwe choo mbɛɛ mwi ə Kleto mə

11 Bəŋ bəne bbəŋ bə dùŋ kə duŋ nə kichəŋ ki Bəjuu, bə hle ŋoo fieŋ ffɨŋ fi mà hlaa duŋ fwii. Bəjuu bbəŋ bə́ chèe bie go ŋəbə lə bə́ dùŋ bəne bbəŋ bə́ nyieŋna jó yibə, bə́ màa bə́ chēe bəŋ lə bə duŋ bəne bbəŋ bə́ dùŋ bikpaa bintuulə, ə duŋ nyieŋ jo nu duŋ fieŋ ffɨŋ bə́ fə kwaa ə mbɛɛ go bə kwáŋ. 12 Bə hle ŋoo lə, ə bwɔɔ yo bəŋ mà duŋ bə kə kənə fieŋ fi fənə bə Kleto kə. Bə mà kə duŋ nə ə kichəŋ ki bəne bə Chu mə bbəŋ bə́ dùŋ bə Ishlael kə. Bə mà kə kənə fieŋ bənfə bə tɨmə ki ŋkaachi nnu Chu mà nə bə bə́ kə. Bə dùŋ kwaa ŋkwo weŋ yaŋ kwe kə kənə fieŋ fidi ffɨŋ bə kèe fwi ə fi go kə, kə kə̀lə dəŋ Chu kə. 13 Kwaalə, fidiɛɛ ye bə buhuŋ lə gbo bəə Kleto Jisho, bəŋ bbəŋ bə màa bə hlaa dūŋ bie je nyɛɛkə ə Chu go, i jəə bwo bə bəŋ baha baha ə wu go kah ə ŋgɔŋ mə Kleto mə. 14 Ə duŋ wu Kleto kibɛɛ nnu i bwoo bə kindunshiiŋ ə be go. I fəə Bəjuu bə bəne bbəŋ bə́ dùŋ kə duŋ nə Bəjuu choo mbɛɛ mwi. I bwoo tələ kimbwɔɔ ki kiŋga kkɨŋ ki mà duŋ ki loh kkɨŋ ki màa ki bà bənduŋ be hənte. 15 I nəə gbo wiih kpe bənləhə laa ŋkɨnə maa bieŋ bbɨŋ ŋkɨnə yɔ̀ɔ lə yee bə́ fə̄ bənduŋ bəne bə Chu. I fəə nəni fo mə lə buhuŋ mbɛɛ mənhliŋ ə wu go, ə bə́ chu mbɛɛ fwɔ mwi ə dɔhɔ ki bəne bə bəfwe mə. Ye i fələ nəni, mə hlə bwo bə kindunshiiŋ. 16 Kpe yi ə kiŋgwa go mà buhaŋ bichəŋ bie bifwe ə Chu go bi chu ə mbili mwi go, hlə jii loh libə ə kiŋgwa go, li ka. 17 I mà bwoo dontə hlɨŋ nni i bwò bə kindunshiiŋ bə bəŋ bbəŋ bə́ mà duŋ bie je nyɛɛkə, dontə dəŋ hlɨŋ nih bə bəne bbəŋ bə́ dùŋ baha baha. 18 Ə fə wu be bənhliŋ hlə kənə je bəmbwo ə Tah ya go kah ə Fiana mwi mə. 19 Nəni, bə baalə duŋ nfúuntə kə ləkə bəne bbəŋ bə́ kah bu kanə. Bə duŋ bwɔni bə kwili bbəŋ bə́ dùŋ bə Chu, bə dùŋ dəŋ bəne bə chəŋ bə Chu. 20 Chəŋ ni duŋ nni bə wɛɛla yi ə kichili kkɨŋ ki dùŋ bəne bə faŋnə bə Jisho bə bəne bbəŋ bə́ yɔ̀ɔ hlɨŋ Chu, Kleto Jisho kibɛɛ duŋ tə li hənchi chəŋ. 21 Ə wu go nnu chəŋ ye mənhliŋ buma yee i kō bəmbwo chu chəŋ wɛɛŋ Baba. 22 Bəŋ dəŋ duŋ bə́ buhaŋ bəŋ yee bə́ wɛ̄ɛ ə Kleto go, bəmbwo duŋ dɔhɔ kkɨŋ Chu duhŋ həmə ə Fiana wi mə.