Ɛfɛshu 1

Kiŋwaati kkɨŋ Pwɔɔ mà bieŋ bə kimbumə ki

Ɛfɛshu

Ə mi Pwɔɔ, mbɛɛ faŋnə Kleto Jisho, ə kinleki ki Chu mə. Mbīeŋ kiŋwaati kɨhŋ bə bəne bbəŋ bə́ dùŋ bə Chu bə Ɛfɛshu, bbəŋ bə́ lèmi ntakə ə Kleto Jisho mə.

2 Tah Chu ya bə Baba Jisho Kleto nyii tɔŋ linwaa bə bəŋ, baa nə bəŋ tɔ́ŋ ŋəndə.

Kinhləmə kkɨŋ ki chɨ̀nə bəfiana bə bəne bbəŋ bə́ buma bə Kleto

3 Yee kindohi dûŋ bə Chu nnu i dùŋ Chu baa duŋ dəŋ Che Baba ya Jisho Kleto. I koha be bə kinhləmə kinhliŋ ki mbiŋ nnu buh mə, kkɨŋ ki chɨ̀nə bəfiana biaa ye kkə buma lə ə Kleto mə. 4 Chu mà chu bwo duŋ lə i yu fə mbiŋ nu mà duŋ mə hə shaala be lə kkə yá bwo bumə bə Kleto, yee kkə chāa wɛɛŋ, gbenə hləŋ ə wu fwi. Ə kinleki kiih mə, 5 i mà bwɛɛla lə mə bwo jə be lə kkə yá duŋ bwɔni biih kah ə Jisho Kleto mə. I mà fə nəni, bələ fieŋ ffɨŋ fi nwaa wu ffɨŋ i kìɛɛ lə fi yá bwo duŋ. 6 Fi mà duŋ nəni, fo kiŋkohi lə yee ki gə̄ŋ bə wu yu tɔŋ liih linwaa gbaaŋ. I mà nyiila bə be nya kah ə Ŋiaani mə nnu i dùŋ yo tɔŋ liih. 7 I mà yaah be ə kwáŋ ŋə yiwaha mə ə duŋ bə ŋgɔŋ mə Ŋiaani nu. Fi duŋ lə, i mà laama yíwaha yaa bələ kinleki kiih kkɨŋ ki kò gbaaŋ kkɨŋ wu Chu mà nyiila bə be. 8 Bwɔɔ nnu i mà kiɛɛ lə i nyii li, i shoo ə nshoo mə ə be go. I mà fə nəni bə bufe bwii bunhliŋ maa bə kinhle kiih kinhliŋ. 9 Chu fəə dəŋ kkə kələ fieŋ ffɨŋ i hlè ffɨŋ fi mà hlaa duŋ ə nələ mə. I mà fə bələ fieŋ ffɨŋ fi nwaa wu ye i mà bwɛɛ bəmbwo fə kah ə Kleto mə. 10 I mà bwɛɛla chi lə bwɔɔ nnu bwɔɔ yá bwo wunə ba, ə i buhuŋ bieŋ binhliŋ bi buh, ləkə bi kwe, chi ə Jisho kwe yee i dūŋ kwoo. 11 Chu mà shaala dəŋ be lə yee kkə dūŋ bəne biih ə Kleto mə. I mà shaa ye i mà bwɛɛlə ə kaani bələ kinhle kiih dəŋ yəəŋ ye i bwò lə i fə̀ bieŋ biih binhliŋ bələ ndɔ chi wi ye i lèki lə. 12 Fi mà duŋ nəni, fo be bbəŋ kkə mà duŋ bie bəne bə fwii bən'yii bufe ə Kleto mə, yáa kkə dūŋ kinduŋh kkɨŋ ki fə̀ kiŋkuntaŋ ki Chu nyìee, kiŋkohi gə̀ŋ bə wu. 13 Bə mà buma dəŋ ə Kleto mə bwɔɔ nnu bə mà wo die kichɛɛŋ nni i dùŋ hlɨŋ nwaa nni i mà bwoo bə kiŋwuhuŋ ə bəŋ mə. Ye bə mà wolə nəni, hlə yii tɔ́ŋ ə Kleto mə, Chu fə kinyii kiih wɛɛŋ ə bəŋ go ə duŋ Fiana Wɛɛŋ nnu i mà kaachi bəne mu. 14 Fiana Wɛɛŋ nu lə kwoo ki bishələ bbɨŋ kkə yá bwo kənə. Kkə yá kənə bwɔɔ nnu Chu yá kaanə yah bəne bbəŋ bə́ dùŋ biih ə kwáŋ ŋə yiwaha mə. Nəni, ə kiŋkuntaŋ kiih yee ki nyīee, kiŋkohi gə̀ŋ bə wu.

Pwɔɔ chee Chu bə bəne bə Ɛfɛshu

15 Ŋ'woo ki tɔ́ŋ ŋŋəŋ bə yiila ə Baba Jisho mə, maa kinleki kkɨŋ bə kə̀nə bə bəne bənhliŋ bbəŋ bə́ dùŋ bə Chu. Ə fieŋ fi fənə, 16 bwɔɔ nnu nchèe Chu nhlè bəŋ. Ŋkə nhlaa lə wii bənə kimbaafɛɛ bə Chu yu bəŋ ə cheenə kɨŋŋ mə kə. 17 Nnòŋ lə Chu nnu i dùŋ yo Baba ya Jisho Kleto, Chu nnu i dùŋ yo Che kiŋkuntaŋ, i nə bəŋ Fiana nnu mə lə nə bəŋ bufe, wɛ díi ŋieeŋ bəŋkələ wu kinwaa. 18 Nchèe Chu dəŋ lə i wɛ bufe bweeŋ bəŋkələ fieŋ ffɨŋ bə kèe fwi ə fi go, ffɨŋ i mà cheela bəŋ yu fi, bəŋkələ dəŋ kiŋkuntaŋ ki kiŋaŋ ki bishələ bi bəne bbəŋ bə́ dùŋ bə Chu. 19 Mbaa nchēe lə Chu wɛ bufe bweeŋ bəŋkələ muŋga mwii mmuŋ mu kah múŋga munhliŋ. Ə muŋga muŋkuntaŋ muhŋ mwe i nɨ̀ŋ bə mwi ə be mə bbəŋ kkə yiila bie tɔŋ ə wu mə. 20 Ə muŋga muhŋ mwe i mà nɨŋna bə mwi fwoo Kleto ə kpe mə, bihiŋ chi wu ə bweenə kiih ki diee mə ə kitɨŋ ki buh mə. 21 Kleto ko gbaaŋ kah bieŋ bbɨŋ bi hlàah buh binhliŋ maa muŋkɨŋ maa muŋgeni maa muŋga maa kiŋkuntaŋ kinhliŋ. I kənə dəŋ yii llɨŋ li kò kah maa yíi ŋənhliŋ ŋŋəŋ bə́ chèe bəne mu. I duŋ nə nəni ə bwɔɔ nnu mə kwaa kə. Mə yáa i dūŋ kwaa lə ə bwɔɔ nnu i yá bwo mə. 22 Chu chiee bieŋ binhliŋ ə wu kwe, baa chi wu lə yee i dūŋ kwoo ki bieŋ binhliŋ yu kimbumə ki bəne bə kimbemi mə. 23 Kimbumə ki bəne bə kimbemi kɨhŋ lə gbo wi Kleto. Kleto hlə duŋ nnu i yiila wunə yu kimbumə kɨhŋ, ə wu nnu i fə̀ bieŋ binhliŋ bi yìi wunə ə jé yinhliŋ mə.