Ɛfɛshu 6

Keehnə kkɨŋ ki gə̀ŋ bə bwɔni maa bəche bwɔni

Bwɔni, yee bə wō bəchwa bə bəmwah bieeŋ ə je Baba mə, yu fɨhŋ lə fieŋ fintiiŋ ffɨŋ bwɔni duŋ lə yee bə́ fə̄. 2 Ŋkɨnə Chu yo yɔ̀ɔ lə,

“Yee wə nə̂ kinyohi bə bəchwa bə mwah,”

ə ŋkɨnə nu fwii nnu i dùŋ bə ŋkaachi yiinə ə wu go. 3 Ŋkaachi nu duŋ lə,

“Mbɛɛ nnu i chì ŋkɨnə nu mə lə yee i wō njənjə,

bwo kənə kinduŋh ki ndiee yaŋ kwe.”

4 Bəche bwɔni, bə kə yee bə fə̂ bieŋ bbɨŋ tɔ́ŋ lə yee ŋə lō bwɔni bieeŋ kə. Yee bə kôo bə́ bu koonə, bə́ kò ə kinlaanə bə keehnə ki Baba mə.

Keehnə kkɨŋ ki gə̀ŋ bə bənfwa maa bə bəne bbəŋ bə́ kə̀nə bə́

5 Bəŋ bbəŋ bə dùŋ bənfwa, yee bə wô bə bəche bikuu bbəŋ bə́ kə̀nə bəŋ yaŋ kwe, bənlɔ maa bəmbwɔkwe bə bə́. Yee bə wô bə bə́ bə tɔ́ŋ ŋieeŋ ŋənhliŋ ye bə wòlə Kleto. 6 Bə kə yee bə fə̂ nəni kwaa bwɔɔ nnu díi ŋəbə duŋ ə bəŋ go kə, fo gbo lə yee wi nūaa bə́ bə bəŋ kə. Yee bə fə̂ ə duŋ ye bənfwa bə Kleto lə bbəŋ bə́ fə̀ ə duŋ fieŋ ffɨŋ Chu kìɛɛ bə tɔ́ŋ ŋəbə ŋənhliŋ. 7 Yee bə nɨ̂ŋ bə bə́, bə nɨ̀ŋ bə kintɨŋ yəəŋ ye bə nɨ̀ŋ lə ə duŋ bə Baba, ə kə duŋ nə yu mbɛɛ ŋkee kə. 8 Yee bə nɨ̂ŋ bə hlè lə fieŋ finwaa finhliŋ ffɨŋ mbɛɛ fə̀, duŋ i bənə dəŋ fieŋ finwaa ə Baba kwáŋ, maa ə duŋ nfwa lee, ləkə nfwa kə lee.

9 Bəŋ bəne bbəŋ bə kə̀nə bənfwa, yee bə́ kə̂nə dəŋ bə́ ə jé yinwaa mə, bə kə yee bə lɔ̂hiŋ bə́ kə. Yee bə hlê lə bəə bə́ bənhliŋ kənə che kwoo mwi ə buh, bə wu kichili hləŋ kə.

Bieŋ bi ntɨmə bbɨŋ Chu nəə bə be

10 N'yɔ̄ɔ bə bəŋ lə, yee bə lêmi ntakə ə Baba go, yee bə yîimə ə duŋ ə muŋga mwii muntaabə go. 11 Bə dɔ̀hiŋ bieŋ bi ntɨmə binhliŋ ə bəŋ go bbɨŋ Chu nəə bəŋ, fo duŋ ə bə lemi tɨmə ntɨmə bə dɛbulu ə jé yinhliŋ yyɨŋ i wɛ̀ɛnə ə yí mə. 12 Yee bə kə̂lə lə kkə ju lə ə duŋ bə bəne bəŋkee kə. Kkə jù ə duŋ bə bieŋ binhliŋ bbɨŋ bi kə̀nə múŋga bə kiŋkuntaŋ, bbɨŋ bi hlàah ə mbiŋ jɨbə nu mə. Bieŋ bbɨŋ dùŋ bəfiana bəwaha bənhliŋ bbəŋ bə́ dùŋ ə bidɔhɔ bi buh mə. 13 Nəni bə dɔhiŋ bieŋ bi ntɨmə binhliŋ bbɨŋ Chu nəə bəŋ, fo ə lə bwo duŋ ə bwɔɔ joo ŋəŋ'waha ŋie mə, ə bə lemi ntakə ye bə yá duŋ bə hə fəə kaa fieŋ finhliŋ bəmbwo lemi ntakə. 14 Nəni, yee bə lêmi dəŋ ntakə. Bə jə kichɛɛŋ yee ki dûŋ ye kicha kkɨŋ bə kwaala chi, jə fwɔ wi wɛɛŋ yee wi dūŋ ye kinchaah kkɨŋ bə kəəla bəkɔŋ bieeŋ mu. 15 Bə bwɛɛ gbo bəndontə hlɨŋ nwaa nni mə bwo bə kindunshiiŋ ə bəne go, ə fɨhŋ yee fi dūŋ ye bikpa bi ntɨmə bbɨŋ bə leela ə wuh ŋieeŋ go. 16 Bənyiinə mu, bə yii kwaa tɔ́ŋ ə duŋ ə Kleto mə, ə fɨhŋ yee fi dūŋ ye ŋkɛ ntɨmə nnu bə kəna ə kwáŋ. Ə wu nnu bə ləə bə bâŋ bihlɔ bi mbɛɛ yiwaha nnu i lɛ̂ɛ yo bwii dô mu. 17 Bə jə dəŋ kinfukwoo kkɨŋ Chu fwoola bəŋ bə ki, ki duŋ ye kiŋkɔkɔ ki ntɨmə kkɨŋ bə bɛŋna ə fi, baa jə dəŋ mbieelə ntɨmə nnu Fiana Wɛɛŋ nə̀ ə duŋ die Chu.

18 Ə fieŋ finhliŋ mə, yee bə chêe Chu bwɔɔ mənhliŋ bələ ye Fiana Wɛɛŋ nyìi lə. Bwɔɔ nnu bə chèe Chu, yee bə bîi fieŋ finhliŋ ffɨŋ bə kìɛɛ ə Chu kwáŋ. Ə fimbini fie bəŋ, yee bə kêe kinwaa, bə kwàa tɔ́ŋ bwɔɔ mənhliŋ bənchee Chu, bə nòŋ bə Chu bə bəne bbəŋ bə́ dùŋ bə Chu bənhliŋ. 19 Yee bə chêe Chu dəŋ bə mi, lə bwɔɔ nnu ŋ'wɛ̀ kijə kɨŋŋ bən'yɔɔ, yee Chu nə̂ mi fieŋ fi yɔɔnə, yee n'yɔ̄ɔ mbə̀lə kiyəyəŋ ki hlɨŋ nwaa Chu kə lɔɔ kə. 20 Ə hlɨŋ nih, nni ndùŋ ə fíaŋ mə yu yi ye mbɛɛ nnu i dùŋ dii li Kleto. Yee bə chêe Chu lə bwɔɔ nnu ŋkìɛɛ lə n'yee n'yɔ̄ɔ, n'yee n'yɔ̄ɔ kə kənə nɨhŋ kə.

Yo nni həŋgbɔŋ

21 Tikiku ŋgwoŋ ya tɔŋ nnu i nɨ̀ŋ dəŋ bə Baba bə tɔŋ liih linhliŋ mə lə kaanə yɔɔ bəŋ fieŋ finhliŋ kɨŋŋ, fo bə lə yee bə kə̄lə dəŋ ye ndùŋ lə, maa fieŋ ffɨŋ nfə̀. 22 Fiee fieŋ ffɨŋ nfaŋna fie wu bə bəŋ yu fi, yulahalə mə lə bwo fə ə bə kələ ye kkə dùŋ lə, baa tahi go ŋieeŋ.

23 Chu Tah ya bə Baba Jisho Kleto nə bəŋ kindunshiiŋ bə kinleki maa kimbemi. 24 Chu nyii tɔŋ liih linwaa bə mbɛɛ mənhliŋ, nnu i kə̀nə kinleki ki kə kaa ə Baba ya Jisho Kleto mə.