Galashia 5

Kleto fwoola be ə munfwa mə

Kleto mà fwoola be ə munfwa mə. I mà fwoo nəni, fo kkə lə nakə baa lə duŋ ə munfwa mu bəŋkɨnə kwe kə. Nəni yee bə lêmi ntakə. Bə kə chu baa bemi lə bə lɛɛ ə ntiɛɛ munfwa mə kə. 2 Bə wələ wo fieŋ ffɨŋ mi Pwɔɔ nlə n'yɔ̄ɔ. Ə bə bemi lə bə́ nyieŋ bəŋ jó bə hlə yee bə dūŋ ntiiŋ ə Chu fwi, kəə fieŋ ffɨŋ Kleto mà fə fie bə bəŋ duŋ nya. 3 Mbaa n'yɔ̄ɔ, nlaŋ bəŋ lə mbɛɛ mənhliŋ nnu i bema lə bə nyieŋ wu jo, yee i kə̄lə lə i kənə bənchi bəŋkɨnə bə Bəjuu bənhliŋ ye bə́ duŋ lə. 4 Bəŋ bənhliŋ bbəŋ bə kìɛɛ bie bənduŋ gbenə hləŋ ə Chu fwi yu bə chì bəŋkɨnə, yee bə kə̂lə lə bə gaa gbo bə Kleto. Bə fwoola go ŋieeŋ ə bəne bbəŋ Chu shaala mə. 5 Bə be, fieŋ ffɨŋ kkə kèe fwi ə fi go duŋ lə, Chu yá jə be ye bəne bbəŋ bə́ dùŋ ntiiŋ ə wu fwi. Fɨhŋ lə fieŋ ffɨŋ Fiana Chu nnu i nɨ̀ŋ ə be go kah ə tɔ́ŋ llɨŋ kkə yii le ə Kleto mə, fəə lə yee kkə kē. 6 Bə kələ lə ə mbɛɛ lə duŋ nnu i buhaŋ bə Kleto Jisho, maa ə duŋ lə bə nyieŋna wu jo ləkə bə́ kə nyieŋ nə dəŋ wu jo kə, kəə fimbini fie kə̀nə lə fieŋ fidi bənfə kə. Fieŋ ffɨŋ fi dùŋ fishaŋ duŋ tɔŋ llɨŋ i yii le ə Kleto mə, i nyìi ə kinleki kiih mə.

7 Bə maa bə hlaa lələ lili linwaa, ə nyəhə nnu i fə maa bə hlə wii bəmbələ kichɛɛŋ lə? 8 Dɨŋ kɨhŋ keehnə ma kə fwoo ə Chu nnu i ma dii yo bəŋ fɨhŋ fieŋ kə. 9 Bə ŋoo lə ŋgaŋga nni bə́ ba ye bəŋgba lə, “Kiko mwe bwo ki bihi biko lə?” 10 N'yìi bufe ə bəŋ mə yu Baba lə bə kə bələ fieŋ ffɨŋ bəne bədi yɔ̀ɔ kə kahiŋ ffɨŋ n'yɔ̀ɔ. Mbɛɛ nnu i hlàki yo bufe bweeŋ maa ə duŋ nyəhə lee, Chu yá lɛɛ ŋgə ə wu go. 11 Bəŋgwoŋ, ə hə duŋ lə ŋkaani ndòntə lə yee bə́ nyīeŋ bəne jó bə́ hlə duŋ ntiiŋ ə Chu fwi, ə bəne hə baa yee bə́ hlɔ̄ɔ wuh ə mi dɨŋ yulaha lə? Ə fi hə duŋ nəni ə fieŋ ffɨŋ ndòntə fɨhŋ mə lə Kleto mà kpee ə kiŋgwa go bəne wò fi bìhi bə́ biwɛɛ bu bihinə, ə fi hə baa yee fi dūŋ kə. 12 Bə bəne bbəŋ bə́ fə̀ bie lə bufe bieeŋ nyɔ̀kɔ lə yee bə́ nyīeŋ bəne jó, ŋkiɛɛ lə bə́ gəŋ fwi bə́ kaanə shwaŋ fwoo bɨ́ŋ yibə ye bu shwaanə.

13 Bəŋgwoŋ, Chu mà cheela bəŋ fo bə lə nakə baa lə duŋ ə munfwa kwe kə. Kwaalə, ye bə duŋ lə kə baa lə duŋ ə munfwa kwe kə nəni, bə kə jəə lə duŋ ə yee bə fə̄ ye nyaŋ go ŋieeŋ kiɛɛ lə kə. Yee bə nɨ̂ŋ bu nɨŋnə ə duŋ bə bəmwaa bieeŋ ə kinleki mə. 14 Yee bə fə̂ nəni yu bəŋkɨnə bənhliŋ buma ə duŋ ə mwe nu go lə,

“Yee wə lêki mbɛɛ nnu i dùhŋ ə wə tɨŋ ye wə lèki lə gbo wo.”

15 Kwaalə, ə bə ja yee bə ŋāŋa bə go ŋieeŋ ye bwí fə̀lə, mbɛɛ kiɛɛ lə i di maani, yee bə jə̂ bwɔɔ, bə kə jaa yee bə bîhi go ŋieeŋ kə.

Mbɛɛ nnu i dùhŋ ye Fiana Chu nyìi lə kə baa lə yee i fə̄ ye nyaŋ gbo wiih kìɛɛ lə kə

16 Fieŋ ffɨŋ n'yɔ̄ɔ duŋ lə, yee bə dûhŋ bə bə̀lə ə duŋ ye Fiana Chu nyìi lə bəŋ, nəni ə bə nakə baa lə yee bə fə̄ ə duŋ ye go ŋieeŋ kiɛɛlə lə yee bə fə̄ kə. 17 N'yɔ̄ɔ nəni yu fieŋ ffɨŋ nyaŋ nni go kìɛɛ gbeemə lə bə ffɨŋ Fiana Chu kìɛɛ kə. Fieŋ ffɨŋ Fiana Chu kìɛɛ ə fi ffɨŋ nyaŋ nni go kìɛɛ kə. Bieŋ bɨhŋ bifwe jənə lə kə. Fiee fieŋ ffɨŋ duŋ ə bə nakə yee bə fə̄ fieŋ ffɨŋ bə lèki kə. 18 Ə bə dùhŋ bə bə̀lə ye Fiana Chu nyìilə bəŋ, ə bə nakə baa lə duhŋ ə bəŋkɨnə kwe kə. 19 Bieŋ biwaha bbɨŋ nyaŋ nni go bà bəŋkiɛɛ, bəne jɨ̀mə lə bi kə. Ə duŋ bənla ə duŋ bəkwɛɛ, bənhle bieŋ bi kiwaali maa bə fwɔ wi nyɛninə wi kiwaali. 20 Ə baa duŋ bənchee bə bəcheh bə nya ləkə bənfo bənche, ləkə bənla bənche. Ə baa duŋ bənlo bə go ŋieeŋ, bə ŋàŋa bə go ŋieeŋ, bə luhuŋ bimi, bə kənə biwɛɛ binlo, ləkə mbɛɛ hlè ə duŋ kwaa kwoo kiih. Ə baa duŋ dəŋ bəŋga bəne maa lə mbɛɛ ga bəne kənə kiih kintu. 21 Ə duŋ dəŋ bənluhuŋ bimi, ŋwi mbihŋ chɨŋ, bəŋwi gbee kikpuŋ maa bənfə bieŋ bidi ye bɨhŋ lə. N'yu ŋkɨ̄nə bəŋ nchu bəŋ lə ye mmà nhlaalə ŋkɨ̀nə bəŋ fwii fwii lə, bəne bbəŋ bə́ fə̀ dɨŋ bɨhŋ bieŋ yá kənə dɔhɔ ə muŋkɨŋ mu Chu mə kə.

22 Kwaalə, bieŋ bbɨŋ bi bwò ə Fiana Chu go duŋ bɨhŋ, kinleki, kintɨŋ, kindunshiiŋ, tɔŋ li kwaanə, fwɔ winwaa, kinduŋh kinwaa, lemi ə kichɛɛŋ bəŋ, 23 fwɔ wi mbɛŋki, maa bənfwoŋ go ŋieeŋ. Ŋkɨnə ju hləŋkə nnu i nòo bɨhŋ bieŋ. 24 Bəne bbəŋ bə́ dùŋ bə Kleto Jisho duŋ bə́ bweena go ŋəbə bə bieŋ biwaha bbɨŋ go ŋəbə fwì ŋə kìɛɛ ə kiŋgwa ki Jisho go.

25 Ye kkə duŋ lə fidiɛɛ ə muŋgeni mu Fiana Chu mə, yee kkə fə̂ bieŋ kkə bə̀lə kwaa ye Fiana yo nyìi lə. 26 Kkə kə yee kkə wê kə. Kkə kə fəə dəŋ lə tɔŋ bee bəne bədi kə. Kkə kə yee kkə lûhuŋ bimi bə bəne bədi kə.