Yee bəne bə Chu chɨ̂nə bəne bənhliŋ
6
Bəŋgwoŋ, ə bə ja ŋəŋ lə mbɛɛ ju ə bəŋ mə gbee ə yiwaha mə, bəŋ bbəŋ bə duhŋ bie ye Fiana Chu nyìilə ju bəŋkeeh wu lə i fu ə yiwaha ye mə. Kwaalə, bwɔɔ nnu mbɛɛ kèeh yee i kêeh wɛɛɛ i jə bwɔɔ, i ya kə ja lɛɛ dəŋ ə bimɔŋnə mə gbe. 2 Yee bə chɨ̂nə bəmwaa bieeŋ bə bəŋgə bəbə. Ə bə fə nəni kəə bə bie bə chī ŋkɨnə Kleto. 3 Ə mbɛɛ ju lə jə gbo wiih lə i dùŋ fieŋ, ə duŋ i kə dùŋ nə fieŋ fidi kə, kəə i fìhi dəŋ ə duŋ gbo wiih. 4 Mbɛɛ mənhliŋ kee ŋəŋ fwɔ wiih, ŋəŋ lə i yu fə̄ yəəŋ lə. Ə duŋ lə i yu fə̄ yəəŋ, ə i hlə yee i wē bə gbo wiih. Kwaalə i kə yee i fɛ̂hiŋ gbo bə mbɛɛ ju kə. 5 Yee bə kə̂lə lə mbɛɛ mənhliŋ kənə bəntu wi ntiɛ.6 Mbɛɛ nnu i làanə mbɛɛ ju die Chu, i ga bieŋ biih binwaa binhliŋ bə mbɛɛ nnu i làanə yo wu.
7 Bə kə yee bə fîhi go ŋieeŋ. Chu dùŋ nə nfili kə. Yee bə kə̂lə lə maa fieŋ laha ffɨŋ mbɛɛ dɔ ə fi ffɨŋ i yá gba. 8 Ə mbɛɛ lə dɔ wi ŋgɔ ə duŋ fieŋ ffɨŋ nyaŋ gbo wiih kìɛɛ, kəə mə lə gba ə duŋ kwaa fieŋ ffɨŋ nyaŋ gbo wiih nə̀ ə duŋ kpe. Ə mbɛɛ dɔ wi ŋgɔ ə duŋ fieŋ ffɨŋ Fiana Chu kìɛɛ, kəə mə lə gba ə duŋ kinduŋh ki kə kaa kkɨŋ Fiana Chu nə̀. 9 Neni, kkə kə biaŋ nə bənfə bieŋ binwaa kə, yulahalə bwɔɔ ya bwo wunə ə kkə kənə bigbanə bi mu ə kkə lə nakə fɨŋnə kə. 10 Fi hlə duŋ lə, bwɔɔ mənhliŋ nnu kkə bə̀nə je, yee kkə fə̂ kwaa bieŋ binwaa bə bəne bənhliŋ gbɛtɛlɛ bə bbəŋ bə́ dùŋ bie ə kichəŋ ki bəne bə kimbemi mə.
Biyɔɔnə bi həŋgbɔŋ
11 Bə ŋəŋ ye bieeni yi kiŋwaati yɨhŋ fəŋ ye lə ŋkokə ŋkokə! Ə bieŋ mi bə kwaŋ wuŋŋ. 12 Bəne bbəŋ bə́ yə̀ə bie lə yee bə́ nyīeŋ bəŋ jó, bə́ kìɛɛ lə yee bə́ wē ə bieŋ bi nyaŋ nni gbo go. Bə́ fə̀ nəni kwaa fo bəne lə nakə bwoo yee bə́ hlɔ̄ɔ wuh ə bə́ dɨŋ yu bieŋ bbɨŋ bə́ dòntə bie lə Kleto mà kpee ə kiŋgwa go. 13 Maa bəne bbəŋ bə́ mà nyieŋ bə́ jó chì lə dəŋ bəŋkɨnə bənhliŋ kə. Kwaalə bə́ kìɛɛ kwaa lə bwɔɔ nnu bə́ nyieŋ bəŋ jó, ə yee bə́ tūu kɔŋ lə bə́ fəə fieŋ ffɨŋ bə́ kìɛɛ ə bəŋ go. 14 Kwaalə bə mi, nduŋ ə ŋkaamu kə dududu bəntuu kɔŋ ə fieŋ fidi bəŋ kə, kahiŋ diɛɛnə kɨhŋ lə Baba ya Jisho Kleto mà kpee ə kiŋgwa go. Ə kiŋgwa kɨhŋ go nnu bieŋ bi yaŋ mbiŋ nu nte kpee ga gbo bə mi, ŋga dəŋ gbo bə bi. 15 Ə mbɛɛ lə duŋ nnu bə́ nyieŋna wu jo, ləkə bə́ kə nyieŋ nə kə, kəə fimbini fie kənə lə fieŋ fidi bənfə kə. Fieŋ fishaŋ duŋ lə Chu bwɛɛ mbɛɛ yee i dūŋ mbɛɛ fwɔ. 16 Kindunshiiŋ ki Chu bə hlɨŋ yi kwonə yiih bwo ə bəne bənhliŋ go bbəŋ bə́ bə̀lə je ni, bbəŋ bə́ dùŋ bəne Bəishlael bə Chu.
17 Chɔɔ jə fidiɛɛ gəŋ fwi, mbɛɛ kə baa lə yee i nə̂ mi ŋgə kə, yulahalə biniini bbɨŋ bi dùŋ bie ə mi go nyìi lə ndùŋ mbɛɛ Jisho.
18 Bəŋgwoŋ, nchèe Chu lə Baba ya Jisho Kleto nyii tɔŋ liih linwaa bə bəfiana bieeŋ. Yee fi Dûŋ lə.