Galashia 4

Fieŋ ffɨŋ n'yɔ̄ɔ duŋ lə, ə mbɛɛ lə duŋ bəmbwo di bishələ bi tili kwaalə i kaani ŋiaŋ wɛ, i duŋ nə chili bə nfwa tili kə, maa ye ə kənə lə wu bishələ bie binhliŋ. 2 Mə lə hlaa yee i dūŋ nnu bəne bədi lə yee bə́ fwōŋ wu, bishələ bie duŋ ə kwáŋ ŋə bəne bədi mə bə́ fwòŋ bi, gəŋ bwii bwɔɔ nnu tili mà bwɛɛ yo chi. 3 Ə yəəŋ ye fi duŋ bə be. Bwɔɔ nnu kkə mà duŋ ye bwɔni bə wɛ lə, kkə dùŋ bənfwa bə bieŋ bbɨŋ bi hlàah mbiŋ nu.^ª 4 Bwɔɔ nnu bwɔɔ yo mà bwo wunə ba, Chu faŋ Ŋiaani i bwo, kpɛ bwee wu, i dùŋ dəŋ ə bəŋkɨnə kwe. 5 I mà bwo fo mə lə yah bəne bbəŋ bə́ dùŋ bəŋkɨnə kwe, fo Chu lə jə be ye bwɔni biih lə. 6 Ye Chu jə lə be ye bwɔni biih lə nəni, i hlə faŋ Fiana Ŋiaani, i bwo ə tɔ́ŋ ŋiaa mə yee i chēe wu lə, “Aba, Tah!” 7 Fi duŋ lə Chu fəə, bə baala duŋ bənfwa kə. Bə chu duŋ bwɔni bə chəŋ. Ye bə duŋ lə bwɔni bə chəŋ, kəə fi duŋ lə bə yá bwo kənə bieŋ bbɨŋ i kila bə bwɔni biih.

Pwɔɔ lɔ lə bəne bə Galeshia lə nyɔkɔ je

8 Ə mà duŋ bwɔɔ nnu fwii bə kaani kə kələ Chu, bə màa bə nɨ̂ŋ munfwa ə kwáŋ ŋə bieŋ bbɨŋ bə mà jə lə ə bəcheh ə duŋ kə duŋ nə bəcheh kə. 9 Kwaalə, fidiɛɛ ye bə kəla lə Chu, ləkə fidiɛɛ ye Chu kəla lə bəŋ ye duŋ ə n'yɔɔ, bə fə ləhəŋ hlə yee bə kīɛɛ lə bə chu dɨŋ ə bəcheh bənya bəhŋ mə, bbəŋ bə́ dùŋ kə kənə muŋga. Bə kiɛɛ lə bə baa chu bənfwa bə bəcheh bəhŋ yulaha lə? 10 Bə shì joo ŋəndi lə ŋə duŋ ŋəŋkuntaŋ ŋəŋkuntaŋ, bə shì kii ŋəndi, shi bwɔɔ ə kigoŋ mə, shi bigoŋ bidi yulaha lə? 11 Bə fə̀ nəni nlɔ̀ gbaaŋ lə nimi lɨŋŋ llɨŋ nnɨ̀ŋ le ə bəŋ mə laa nya.

12 Bəŋgwoŋ, ŋkwī bəŋ kwáŋ bu ŋkwinə lə bə gaanə yee bə dūŋ dəŋ ye ndùŋ ki bəŋkɨnə, dəŋ yəəŋ ye ŋgaanə lə chu ye bəŋ bwɔɔ nnu bə duŋ bəŋkɨnə hləŋ. Bə mà kə fəə fieŋ fiwaha bə mi kə. 13 Bə kələ lə ə bwɔɔ nnu fwii nnu mmàa ndōntə yo hlɨŋ nwaa Chu bə bəŋ ə màa yulahalə mmàa ndūŋ bə bəŋ ŋgɔ̀ŋ. 14 Maa ye mmà nduŋ lə dəŋ ə jəŋ mə nəni, fi duŋ ye bimɔŋnə lə bbɨŋ bi bwoo ə bəŋ mə, bə mà kə lɔɔ, ləkə nyɛhiŋ mi kə. Bə kaka tɨŋ jə mi ye nchinda Chu ju ləkə ye Kleto Jisho lə kibɛɛ. 15 Bə màa bə tɨ̄ŋ bə mi ə bwɔɔ yo bəŋ, ə kwo laha bəŋ fidiɛɛ lə? Duŋ ə n'yɔɔ lə, ə bə́ màa yɔɔ bu yɔɔnə lə bə bwa díi ŋieeŋ nə bə mi, ə bə màa bwa, ə duŋ lə je màa duŋ. 16 Nchoo ŋwuŋ nnu bə duŋ yo kə diee njənə bə mi ye n'yu n'yɔ̄ɔ lə bəŋ kichɛɛŋ lə? 17 Bəne bie kiɛɛ lə yee bə́ nyīi lə bə́ kənə hlɔɔ yeŋ gbaaŋ, kwaalə bə́ kiɛɛ bəŋ ə fieŋ ffɨŋ fi dùŋ kə duŋ nə fi nwaa bə bəŋ kə. Bə́ leki lə kkə ga fo bə́ lə yee bə́ kə̄nə ŋgɨŋ ə duŋ bə bə́. 18 Fi nwaa lə mbɛɛ yee i kə̄nə ŋgɨŋ bə mbɛɛ ə fieŋ finwaa bəŋ. Fɨhŋ duŋ yəəŋ bwɔɔ mənhliŋ ə kə duŋ nə bwɔɔ nnu ndùŋ nu bə bəŋ kwaa kə. 19 Bwɔni bəŋŋ bbəŋ bə duŋ bie tɔŋ lɨŋŋ, fi duŋ ye mbaa lə chɔɔ bu chɔɔnə bəŋ'wo nlogo bwee, n'yu ŋ'wō nlogo gəŋ bwii ye kinduŋh ki Kleto yá duŋ ə bəŋ mə! 20 Mbɛɛ hə jə lə n'yo bə bəŋ fidiɛɛ, fo nlə ŋgaanə je nni n'yɔ̄ɔ ye bə bəŋ. Fieŋ ffɨŋ bə fə fɨhŋ bufe laa mi fi bu lanə.

Kichili ə bwɔni bə Ablahaŋ mə

21 Bəŋ bbəŋ bə kìɛɛ bie lə yee bə dùhŋ bəŋkɨnə kwe, bə yɔɔ mi, bə wòlə fieŋ ffɨŋ bəŋkɨnə bie yɔ̀ɔ fie kə lə? 22 Bə́ bieŋna lə Ablahaŋ mà kənə bwɔni bəniɛ bəfwe, i mà bwee ju yo bə kpɛɛ nnu i mà duŋ nfwa, i bwee ju yo bə kpɛɛ nnu i mà kə duŋ nə nfwa kə. 23 Nfwa nnu mà bwee ŋiaani bələ dəŋ ye bə́ bwee lə bwɔni bənhliŋ. Kwaalə kpɛ nnu i mà kə duŋ nə yo nfwa mà bwee ŋkwo wi bələ ŋkaachi nnu Chu mà kaachi. 24 Duŋ ə kkə jə fieŋ fɨhŋ ye kifɛhiŋ ki fieŋ lə. Bəkwɛɛ bə bəfwe bəhŋ nyii bitimi bifwe. Haga nnu mà duŋ nfwa, i jə dɔhɔ kkɨŋ Chu mà nə bə bəne Bəishlael ə Kɔnɔ ki Shinay go. Bəne bənhliŋ bbəŋ bə́ dùŋ ə tɨmə kwe mà duŋ bənfwa. 25 Ye Haga jə lə dɔhɔ ki tɨmə kɨhŋ ə Kɔnɔ ki Shinay go, kkɨŋ ki dùŋ ə kitɨŋ ki Alebia mə, i yu baa jə dəŋ dɔhɔ ki kibalaki ki Jelushalɛŋ ki fidiɛɛ, yulahalə bəne bənhliŋ bbəŋ bə́ dùŋ ə kibalaki kie mə duŋ bənfwa ə bəŋkɨnə bie kwe. 26 Kwaalə bəne bə Jelushalɛŋ nnu i dùŋ yo buh lə bənfwa kə. Mbini yo Jelushalɛŋ dùŋ nəh ya. 27 Ə fieŋ ffɨŋ bə́ bieŋna lə,

“Wə kpɛ nnu wə dùŋ gbɔmbu kə bwee lə kə, yee wə tɨ̂ŋ.

Wə nnu wə kaani kə hlaa wo nlogo bwee, yee wə kə̂kə kishaa.

Yee wə kə̂lə lə bwɔni bə kpɛ nnu bə́ kohaŋ wu

yá yi ŋaŋ kah bə kpɛ nnu i yo ə nyimi chəŋ.”

28 Nəni bəŋgwoŋ, bə duŋ ye bwɔni bə Chu bələ ye Chu mà kaachi yəəŋ ye Ablahaŋ mà bwee Ayjik bələ ye Chu mà kaachi lə. 29 Ə mà duŋ ə bwɔɔ yo bəŋ, ŋiaŋ nnu bə́ mà bwee wu bələ ye bə́ bwèe lə bwɔni bənhliŋ gbe bənhlɔɔ gbu ə nnu bə́ mà bwee yo ə nə Fiana Chu muŋgeni mwe. Fi duŋ kwaa dəŋ yəəŋ bə fieŋ ffɨŋ fi dùŋ fidiɛɛ. 30 Bə́ bieŋna ə Kiŋwaati ki Chu mə ki fieŋ fɨhŋ lə ləhəŋ lə? Bə́ bieŋna ə duŋ lə,

“Kohiŋ nfwa kpɛ yo bə bwɔni biih bənhliŋ,

yulahalə ŋwa nfwa yo duŋ ə i nakə diee bishələ bə ŋwa kpɛ nnu i dùŋ kə duŋ nə nfwa kə.”

31 Ye fi duŋ lə nəni bəŋgwoŋ, fieŋ ffɨŋ n'yɔ̄ɔ finhliŋ nyìi kwaa lə kkə dùŋ nə bwɔni bə nfwa kpɛ yo kə. Kkə dùŋ ə duŋ bwɔni bə kpɛ nnu i dùŋ yo kə duŋ nə nfwa.