Galashia 3

Ki bəŋkɨnə maa bən'yii tɔŋ ə Kleto mə

Hooo bəne bə Galeshia, bə duŋ bənfili! Ə nyəhə nnu i chɨŋ bəŋ lə? Ə kə duŋ nə bəŋ bbəŋ bə́ nacha bə bəŋ wɛɛŋ ye bə́ mà bweeni Jisho Kleto ə kiŋgwa go bə ŋə̀ŋ wɛɛŋ lə? 2 Nlə mbii fieŋ fimwi bə bəŋ. Fiana Chu mà bwo ə bəŋ go yulahalə bə màa bə fə̄ ye bəŋkɨnə yɔ̀ɔ lii yulahalə bə mà bema fieŋ ffɨŋ bə mà wo lə? 3 Bə duŋ bənfili nəni ləhəŋ lə? Bə chɔɔla fieŋ fidi bə Fiana Chu, yee bə kīɛɛ fidiɛɛ lə bə kaanə bə muŋgeni mweeŋ lə? 4 Bə ma wo bəŋgə nəni ə duŋ nya lə? Ŋkə ŋəŋ nə lə, ə maa nya kə. 5 Chu nə̀ Fiana wi bə bəŋ, baa i fə̀ dəŋ nyíŋ ə bəŋ mə yulaha lə? I fə̀ nəni yulahalə bə chì bəŋkɨnə ləkə lə bə woo hlɨŋ ki Kleto yii tɔŋ ə wu mə lə?

6 Fi duŋ ye bə́ bieŋ lə ki Ablahaŋ ə Kiŋwaati ki Chu mə lə,

“I mà bema fieŋ ffɨŋ Chu mà yɔɔ bə wu,

Chu hlə jə wu lə i dùŋ mbɛɛ ntiiŋ.”

7 Bə ŋəŋ lə, ə bəne bbəŋ bə́ yii tɔŋ ə Chu mə bbəŋ bə́ dūŋ ba kichəŋ ki Ablahaŋ. 8 Kiŋwaati ki Chu mà hlaala dontə ə kaani lə Chu yá yi jə bəne bbəŋ bə́ dūŋ kə duŋ nə Bəjuu lə bə́ duŋ gbenə hləŋ ə wu di yu tɔŋ llɨŋ bə́ yiila le ə wu mə. Kiŋwaati ki Chu hlə dontə hlɨŋ nwaa ni bə Ablahaŋ ə kaani həmɛɛ, ki yɔ̀ɔ lə,

“Chu lə hləmə bitɨŋ binhliŋ bi yaŋ ə mbiŋ nu mə yu wə.”

9 Nəni, fi hlə yee fi dūŋ lə bəne bbəŋ bə́ yìi tɔŋ ə Chu mə duŋ ə Chu hləmə dəŋ bə́ ye i mà hləmə lə Ablahaŋ nnu i mà yii yo tɔŋ ə wu mə.

10 Bəne bənhliŋ bbəŋ bə́ ŋə̀ŋ lə duŋ ə yee bə́ dūŋ ntiiŋ ə Chu fwi yu bə́ chì bəŋkɨnə duŋ bbəŋ bə́ too kida ə bə́ fí, yu bə́ bieŋna ə duŋ lə,

“Mbɛɛ mənhliŋ nnu i dùhŋ kə duŋ nə ye bə́ bieŋna lə ə Kiŋwaati ki Bəŋkɨnə mə,

kə fəə ye bəŋkɨnə bie binhliŋ kìɛɛ lə kə,

i too kida ə wu fi.”

11 Fi hlə yee fi nyiee wɛɛŋ lə duŋ ə Chu jə mbɛɛ lə i dùŋ ntiiŋ yu i chì bəŋkɨnə kə. Fiee fieŋ ffɨŋ bə́ bieŋna fie lə,

“Ə kwaa mbɛɛ nnu Chu jə lə i duŋ ntiiŋ yu tɔŋ llɨŋ i yiila ə wu mə

nnu i kə̀nə kinduŋh.”

12 Bəŋkɨnə kənə lə fieŋ bənfə ki tɔŋ li yiinə ə Chu mə kə. Fi duŋ chəə lə, “Mbɛɛ nnu i chì bəŋkɨnə duŋ lə yee i dūŋh i bə̀lə kwaa bə́.” 13 Kleto mà yaah be ə kida kwáŋ kkɨŋ bəŋkɨnə bwò bə ki. I mà too bida biaa ə wu fi, ə duŋ ye bə́ bieŋna lə lə,

“Kida duŋ bə mbɛɛ nnu bə́ hləəla ə tiɛɛ go.”

14 I mà fə nəni, fo kinhləmə kkɨŋ Chu mà nə kie bə Ablahaŋ lə bwo dəŋ ə bəne bbəŋ bə́ dùŋ kə duŋ nə Bəjuu yu Jisho Kleto, fo be bbəŋ kkə yiila bie tɔ́ŋ ə wu mə lə kənə dəŋ Fiana Chu nnu i mà kaachi yo.

Duŋ ə bəŋkɨnə chuu ŋkaachi Chu kwe kə

15 Bəŋgwoŋ, kkə jə kinyii ə bieŋ bbɨŋ bəne bwò bə́ fə̀ joo ŋənhliŋ. Ə bəne bwɛɛ fieŋ kaŋ muŋkaŋ, kəə duŋ ə mbɛɛ chuu fi kwe ləkə yiinə fieŋ fidi ə fi bəŋ kə. 16 Ki bəŋkaachi bə Chu, duŋ i mà kaala chi bə Ablahaŋ bə ŋiaŋ nnu i yá fu ə kichəŋ kiih mə. Bə́ kə bieŋ nə lə, “Bə́ duŋ yu bwɔni bbəŋ bə́ yá fu ə kichəŋ kiih mə,” fie nyìi lə ə kə duŋ nə yu bəne kiŋaaŋkə kə. Fi nyìi lə i yɔ̀ɔ ki ŋiaŋ mwi, ŋiaŋ nu duŋ Kleto. 17 Fieŋ ffɨŋ ŋkiɛɛ lə n'yɔɔ duŋ lə, Chu mà fə ŋkaachi nu, bigoŋ bwo kah gi na bə bigoŋ mbwɛɛnshɔ (430) i hlə bwo nə bəŋkɨnə. Ye fi duŋ lə nəni, bəŋkɨnə bbəŋ bə́ bwò dɨŋ duŋ ə bə́ nakə baa lə chuu tɨmə ki fwii kwe kkɨŋ Chu mà hlaa nə kə, fo fi fə lə fieŋ ffɨŋ i mà kaachi la nya. 18 Ə duŋ lə duŋ ə mbɛɛ kənə kinhləmə kɨhŋ ə duŋ kwaa bwɔɔ nnu i chì bəŋkɨnə, kəə fi baa duŋ lə Chu mà kaala chi bəne mu kə. Kwaalə, Chu mà hləmə Ablahaŋ bələ ye i mà kaachi lə bə wu.

19 Bəŋkɨnə mà duŋ yulaha lə? Bə́ mà yiinə bəŋkɨnə bənyii bieŋ bbɨŋ bəne nyɔ̀kɔ bə bi, chɔɔ jə lə gəŋ bwii maa bwɔɔ nnu ŋiaŋ nnu Chu mà kaachi yo kiih ya bwo. Chu hlə nə bəŋkɨnə bəhŋ, bənchinda biih hlə jə nə ə kwáŋ ŋə mbɛɛ ju mə, i nɛhiŋ nə bə bəne. 20 Bə kələ lə ə bəne ja yee bə́ bwɛ̄ɛ fieŋ ə mbɛɛ ju duŋ bə́ hənte, kəə i yo yu bə́ bənhliŋ. Kwaalə, Chu duŋ kwaa wuu mboŋ.^ª

21 Ye fi duŋ lə nəni, kəə duŋ ə ŋkɨnə baa nɨhŋ fieŋ ffɨŋ Chu mà kaachi lə? Duŋ ə yee fi dūŋ lə kə dududu! Ə ŋkɨnə ju mà duŋ həmə nnu duŋ ə i nə kinduŋh, kəə duŋ ə mbɛɛ dūŋ ntiiŋ ə Chu fwi yu i chì bəŋkɨnə chɛɛŋ chɛɛŋ. 22 Kwaalə, Kiŋwaati ki Chu yɔ̀ɔ lə mbɛɛ mənhliŋ duŋ nfwa yíwaha. Fi hlə yee fi dūŋ lə ŋkaachi nnu Chu mà kaachi yo bə mbɛɛ nnu i yiila tɔŋ ə Jisho Kleto mə, ə yá bwo kənə kwaa mbini yo mbɛɛ nnu i yiila yo tɔŋ ə wu mə.

Bəŋkɨnə mà duŋ ye nshi bə ŋiaŋ lə

23 Ə mà duŋ bwɔɔ nnu fwii Jisho kaani kə bwoo fo bəne lə yii tɔŋ ə wu mə, bəne mà duŋ ə bəŋkɨnə kwe, ə duŋ bə́ hə kwaala bə́ ye bəne bə chəŋ munfwa lə yee bə́ fwōŋ gəŋ bwii bwɔɔ nnu Chu yá nyii Jisho lə yee bə́ yīi tɔ́ŋ ə wu mə. 24 Bəŋkɨnə mà duŋ ye nshi bə ŋiaŋ nnu i màa i lɛ̄hiŋ bəne gəŋ bwii bwɔɔ nnu Kleto mà bwo fo bəne lə yee bə́ yīi tɔ́ŋ ə wu mə, ə Chu hlə jə bə́ lə bə́ dùŋ gbenə hləŋ ə wu dí. 25 Ye Kleto bwoolə lə yee bəne yîi tɔ́ŋ ə wu mə, kəə kkə kaani lə ə kwáŋ ŋə nshi bə ŋiaŋ nu mə kə. 26 Bəŋ bbəŋ bə duŋ bie mbuhuŋ bə Kleto Jisho, bə chu duŋ bwɔni bə Chu bənhliŋ yu tɔ́ŋ ŋŋəŋ bə́ yiila ə Kleto mə. 27 Yee bə kə̂lə lə mbɛɛ mənhliŋ nnu bə́ yiila wu ə njɔ, buhuŋ bə Kleto i choo fieŋ fimwi bəə Kleto. 28 Mbɛɛ ju kə baa lə duŋ chili lə i dùŋ ŋwuŋ Bəjuu ləkə mbɛɛ nnu i dùŋ kə duŋ nə ŋwuŋ Bəjuu kə. Mbɛɛ ju kə baa lə duŋ chili lə i duŋ nfwa ləkə ŋiaŋ nu chəŋ, mbɛɛ ju kə baa lə duŋ chili lə i duŋ nyo ləkə kpɛ. Bəŋ bənhliŋ choo fieŋ fimwi ə Kleto Jisho mə. 29 Ye bə chu duŋ lə ba bəne bə Kleto nəni, kəə bə chu duŋ ba bwɔni bə Ablahaŋ, bbəŋ bə́ yá bwo kənə bieŋ bbɨŋ Chu mà kaachi Ablahaŋ mu.