Galashia 2

Bəne bə hlɨŋ bə Jisho fwɔŋ hlɨŋ Chu nni Pwɔɔ màa i dōntə

Lə ə bwo duŋ bigoŋ yuufi ə nchɔ binua dɨŋ, mbaa biŋ gəŋ ə Jelushalɛŋ bee Banaba. Bwɔɔ nnu mmàa mbīŋ, njə Taytu. 2 Mmàa mbīŋ ə bwɔɔ nu bəŋ ə duŋ Chu nnu i nyiila lə mbiŋ. Ye mmàa mbīŋ lə, ŋŋəŋ bəne bbəŋ mmàa ŋkə̄lə bə́ lə bə́ duŋ bəŋkafwi, bee bə́ chu həkpɛɛli, nnɔhiŋ hlɨŋ nwaa Chu nnu mmàa ndōntə bə bəne bbəŋ bə́ dùŋ kə duŋ nə Bəjuu həkwe ə bə́ fwi. Mmàa nfə̄ nəni fo nimi lɨŋŋ llɨŋ nnɨŋna le maa llɨŋ ŋkaani le bənnɨŋ kə laa nya kə. 3 Lə bə́ wo nəni, bə́ nakə hluŋ nə ba kwe lə bə́ yieŋ jo Taytu nnu kkə duŋ yo bee wu maa ye i mà duŋ lə ŋwuŋ Bəglik kə. 4 Ə màa nakə duŋ nə yu bəne bədi bbəŋ bə́ kàalə yo lə bə́ duŋ bəne bə kimbemi, bbəŋ bə́ mà wɛɛnə lɛɛ ə dɔhɔ kkɨŋ kkə mà duŋ kie mə, ə bə màa nakə yee bə yɔ̄ɔ lə bə lɛɛ ə dɨŋ bieŋ bimbini bie mə kə. Bədi bəhŋ bəne mà bwo ye bəne bbəŋ bə wɛɛni bə mia bieŋ bəŋəŋ ye kkə fə̀lə bieŋ wala wala yulahalə kkə bie mbuhuŋ bə Jisho Kleto. Bə́ hlə yee bə́ kīɛɛ lə bə yii chuu be ə munfwa mə. 5 Kkə nakə bemi fieŋ ffɨŋ bə́ bwò fie bə fi kə maa finchiiŋ. Kkə mà fə nəni fo kkə lə kili kichɛɛŋ kkɨŋ ki dùŋ ki hlɨŋ nwaa Chu yu bəŋ. 6 Bəne bbəŋ bə́ mà kələ bie lə bə́ duŋ bəŋkafwi, bə́ mà kə yiinə fieŋ ə ffɨŋ mmàa ndōntə fie bəŋ kə. (Dɨŋ bəmbini bie bəne bbəŋ n'yɔ̄ɔ bie, maa ə bə́ mà duŋ laha lee, fimbini fie kənə lə fieŋ fidi bənfə bə mi kə, yu Chu nyìilə kichili kə.) 7 Kwaalə, bə́ kaka ŋəŋ lə bə́ nəə hlɨŋ nwaa Chu ə kwáŋ ŋəŋŋ mə lə n'yee ndōntə bə bəne bbəŋ bə́ dùŋ kə duŋ nə Bəjuu, yəəŋ ye bə́ nə lə Pita lə yee i dōntə bə Bəjuu. 8 Fi duŋ lə Chu nnu i mà nə yo muŋgeni bə Pita lə yee i nɨ̄ŋ ye mbɛɛ faŋnə Jisho Bəjuu lə, ə kwaa dəŋ wu nnu i mà nə mi lə n'yee nnɨ̄ŋ ye mbɛɛ faŋnə Jisho lə bə bəne bbəŋ bə́ dūŋ kə duŋ nə Bəjuu. 9 Bwɔɔ nnu bə́ mà ŋəŋ je nni Chu shaa ye mi mə, Jɛŋ bəə Pita maa Jɔɔŋ bbəŋ bə́ mà kələ bie lə bə́ duŋ biwooli bi bəne bə kimbemi, bə́ hlə nəəmə kwáŋ bə be bee Banaba bənyii lə kkə nɨ̀ŋ ə fieŋ bəŋ fimwi. Kkə hlə bemi lə kkə lə gəŋ yee kkə nɨ̄ŋ bə bəne bbəŋ bə́ dūŋ kə duŋ nə Bəjuu, ə yee bə́ nɨ̄ŋ bə Bəjuu. 10 Fieŋ ffɨŋ bə́ mà yɔɔ mà duŋ kwaa lə yee kkə hlē Bəjuu bənjɨnənə. Fɨhŋ duŋ fieŋ ffɨŋ mmàa nlēki ba gbaaŋ lə n'yee nfə̄.

Pwɔɔ hla Pita ə Antiyɔk

11 Ə mà bwo duŋ ə bwɔɔ ju bəŋ Pita ja bwo ə Antiyɔk, nhla wu dí dí yu i mà gbee gbaaŋ. 12 Fi duŋ lə, i mà hlaala bwo yee i dī bə bəne bbəŋ bə́ dùŋ kə duŋ nə Bəjuu, kə chɛŋ nə gbo kə. Ə chulə bəne bədi bbəŋ Jɛŋ mà faŋ bie yee bə́ bwō, i hlə chɔɔ bəŋkpa gbo dɨŋ, hlə ja gahi gbo wiih, nakə baa lə yee i dī bə bəne bbəŋ bə́ dùŋ kə duŋ nə Bəjuu kə. I mà gahi nəni yu i màa i lɔ̀ kintu kkɨŋ ki màa ki lēmi kie kwaa lə, bə́ kənə bənyieŋ jo mbɛɛ nnu i dùŋ kə duŋ nə ŋwuŋ Bəjuu kə, ə mbini yo mbɛɛ hlə chu duŋ mbɛɛ Kleto. 13 Ye i fələ nəni, bəne bə kimbemi bədi bbəŋ bə́ mà duŋ Bəjuu hlə bələ fwɔ wiih bən'yɔɔ chili fə chili. Banaba kibɛɛ nyɔkɔ dəŋ bu bələ fwɔ wibə bən'yɔɔ chili fə chili. 14 Lə ŋŋəŋ lə fwɔ wibə we bə̀lə lə kichɛɛŋ ye hlɨŋ nwaa ki Kleto nyìi lə kə, nhlə n'yɔɔ bə Pita ə bə́ dí bənhliŋ lə, “Wə duŋ ŋwuŋ Bəjuu, wə choo ba ye ŋwuŋ nnu i dùŋ kə duŋ nə ŋwuŋ Bəjuu, wə baala duŋ ye ŋwuŋ Bəjuu lə kə, ə laha ffɨŋ wə kiɛɛ lə yee wə yə̄ə bəne bbəŋ bə́ dùŋ kə duŋ nə Bəjuu lə yee bə́ dūŋh ye Bəjuu lə lə?”

15 Mmàa n'yɔ̄ɔ bə Pita nəni ə duŋ chɛɛŋ lə bee bə́ duŋ mbwee Bəjuu. Kkə duŋ nə bəne bbəŋ bə́ dùŋ kə duŋ nə Bəjuu bbəŋ bə́ ŋə̀ŋ lə ə bəne bəwaha kə. 16 Kwaalə kkə kələ lə Chu jə̀ mbɛɛ lə mə gbenə hləŋ ə wu dí duŋ yulahalə i chì bəŋkɨnə. I jə̀ yulahalə i yiila tɔŋ liih ə Jisho Kleto mə. Maa be Bəjuu kibɛɛ yiila tɔ́ŋ ə Jisho Kleto mə, fo kkə lə yee kkə dūŋ gbenə hləŋ ə Chu dí ə kə duŋ nə yu kkə chì bəŋkɨnə kə. Fi duŋ lə ə mbɛɛ lə chi bəŋkɨnə ə Chu nakə jəə wu dududu lə i duŋ gbenə hləŋ.

17 Ə duŋ lə kkə jù bənduŋ gbenə hləŋ ə Chu dí yulahalə kkə dùŋ bəne bə Kleto, bəne baa yee bə́ ŋə̄ŋ dəŋ lə kkə duŋ bəne bə yíwaha yulahalə kkə chìlə dəŋ bəŋkɨnə bə Bəjuu kə, kəə fi fie lə Kleto yii fwɔ̀ŋ yiwaha lə? Fi duŋ nə nəni kə! 18 Ə nlə mbaa nja n'yee ŋ'wɛ̄ɛ je bəŋkɨnə ə duŋ fieŋ ffɨŋ mmà nhlaka, kəə fimbini fie nyìi lə ndùŋ ŋwuŋ bwuŋnə ŋkɨnə. 19 Fieŋ ffɨŋ fi dùŋ duŋ lə, ə wɛɛ wi bəŋkɨnə mə duŋ lə nchu nduŋ ŋkpi, ə jii bəŋkɨnə mi, ŋkpee fo nlə n'yee ndūŋh ye Chu kìɛɛ lə. 20 Duŋ ə n'yɔɔ lə bə́ bweena mi ə kiŋgwa go, ŋkpee bee Kleto. Kəə kinduŋh kkɨŋ ŋkənə kie fidiɛɛ ə mi go baa duŋ kɨŋŋ kə. Ə chu duhŋ Kleto ə mi mə. Kinduhŋ kkɨŋ ŋkənə kie fidiɛɛ ə mi mə duŋ ki tɔŋ llɨŋ n'yiila le ə Ŋwa Nchu mə nnu i mà nyii yo mi kinleki, i nə kwoo kiih bəŋkpe yu mi. 21 Duŋ ə n'yee nnɨ̄hŋ tɔŋ linwaa li Chu li fwoonə bəne kə. Ə fi duŋ lə duŋ ə mbɛɛ yee i dūŋ ntiiŋ ə Chu fwi yu i chì bəŋkɨnə, kəə kpe Kleto mà duŋ nya.