Galashia 1

Kiŋwaati kkɨŋ Pwɔɔ mà bieŋ bə kimbumə ki

Galeshia

Kiŋwaati kɨhŋ bieŋ mi Pwɔɔ, mbɛɛ faŋnə Jisho Kleto. Ndùŋ nə mbɛɛ faŋnə Jisho ə duŋ nfaŋ mbɛɛ ŋkee ləkə nnu i nə̀ mi muŋgeni kə. Ə Jisho Kleto bə Tili Chu nnu i mà fwoo yo wu ə kpe mə nnu i faŋ mi. 2 Bee bəmwaa bieeŋ bə kimbemi bənhliŋ bbəŋ bə́ dùŋ fəŋ bə mi, kkə cheela bəŋ bə bimbumə bi bəne bə kimbemi bə kitɨŋ ki Galeshia mə. 3 Chu Tah ya bə Baba Jisho Kleto nyii bəŋ tɔŋ linwaa, baa nə dəŋ bəŋ tɔ́ŋ ŋəndə. 4 Jisho Kleto duŋ nnu i mà nə kwoo kiih yu yíwaha yaa fo mə lə fwoo be ə kwáŋ ŋə mbiŋ yíwaha nnu fidiɛɛ nu mə. Fieŋ fɨhŋ duŋ ye Chu nnu i dùŋ yo Chu bə Tah ya mà bwɛɛ. 5 Yee kkə nə̂ kiŋkohi bə wu bwɔɔ mənhliŋ kə kaa. Yee fi Dûŋ lə.

Hlɨŋ nwaa ki Jisho Kleto ba kwaa mi

6 Gəə kie ki ŋɨ̄ŋ mi lə fidiɛɛ fidiɛɛ bə jaa yee bə bwūŋ kinhlaŋ bə Chu nnu i mà chee yo bəŋ yu tɔŋ linwaa li Kleto llɨŋ i kə̀nə bə bəŋ, ja yee bə bə̄lə ə duŋ hlɨŋ nwaa ji chili. 7 Fi kə duŋ nə lə hlɨŋ nwaa ji chili ye həmə kə. Fi duŋ kwaa lə bəne bədi kiɛɛ lə yee bə́ nyɔ̄kɔ bufe bweeŋ, bə́ bìhi hlɨŋ nwaa ki Kleto. 8 Nhlə n'yee n'yɔ̄ɔ lə maa ə lə bwo be ləkə nchinda Chu nnu buh bwo yee i dōntə bəŋ hlɨŋ ji chili nni i dùŋ kə duŋ nə nni kkə mà dontə ye bəŋ, mbɛɛ yo tu kida! 9 Ye kkə mà yɔɔlə, mbaa nchu dəŋ bəŋ bən'yɔɔ dəŋ lə, ə mbɛɛ ja yee i dōntə bəŋ hlɨŋ ji chili ə duŋ kə duŋ nə nni bə mà tɨŋ jə ye, mbɛɛ yo tu kida!

10 Bə hlè lə ŋkiɛɛ lə yee ə dōhi bəne mi lii yee ə dōhi ə duŋ Chu lə? Lii bə hle lə ŋkiɛɛ lə nfə lə yee bəne wō njənjə lə? Ə fi hə duŋ lə ŋkiɛɛ lə nfə lə yee bəne wō njənjə, ə nhə nnakə duŋ nə mbɛɛ nimi Kleto kə.

Hlɨŋ nwaa nni Pwɔɔ mà dontə ə mà nyii Kleto wu yi

11 Bəŋgwoŋ, ŋkiɛɛ lə bə kələ lə hlɨŋ nwaa Chu nni mmàa ndōntə ye bəŋ, ə mà kə duŋ nə fieŋ ffɨŋ fi fu ə kwáŋ ŋə mbɛɛ ŋkee mə kə. 12 Mmà ŋkə ŋ'woo ə mbɛɛ ju jə, mbɛɛ ju mà kə laanə mi yi kə. Ə mà nyii Jisho Kleto mi. 13 N'yɔ̄ɔ nəni ə duŋ bə mà hlaala wo ye fwɔ wuŋŋ màa wi hlāa lə wi dùŋ bwɔɔ nnu mmàa ŋkaani mbə̄lə kimbemi kiaa ki be Bəjuu. Mmàa mbā bənhlɔɔ wuh ə bimbumə bi bəne bə Chu dɨŋ ə je waha mə, ŋkiɛɛ lə nləhə laa bi. 14 Mmàa ŋgə̄ŋ fwi ə kimbemi kiaa ki Bəjuu mə, ŋkàh hlɔ́ŋ yɨŋŋ yidi ə bəne biaa mə, nshì choo gbaaŋ ə too wi kitɨŋ ki bətah biaa mə. 15 Kwaalə Chu mà bwaa chi mi ə duŋ ŋkaani ə nəh bulə. Tɔŋ lii linwaa llɨŋ i mà nyii le bə mi bwo fə i dii mi. 16 I nyii mi Ŋiaani ye i mà kiɛɛ lə, fo nlə n'yee njāa ndòntə kiih bə bəne bbəŋ bə́ dùŋ kə duŋ nə Bəjuu. Ye i mà nyiilə nəni, nchu kə baa lə duŋ lə mbii fieŋ fi mbɛɛ ŋkee kə. 17 Mmà ŋkə biŋ nə dəŋ ə Jelushalɛŋ bəŋəŋ bəne bbəŋ bə́ mà hlaa duŋ bəne bə faŋnə bə Jisho ə mi fwi. Mmà nja ŋgəŋ ŋkwo ŋgwəŋ ə duŋ ə Alebia, nja həmə fiimə chu dɨŋ ə Damashku.

18 Lə ə chu bwɔɔ nnu dɨŋ bigoŋ bitɔh hə kaah, mbiŋ gəŋ ə Jelushalɛŋ lə bee Pita yɔɔ yo. Ye mmà mbiŋ lə, kkə duŋ bee wu joo yuufi ə nchɔ tiŋ. 19 Mmà ŋkə ŋəŋ nə dəŋ mbɛɛ ju ə kiintu ki bəne bə faŋnə bə Jisho mə kahiŋ kwaa Jɛŋ dɨŋ Baba ya Jisho. 20 Fieŋ ffɨŋ mbīeŋ fɨhŋ duŋ chɛɛŋ, Chu kə̀lə lə ŋkaalə lə ə duŋ yo kə. 21 Lə yee ə dūŋ ə bwɔɔ ju bəŋ, nja gəŋ ə bidi bi Shilia bə bi Shilishia mə. 22 Ə bwɔɔ yo bəŋ mà duŋ kimbumə ki bəne bə Kleto bə bidi bi Judia mə mà kə kələ mi díi bə díi kə. 23 Bə́ mà wo kwaa ye bəne yɔ̄ɔ lə, “Mbɛɛ nnu i maa i hlɔ̄ɔ yo wuh ə be dɨŋ jaa fidiɛɛ i yu yɔ̄ɔ ə duŋ lə bəne yii tɔ́ŋ ə Kleto mə, ə duŋ fieŋ ffɨŋ i maa i hlaa i kīɛɛ lə i ləhə laa fi bu ləhənə.” 24 Bə́ wo nəni, yee bə́ nə̄ kindohi bə Chu bə fieŋ ffɨŋ i mà fəə bə mi.