2 Kɔlɛŋ 12

Bieŋ ye yobutuu lə bə bidi bbɨŋ Baba mà nyii bə Pwɔɔ

Ŋkənə bəŋ'we ŋgə̀ŋ kwaa fwi maa ye mbɨŋ duŋ lə hləŋ kə. Nlə n'yee ŋgə̄ŋ fwi bə bieŋ ye yó yibutuu lə maa bieŋ bbɨŋ bi duŋ ə nələmə bbɨŋ Baba mà nyii mi. 2 Ŋkələ mbɛɛ Kleto ju nnu Chu mà choo jə biŋ gəŋ bə wu ə buuli li ncháŋ shɔ bəŋ.^ª Daŋ duŋ bigoŋ yuufi ə nchɔ binua ye fi mà kah. (Fo i mà biŋ mə bə mbili, ləkə mbili hləŋkə lee, ŋkələ kə. Ə kələ kwaa Chu.) 3 Ŋkiɛɛlə mbaa nchu bəŋ lə, ŋkələ mbini yo mbɛɛ, (fo i mà biŋ bə mbili, ləkə mbili hləŋkə lee, ŋkələ kə. Ə kələ kwaa Chu.) 4 Chu mà choo biŋ bə wu ə dɔhɔ ki kintɨŋ ki Chu mə, i wò bieŋ həmə ə duŋ bbɨŋ mbɛɛ duŋ ə i nakə yɔɔ lə kə. Bimbini bie lə bieŋ bbɨŋ bi kə nəə muŋgeni lə mbɛɛ ŋkee yɔɔ kə. 5 Ə mbɛɛ ye mbini yo lə nnu duŋ ə n'yee nhlə̄ə yu wu. Ə duŋ ə n'yee nhlə̄ə yu kwoo kɨŋŋ kə, kahiŋ kwaa lə nhləə yu biaŋnə kɨŋŋ. 6 Ə duŋ dəŋ lə ŋkiɛɛ lə n'yee nhlə̄ə yu kwoo kɨŋŋ, nnakə duŋ nə nfili kə, yu fieŋ ffɨŋ nlə n'yee n'yɔ̄ɔ duŋ fi kichɛɛŋ. Kwaalə nnɨhŋna bənfə dɨŋ fimbini fie fieŋ, fo mbɛɛ ju lə jaa yee i hlē chili chili kɨŋŋ kahiŋ fieŋ ffɨŋ i ŋə̀ŋ ə mi mə bə ffɨŋ i wò ə mi kwáŋ.

7 Kwaalə, bənfə lə ŋkə njaa n'yee ŋ'wō gbo gbaaŋ ki bieŋ bi ŋɨŋ gəə bbɨŋ Chu mà nyii bə mi, i mà faŋna kimbɛɛnə kidi yee ki bɛ̄ŋ gbo wuŋŋ. kimbɛɛnə kɨhŋ màa nchinda Hlaata nnu i fɨhɨŋ mi, fo nlə n'yee ndūŋ kə woo gbo gbaaŋ kə. 8 Mbwo nchee Chu ki fieŋ fie bə Baba bwii chá shɔ, ŋkɔ̄nɔ wu lə i tu fwoo fieŋ fie ə mi go. 9 Kwaalə i chuu bə mi lə, “Kinchɨnə kɨŋŋ kkɨŋ nnəə bə wə wunə bə wə, yulahalə muŋga muŋŋ bà bənɨŋ ə mbɛɛ mə gəŋ kpee həŋgbɔŋ bwɔɔ nnu i biaŋ.” Nəni nlə n'yee ŋ'wō njənjə, mbaa nhləə yu biaŋnə kɨŋŋ kah bu kahnə fo muŋga mu Kleto duŋ ə yee mu nɨ̄ŋ ə mi go. 10 Fi hlə yee fi dūŋ lə, nlə n'yee ŋ'wō njənjə bə biaŋnə kɨŋŋ maa bəntɔnɔ bbəŋ bə́ tò mi, maa bəŋgə bbəŋ ŋ'wò maa wuh ŋŋəŋ bəne hlɔ̀ɔ ə mi dɨŋ, bə bəŋgə bbəŋ bə́ bə̀lə mi yu Kleto. Ŋ'wò njənjə nəni yulahalə bwɔɔ nnu mbiaŋ, kəə ə bwɔɔ yo bəŋ nnu nduŋ lə n'yee ndūŋ ntaabə.

Ŋgɨŋ nnu Pwɔɔ mà kənə bə kimbumə ki bəne bə kimbemi bə Kɔlɛŋ

11 Njaa chu nfili! Kwaalə ə duŋ bəŋ bbəŋ bə fəə mi nchu lə. Ə bəŋ bbəŋ bə duŋ lə yee bə nyīi mbɛɛ nnu ndùŋ yo. Maa ye nduŋ lə kə wunə fieŋ, fi kə duŋ nə lə bəne bbəŋ bə́ chèe bie go ŋəbə lə bəŋgaŋ bə bəne bə faŋnə bə Jisho ko kah mi. 12 Bieŋ bbɨŋ bi nyìi muŋga mu Chu bə bieŋ biŋkpee gbo maa bieŋ bi ŋɨŋ gəə, bi duŋ mmà ŋkwaala biwɛɛ gbaaŋ nhlə n'yee nfə̄ bi ə bəŋ mə. Bɨhŋ nini lə binyiinə bbɨŋ bi nyìi lə mbɛɛ duŋ mbɛɛ faŋnə Jisho Kleto chɛɛŋ chɛɛŋ. 13 Ə màa fieŋ filaha ffɨŋ mmà nfə bə bimbumə bi bəne bə kimbemi bidi nshe bəŋ, kahiŋ lə mmà ŋkə ntoo lə bəŋ ntiɛ ju ndili lə yee bə chɨ̄nə mi lə? Bə laamə nə gbenə kɨŋŋ bə fimbini fie fieŋ!

14 Nu mi, nnu mbwɛɛla bəmbwo ə bəŋ go ə chá bəŋ shɔ. Duŋ ə mbwo bə kindili kidi ə bəŋ bəŋ kə, yu ŋkiɛɛ lə ə duŋ bieŋ bieeŋ kə. Ŋkiɛɛ ə duŋ bəŋ. Ŋkiɛɛ ə duŋ bəŋ yu ə kə duŋ nə bwɔni bbəŋ bə́ kənə bəŋkili bieŋ bi bətili bəbə bə bəmahni bəbə kə. Ə kili bəche bwɔni bə bəmah bwɔni bieŋ bi bwɔni bəbə. 15 Nlə n'yee ŋ'wō njənjə gbaaŋ bəmbihi fieŋ finhliŋ ffɨŋ ŋkənə ə bəŋ go maa bənnə maa gbo wuŋŋ bə bəŋ. Ə duŋ lə nleki bəŋ gbaaŋ, ə bə kaka yee bə lēki mi chɛɛ lə? 16 Bə ŋəŋna bə kichɛɛŋ lə mmà ŋkə too lə bəŋ kindili kidi kə. Kwaalə bəne yɔ̄ɔ lə mmà ŋ'wɛɛna fihi bəŋ bə yo kaalənə. 17 Ləkə mbɛɛ ju ə bəne bbəŋ mmà nfaŋ bie mə bə bəŋ mà fiha bəŋ ə yii lɨŋŋ bəŋ lə? 18 Mmà nnoŋna Taytu lə i bwo ə bəŋ mə, baa faŋ ŋgwoŋ ya yo lə bəə wu bwo. Taytu mà biila je bə bəŋ bwɔɔ nnu i mà bwo lə? Bee wu mà kə fəə bieŋ bə ŋgɨŋ mwi, kkə jaa gbu mwe lə?

19 Bwɔɔ ju duŋ ə yee bə hlē lə ye kkə bie kkə yɔ̄ɔlə nəni duŋ lə kkə kiɛɛ lə kkə fwɔŋ go ŋiaa ə bəŋ fwi. Kkə yɔɔ ye bəne bə Kleto ə Chu fwi. Bəmbweŋ bəŋŋ bə tɔ́ŋ, bieŋ binhliŋ bbɨŋ kkə fə̀ bə bəŋ duŋ bənfə lə yee bə kō bu konə. 20 Nlɔ lə duŋ ə nja mbwo ŋəŋ bəŋ bə kə duŋ nə ye ŋkiɛɛlə lə yee bə dūŋ, ə bə nakə ŋəŋ nə dəŋ nduŋ ye bə kiɛɛlə lə n'yee ndūŋ kə. Nlɔ lə duŋ ə mbwo ŋŋəŋ bəne kpə̀nə bikpənini, bə́ lùhuŋ bimi, bə́ kə̀nə tɔŋ fwa fwa, bə́ dè kwaa ə duŋ biwu bibə, bə́ bìhi yíi ŋə bəne, bə́ dù dunə, bə́ wè kiŋ'we kinya, bə́ dùŋ hlaamə hlaamə. 21 Nlɔ lə bwɔɔ nnu n'yá mbaa bwo, ə Chu ŋgwəŋ fə ə gbo yee wi bēe mi, maa lə ə n'yee njuuli yu bəne bbəŋ bə́ mà fə yíwaha yí nyɛninə bəŋ'waali kiwaali, ə duŋ bə́ kə tookwaŋ ə bi go kə.