2 Kɔlɛŋ 13

Pwɔɔ yɔɔ bə bəne bbəŋ bə́ fə̀ yíwaha lə yee bə́ jə̂ bwɔɔ

Fɨhŋ duŋna chá yɨŋŋ shɔ yyɨŋ mbwō ə bəŋ go. Kiŋwaati ki Chu yɔ̄ɔ lə,

“Ə bə́ hlɔmɔ mbɛɛ, kəə bə́ lə kiɛɛ bəne bəfwe ləkə bətɔh,

bə́ lemi ə nhlaah yo dɨŋ.”

2 Ə mà duŋ bwɔɔ nnu mmà mbwo ə bəŋ go ə chá fie bəŋ, mmà n'yɔɔla bə bəne bbəŋ bə́ dùhŋ kinduŋh ki yiwaha lə bə́ jə bwɔɔ. Mbaa n'yɔ̄ɔ bə bə́ fidiɛɛ maa bə bəne bənhliŋ maa ye ndùŋ lə kə duŋ nə ə bə́ fwi lə yee bə́ jə̄ bwɔɔ yulahalə bwɔɔ nnu n'yá mbaa bwo, ə n'yá mbaa kwo hlɨŋ bə mbɛɛ ju kə dududu. 3 Ye bə kiɛɛlə lə nfə fieŋ ffɨŋ fi nyìi lə ə yɔɔ Kleto bə bəŋ kah ə mi mə, kəə nlə nfə. Ə kə duŋ nə lə i yo mbiaŋ bənnə bəŋ bəŋgə kə. I kə̀nə muŋga ə bəŋ mə. 4 Ə chɛɛŋ lə bə́ màa bə́ bwēeni wu ə kiŋgwa go i duŋ mbiaŋ. Kwaalə fidiɛɛ duŋ i yo həmə ŋkee ə muŋga mu Chu mə. Ye kkə bumə lə bə wu, kkə duŋ bəmbiaŋ dəŋ ye i biaŋ lə. Kwaalə ə muŋga mu Chu mə, duŋ kkə lə yee kkə dūŋh bə wu kkə nɨ̀ŋ bə bəŋ.

5 Bə hlaah bikuu bieeŋ ŋəŋ lə bə bie ə kimbemi mə lə. Bə mɔŋ ə duŋ go ŋieeŋ. Bə kə ŋəŋ nə lə Jisho Kleto duŋ ə bəŋ mə lə? I yo ba ə bəŋ mə, ə duŋ kə duŋ nə lə bə mɔŋna go ŋieeŋ ŋəŋ lə bə gbee. 6 Ŋkələ ba lə bə lə ŋəŋ lə kkə kə gbee kə. 7 Kkə chèe Chu lə bə kə jaa fə fieŋ ffɨŋ fi dùŋ kə duŋ nə fi kiyəyəŋ. Kkə kiɛɛlə lə bəne yee bə ŋə̄ŋ lə kkə kaah ba bimɔŋnə bie. Kwaalə kkə chèe ə duŋ lə yee bə fə̄ ə duŋ fieŋ fi yəəŋ maa ye kkə nyieelə lə kkə gbee bimɔŋnə bie.

8 Duŋ ə kkə nakə yee kkə fə̄ fieŋ dududu ffɨŋ fi nòo kichɛɛŋ kə. Duŋ ə yee kkə fə̄ kwaa ə duŋ ffɨŋ fi fwɔ̀ŋ kichɛɛŋ. 9 Bwɔɔ nnu kkə bìaŋ bə tà gbo, kkə yee kkə wō njənjə gbaaŋ. Chu cheenə ya duŋ kwaa lə bə ko gəŋ kpee həŋgbɔŋ həŋgbɔŋ. 10 Fiee fieŋ ffɨŋ mbieŋ fɨhŋ bieŋ bɨhŋ bə bəŋ ə duŋ ŋkaani kə bwoo, fo bwɔɔ nnu nlə mbwo, nnakə kənə bənjə muŋgeni mmuŋ Baba nəə mi lə n'yee nlō bulonə bə bəŋ. Muŋgeni muhŋ lə mmuŋ i nə lə ŋ'wɛɛ bəŋ mu, ə kə duŋ nə lə nhlaki bəŋ ə nhlaki mə kə.

Cheenə ki Pwɔɔ ki həŋgbɔŋ

11 Bəmbwo kpee bəŋgwoŋ, n'yu nchēe bəŋ lə kkə she. Bə lɛhiŋ go ŋieeŋ, bə wo keehnə kɨŋŋ, yee bə dûŋ die mi, bə dùhŋ ə kindunshiiŋ mə, nəni ə Chu kinleki bə kindunshiiŋ hlə yee i dūŋ bə bəŋ. 12 Bə chee go ŋieeŋ, yohi yohinə ki bəne bə Chu. 13 Bəne bbəŋ bə́ dùŋ bə Chu bənhliŋ bie bə́ chēe bəŋ. 14 Tɔŋ linwaa li Baba Jisho Kleto, bə kinleki ki Chu, maa kimbumə ki Fiana Wɛɛŋ yee i dūŋ bə bəŋ bənhliŋ.