2 Kɔlɛŋ 11

Pwɔɔ bə bəne bbəŋ bə́ kàalə yo lə bə́ duŋ bəne bə faŋnə bə Jisho

Ŋkɔ̄nɔ lə bə tu kwaa kwáŋ ə mi go n'yɔɔ biyɔɔnə binfili nəni chɛɛ. Butee, bə cheekwaŋ! 2 Ŋkənə díi ŋəŋge bə bəŋ ə duŋ ŋə Chu. Bə duŋ bə mi ye hlɔŋ ŋiaŋ kpɛ nnu i kaani kə kələ bənəə, ə duŋ nnu ŋkaala chi bəmbwo nə wu bə nyo mwi ə duŋ Kleto. 3 Kwaalə n'yu nlɔ̄ lə ə dəŋ yəəŋ ye yɔ mà wɛɛnə lə fihi If, duŋ ə bə́ yá bwo hlahi bufe bweeŋ, ə bə she je kichɛɛŋ maa je wɛɛŋ nni bə bə̀lə Kleto ə yi mə. 4 N'yɔ̄ɔ nəni yulahalə bə bie bə jīŋ, bə lɛ̀ɛ ə fieŋ finhliŋ mə. Ə mbɛɛ lə ja bwo yee i dōntə ki Jisho ju chili, ə duŋ kə duŋ nə nnu kkə mà dontə yo kiih bə bəŋ, ləkə fiana ju chili, ə kə duŋ nə nnu bə́ mà jə ə Chu kwáŋ kə, ləkə ki hlɨŋ nwaa ji chili ə duŋ nni bə́ mà kə jəə ə be kwáŋ kə, kəə bə lə bu jiŋ lɛɛ dəŋ ə yi mə. 5 Nhle lə bəne bbəŋ bə́ chèe bie bə́ lə bəŋgaŋ bə bəne bə faŋnə bə Jisho ko lə kah mi kə. 6 Maa ə fi lə duŋ lə ŋkə ŋkələ biyɔɔnə bbɨŋ bə́ nlàanə bu laanənə kə, ə fi nakə duŋ nə lə ŋkə̀lə lə fieŋ fidi ki Chu kə. Fɨhŋ lə fieŋ ffɨŋ kkə nyiila bə bəŋ ə jé mə yinhliŋ maa ə bieŋ mə binhliŋ.

7 Ye mmà mbwo lə ndòntə hlɨŋ nwaa Chu bə bəŋ nya bikoonə hləŋ, fi hlə yee fi dūŋ lə mmà nfəə ə duŋ yiwaha bəmbwɔkwe bə gbo wuŋŋ nəni fo nlə mbihiŋ bəŋ lə? 8 Duŋ ə n'yɔɔ lə mmàa n'yī bimbumə bi bəne bə kimbemi bidi kwe kwe, ye mmàa njə̄ lə kinchɨnə ə bə́ kwáŋ, nnɨ̀ŋ bə bəŋ. 9 Bwɔɔ nnu mmà duŋ bə bəŋ, mmà ŋkə too lə ntiɛ ju ə mbɛɛ ju fi kə, bwɔɔ nnu mmàa ŋkə̄nə kinhle ki fieŋ. Bəŋgwoŋ biaa bbəŋ bə́ mà bwo ə Meshedonia màa bə́ nə̄ fieŋ finhliŋ ffɨŋ mmàa ŋkīɛɛ. Nəni ə fieŋ finhliŋ mə mmà nɨhŋna bəntoo ntiɛ ə bəŋ bəŋ. Ə lə kwaa ye nlə n'yee nɨ̄hŋ nəni. 10 Ye kichɛɛŋ ki Kleto duŋ lə ə mi go, mbɛɛ ju hləŋ ə bidi bieeŋ bi Akeya mə nnu duŋ ə i maalə kijə kɨŋŋ ə fieŋ ffɨŋ ŋ'wè ə fi bəŋ kə. 11 Mmàa nnɨ̄hŋ kinchɨnə ə bəŋ kwáŋ nəni yulaha lə? Ə yu nlèki lə bəŋ kə lə? Nlèki bəŋ Chu kə̀lə dəŋ lə.

12 Fieŋ ffɨŋ nfə̀ nlə mbà kwaa n'yee nfə̂ fi, fo nlə mbaŋ je bə bəne bbəŋ bə́ kìɛɛ bie lə bə́ ŋəŋ lə kkə duŋ yəəŋ bee bə́ ə fieŋ ffɨŋ bə́ wè fie ə fi go. 13 Bəne bie kə duŋ nə dəŋ bəne bə faŋnə bə Kleto bə kichɛɛŋ kə. Bə́ dùŋ bəne bə nimi bə fihinə. Bə́ lèe Kleto hə bushi lə bə́ duŋ bəne biih bə faŋnə. 14 Fɨhŋ nini kə duŋ nə fieŋ fi gənə nə kə. Maa Hlaata bə gbo wiih i bà bənlee fieŋ fidi dí lə i dùŋ nchinda kinchaa. 15 Nəni ə kə duŋ nə fieŋ fi naamənə lə bwɔɔ nnu bəne biih bə nimi fii dəŋ gbo bənyiee lə bə́ duŋ bəne bbəŋ bə́ kèeh bəne ye fwɔ wintiiŋ kənə bənduŋ. Ki həŋgbɔŋ kibə yá yi duŋ dəŋ yəəŋ ye fwɔ wibə duŋ lə.

Pwɔɔ yee i hlə̄ə ki bəŋgə bbəŋ i mà ŋəŋ

16 Mbaa nchū bəŋ lə mbɛɛ kə jəə mi lə nduŋ nfili kə. Kwaalə maa ə bə lə jə mi lə nduŋ nfili, bə cheekwaŋ fo nlə n'yɔɔ dəŋ biyɔɔnə bi kiŋ'we chɛɛ ye nfili lə. 17 Fieŋ ffɨŋ n'yɔ̀ɔ ki fi ŋ'wè ə fi bəŋ ŋkə lɔɔ kə, duŋ n'yɔ̄ɔ lə bə muŋgeni mu Baba kə dəŋ. N'yɔ̄ɔ ə duŋ ye nfili lə. 18 Ye bəne kiŋaaŋkə wè lə ə jé yí bəne bə yaŋ mbiŋ nu mə, kəə duŋ dəŋ ə n'yee ŋ'wē. 19 N'yɔ̄ɔ nəni yu bə tɨ̀ŋ bə jə̀ bənfili bə kintɨŋ bə yɔ̀ɔ lə bə kənə bufe! 20 Bə tookwaŋ lə yee bəne jə̄ bəŋ bə chù bənfwa bəbə, bə́ dì ə bəŋ go, bə́ bìŋ ə bəŋ bəŋ, bə́ wè, bə́ kə̀h bəŋ bə bia dí. 21 Ŋkənə bən'yɔɔ lə giaali le li kwō mi lə kkə màa kkə dūŋ ŋkwo ya bɛɛɛ, kkə nɨhŋ nakə fəə nəni kə!

Kwaalə ə fieŋ lə duŋ mu ffɨŋ duŋ ə mbɛɛ yee i hlə̄ə mu, kəə mi dəŋ nduŋ ə n'yee nhlə̄ə bə fimbini fie fieŋ. Mbaa n'yɔ̄ɔ fɨhŋ ye nfili lə. 22 Ə bəne bie lə duŋ Bəhiblu, kəə nduŋ dəŋ ju. Ə duŋ lə bə duŋ bəne Bəishlael, kəə nduŋ dəŋ ju. Ə bə́ duŋ bəne bə kichəŋ ki Ablahaŋ, kəə nduŋ dəŋ ju. 23 Ə bə́ lə duŋ bəne bbəŋ bə́ nɨ̀ŋ bə Kleto, kəə ŋkah bə́ bu kahnə bə fimbini fie. (N'yu n'yɔ̄ɔ fɨhŋ ye mbɛɛ ja lə.) Nnɨŋna nimi kah bə́, nduŋna ə chəŋ munfwa mə kah bə́, bə́ kwuŋ mi chá yí kə faa kə, nlɔɔlə ə kpe kwáŋ chá bəŋ chá bəŋ. 24 Njəə hlí ə kwáŋ ŋə Bəjuu mə chá shiŋ, ə cha mi mə nni bə́ hloola mi ə jɨnə kwaa mi lə yí bwii mbwɛɛnya. 25 Bəlumaŋ mà kwuŋna mi chá shɔ bə muntələ. Bəne bədi tɨŋ mi bə tə́ cha mi. Chəŋ nni njɔ mà hlaka bə mi chá shɔ, nduŋna ə nɔ mə fu shi nɔŋ mə. 26 Njaala gbaaŋ, ə she chɛɛ lə nɔ di mi, nfwoo kwoo nnakə kpee ə kwáŋ ŋə bə buyi mə, nfu dəŋ kwoo nnakə kpee ə kwáŋ ŋə bəne bəŋŋ bə kitɨŋ mə, mbaa fu dəŋ kwoo nnakə kpee ə kwáŋ ŋə nfúuntə mə, nfwoo kwoo nnakə kpee ə kibalaki mə, nfwoo kwoo nnakə kpee ə nji, nfwoo kwoo nnakə kpee ə nɔ mə, nfwoo dəŋ kwoo nnakə kpee ə kwáŋ ŋə bəne bbəŋ bə́ kàalə yo lə bə́ dùŋ bəŋgwoŋ bəŋŋ ə Kleto mə. 27 Nnɨŋna gbaaŋ mbòŋ yohinə. Nnɔ̀ŋ kinɨŋ kə nɔŋ nə chá kiŋaaŋkə. Nduŋna bə jəbulə maa ŋgwiŋ mə ŋwinə hləŋ. Nduŋna chá kiŋaaŋkə maa fidinə hləŋ, nduŋna ə fuu nte kindu hləŋ. 28 Bəmbaa yiinə ə bieŋ bɨhŋ bəŋ, ndùŋ kwaa bə ntiɛ ŋkuntaŋ ə joo ŋənhliŋ mə, yu munhlenə mmuŋ ŋkə̀nə ki bimbumə bi bəne bə kimbemi go bənhliŋ. 29 Bwɔɔ nnu mbɛɛ duŋ mbiaŋ, kəə nlə n'yee ndūŋ dəŋ mbiaŋ. Ə mbɛɛ lə fə lə ju yee i fə̄ yiwaha, kəə fi nlo mi go gbaaŋ. 30 Ə fi lə duŋ ba lə n'yee ŋ'wē, ə n'yee ŋ'wē ə duŋ bə bieŋ bbɨŋ bi nyìi lə ndùŋ mbiaŋ. 31 Chu nnu i dùŋ Chu bə Che Baba Jisho nnu kiŋkohi dùŋ bə wu bwɔɔ mənhliŋ kə kaa, i kə̀lə lə ŋkaalə lə yo kə. 32 Bwɔɔ nnu mmà nduŋ ə Damashku, mbɛɛ hlaahnə nnu i mà duŋ ə Ŋkɨŋ Aleta kwe i mà yɔɔlə yee bəne fwōŋ fwiih ŋə mbaŋ kibalaki kie fo bə́ lə kwo mi. 33 Kwaalə bəne jə mi yii ə kijee mə, fwoo mi ə bwɔɔ ki fiwulə fi mbaŋ mə hlili mi bweenə, nhlə nlɔɔlə ə wu kwáŋ.