2 Kɔlɛŋ 10

Ə Chu nnu i shaa Pwɔɔ lə yee i dûŋ mbɛɛ hlɨŋ Jisho Kleto

Mi Pwɔɔ kibɛɛ, n'yu ŋkwī bəŋ kwáŋ ə jé yí kindunshiiŋ bə yi kində go ki Kleto mə. Ə mi nnu bə́ yɔ̀ɔ yo lə bwɔɔ nnu ndùŋ bəŋ fwi ndùŋ nlokə nlokə, bwɔɔ nnu ndùŋ wɛɛ wudi n'yɔ̀ɔ bɛɛŋki bɛɛŋki. 2 Ŋkɔ̀nɔ bəŋ bu kɔnɔnə lə bwɔɔ nnu nlə mbwo, bə kə fəə lə nja n'yee n'yɔ̄ɔ nlokə nlokə bə bəŋ ye duŋ ə n'yee n'yɔ̄ɔ bə bəne bbəŋ bə́ hlè lə kkə fə̀ bieŋ bələ ə duŋ kinhle ki bəne bə yaŋ ə mbiŋ nu mə kə. 3 Ə chɛɛŋ lə kkə duhŋ yaŋ ə mbiŋ nu mə, kwaalə kkə tɨ̀mə lə ntɨmə ya bələ ye bəne bə mbiŋ nu tɨmə lə kə. 4 Bieŋ bbɨŋ kkə tɨ̀mə ntɨmə ya mu kə duŋ nə bi mbiŋ nu mə kə. Bieŋ bbɨŋ kkə tɨ̀mə ntɨmə ya mu kənə muŋga mmuŋ mu fù ə Chu kwáŋ, bəŋkpee bidɔhɔ bintaabə mu. 5 Kkə bà bənjə bieŋ bi ntɨmə bɨhŋ kkə kpèe noonə ki bəne mu, kkə bwɔ bə hləənə kinhliŋ kkɨŋ ki kəə lə bəne kə yee bə kə̄lə Chu, kkə kɨ̀ŋ dəŋ munhlenə mu bəne mu, kkə fə̀ bə́ wò ə duŋ bə Kleto. 6 Bwɔɔ nnu bə nyìi lə bə bie bə wō bə Kleto bə tɔ́ŋ ŋieeŋ ŋənhliŋ, ə kkə hlə nə mbɛɛ mənhliŋ ŋgə nnu i kaani i tà kwoo bə Kleto.

7 Bə kee ŋəŋ fieŋ ffɨŋ fi dùŋ ə bəŋ dí! Ə mbɛɛ lə kələ ba bə kichɛɛŋ lə i dùŋ ŋwuŋ Kleto, yee i hlē lə ye i duŋ lə mbɛɛ Kleto, ə lə yəəŋ dəŋ ye kkə dùŋ. 8 Maa ə duŋ dəŋ lə nja n'yee ntūu kɔŋ gbaaŋ yu muŋgeni mmuŋ kkə kə̀nə mmuŋ Baba nəə ə giaali kwo mi kə. Muŋgeni muhŋ duŋ bəŋ'wɛɛ bəŋ mu bu wɛɛnə, mu kə duŋ nə bənhlaki bəŋ bu hlakinə kə. 9 Ŋkə kiɛɛlə lə yee fi nyīee ye nlɔ̄hiŋ lə bəŋ bə biŋwaati bɨŋŋ kə. 10 N'yɔ̄ɔ nəni yulahalə bəne bədi ja bə yɔ̀ɔ kɨŋŋ, bə́ yɔ̀ɔ lə, “I bà bəmbieŋ biŋwaati bintaabə bə binlo, kwaalə bwɔɔ nnu i bwò ə bəne dí i chu bɛɛŋki bɛɛŋki. Biyɔɔnə biih kə bwii lə fieŋ fidi kə.” 11 Bəmbini bie bəne yee bə́ kə̄hlə lə fieŋ ffɨŋ kkə yɔ̀ɔ ə biŋwaati mə bwɔɔ nnu kkə duŋ kə duŋ nə, kkə lə yee kkə fə̄ fi bwɔɔ nnu kə hə bwo.

12 Kkə jù lə dududu bəmanta go, ləkə fɛhiŋ go ŋiaa bə bəne bədi bbəŋ bə́ yɔ̀ɔ bie bə biwu bibə ye bə́ duŋ kə. Ye bə́ fɛhiŋ lə go ŋəbə bə́ bə́, bə́ manta dəŋ go ŋəbə bə́ bə́, fi nyìi lə bə́ kələ lə fieŋ fidi kə. 13 Ŋkwo ya duŋ kkə wè lə kahiŋ ju kə. Kkə wè kkə ba ə ju wwuŋ Chu nəə be ə kwáŋ lə kkə nɨŋ bwo bwii maa ə bəŋ go. 14 Kkə lè lə ə duŋ ju ye kkə bwò lə kkə bwìi ə bəŋ go kə. Kkə mà duŋ bəne bə fwii bənjaa bə hlɨŋ nwaa ki Kleto bwo bwii maa ə bəŋ go.

15 Kkə wè lə lə kkə lee ju kə. Fi duŋ lə kkə wè lə bə nimi llɨŋ bəne bədi nɨŋna kə. Kwaalə fieŋ ffɨŋ kkə chiini fwi kkə kə̀lə duŋ lə, ye kimbemi kieeŋ kò lə ki gə̀ŋ fwi fwi, ə lə ye wɛɛ wi nimi liaa ə bəŋ mə lə yee li kò dəŋ li gə̀ŋ fwi kinwaakə. 16 Nəni ə kkə hlə le dɔhɔ kieeŋ yee kkə dōntə hlɨŋ nwaa kkə gə̀ŋ ə bidi bidi mə, ə fi nakə duŋ nə lə kkə wè bə nimi llɨŋ bə́ nɨŋna ə dɔhɔ ki mbɛɛ ju mə kə. 17 Fi hlə yee fi dūŋ ye bə́ bieŋna lə ə Kiŋwaati ki Chu mə lə,

“Bwɔɔ nnu mbɛɛ kiɛɛ lə yee i wê, yee i wê bə fieŋ ffɨŋ fi dùŋ nfə Baba.”

18 Mbɛɛ nnu i nyìi bə gbo wiih lə i duŋ mbɛɛ yəəŋ, ə wu kə nnu Baba bèmi lə i dùŋ mbɛɛ yəəŋ ə wu dí. Ə Baba nnu i bèmi mbɛɛ lə i dùŋ yəəŋ nnu i dùŋ yəəŋ ə wu dí.