2 Kɔlɛŋ 9

Nnə llɨŋ Chu lèki

Kinhle kidi kə baa lə duŋ dəŋ kkɨŋ ki dùŋ lə n'yee mbīeŋ bu bieŋnə bə bəŋ ki nimi lɨhŋ bənchɨnə bəne bbəŋ bə́ dūŋ bə Chu bə Judia kə. 2 Ŋkələ lə bə kəna ŋgɨŋ bənchɨnə bə́. Ə yu fimbini fie fieŋ ffɨŋ ŋ'wò gbo yu fi bə bəne bə Meshedonia kieeŋ. N'yɔ̄ɔ lə bəŋ bə bidi bi Akeya mə duŋ bə mà hlaa bwɛɛ ə kaani ə kigoŋ kkɨŋ ki mà kah kie mə bənchɨnə. Ŋgɨŋ nnu bə kənə yo bə nnə hlə fə dəŋ tɔ́ŋ ŋə bəne kiŋaaŋkə ə bə́ mə jaka. 3 Kwaalə, n'yu nfāŋ bəŋgwoŋ biaa bəhŋ bə bəŋ, fo kiŋ'we kkɨŋ kkə wè kie yu bəŋ ə diɛɛnə kɨhŋ mə kə fwoo nya kə. N'yu nfāŋ bə́ fo bə lə yee bə dūŋ bə hə bwɛɛla ye mmà yɔɔlə lə bə lə yee bə dūŋ. 4 Kahiŋ nəni, ə fi duŋ lə be bə bəne bədi bə Meshedonia lə ja bwo ŋəŋ bəŋ, ə duŋ bə kaani kə bwɛɛ lə go kə, ə gbo wibeenə duŋ ləhəŋ bə be, gbɛntɛlɛ bəŋ bbəŋ kkə maa kkə yīi bie bufe ə bəŋ mə lə? 5 Fiee fieŋ ffɨŋ fi fə nhlə nhle lə finwaa lə ŋkɔnɔ bəŋgwoŋ biaa bəhŋ lə bə́ hlaa kah fwi bwo ə bəŋ go bwɛɛ nnə liŋkuntaŋ lɨhŋ bwɔɔ kaani nnu bə mà kaachi yo bənnə. Nəni ə nnə le hlə yee li dūŋ bə bwɛɛla lə ə nnə llɨŋ bə nəə ə kinleki kieeŋ mə, ə kə duŋ nə lə bə́ mii jə ə bəŋ kwáŋ bu miinə kə.

6 Yee bə kə̂lə lə mbɛɛ nnu i dɔ̀ chɛɛ, yá yi gba dəŋ chɛɛ, mbɛɛ nnu i dɔ̀ kiŋaaŋkə, yá yi gba dəŋ kiŋaaŋkə. 7 Mbɛɛ mwi mwi ə bəŋ mə kənə bənnə ye i hlè lə ə tɔŋ liih go, i kə nəə i kpà gbo ləkə i nə̀ ye bə́ yə̀ə lə wu bu yəənə kə. Yee bə kə̂lə lə Chu lèki mbɛɛ nnu i nə̀ bə kintɨŋ. 8 Chu duŋ ə i hləmə bəŋ bə bieŋ binhliŋ, fə ə yee bi ŋāŋ gbaaŋ, fo bə lə yee bə kə̄nə fieŋ finhliŋ bwɔɔ mənhliŋ fi wunə bəŋ bənhliŋ, ə bə hlə yee bə nɨ̄ŋ nimi linwaa linhliŋ mu kinwaakə. 9 Fi duŋ bə́ bieŋna lə,

“I ŋwoŋna nnə́ ə ŋwoŋ mə bə bəne bənjɨnənə,

bifənə biih bintiiŋ lə ba yee bi dūŋ bwɔɔ mənhliŋ.”

10 Ə Chu nnu i nə̀ ŋgɔ bə mbɛɛ wɛɛh bə biləə bə́ dì, i yá yi nə dəŋ baa yiinə ŋgɔ bieŋ bieeŋ fə kinduŋh kieeŋ kintiiŋ bwo bəŋ bə bigbanə kiŋaaŋkə. 11 Chu yá yi nə dəŋ bəŋ kiŋkuntaŋ ə jé yinhliŋ mə bənfə lə yee bə wɛ̄ kwáŋ ŋieeŋ kinwaakə bə bəne bədi, fo bəne lə yee bə́ nə̄ kimbaafɛɛ bə Chu bwɔɔ nnu bə yá kənə nnə lɨhŋ ə kwáŋ ŋiaa mə. 12 Nimi lieeŋ linwaa llɨŋ bə nɨ̀ŋ lɨhŋ bwò lə ə duŋ bə bieŋ bbɨŋ bəne bbəŋ bə́ dùŋ bə Chu kìɛɛ kwaa kə, li fə̀ dəŋ bəne nə̀ kimbaafɛɛ bə Chu ə jé mə kiŋaaŋkə. 13 Nimi lɨhŋ lə nyii bəne bbəŋ bə dùŋ bie, ə bəne hlə yee bə́ fāŋ kindohi ki Chu yu ŋ'wo nnu bə wò yo ki hlɨŋ nwaa ki Kleto nni bə fwɔ̀ŋ ye. Bə́ lə yee bə́ fāŋ dəŋ kindohi ki Chu ye bə wɛ̄ lə kwáŋ ŋieeŋ bə bə́ maa bə bəne bədi bənhliŋ. 14 Bə́ yáa bə́ chēe Chu bə bəŋ, bíwɛɛ bibə dùŋ ə bəŋ mə gbaaŋ yu kinchɨnə ki Chu kkɨŋ ki kah muŋga munhliŋ kkɨŋ i nyiila bə bəŋ. 15 Yee kkə nə̂ kimbaafɛɛ bə Chu bə nnə liih liŋkuntaŋ llɨŋ duŋ ə mbɛɛ nakə yɔɔ lə ye li dùŋ lə kə.