2 Kɔlɛŋ 8

Keehnə ye duŋ ə bəne bə kimbemi yee bə́ nə̄ nnə bə bəne bədi

Bəŋgwoŋ biaa, kkə kiɛɛ lə bə kələ fieŋ ffɨŋ kinchɨnə ki Chu fəə bə bimbumə bi bəne bə kimbemi ə bidi bi Meshedonia mə. 2 Bəŋgə bəntaabə mɔŋna bə́ gbaaŋ. Kwaalə kintɨŋ kiŋkuntaŋ kkɨŋ bə́ kəna fəə bə́ jə ba bwɔɔ wɛ kwáŋ ŋəbə ŋənhliŋ bə bəne bədi maa ye bə́ duŋ lə ə njɨnənə kiŋkuntaŋ mə. 3 Fieŋ ffɨŋ nduŋ ə n'yɔ̄ɔ duŋ lə ə màa bə́ bbəŋ bə́ mà hle lə bə́ lə nə nnə́ ye muŋga mubə duŋ lə. Lə yee bə́ nə̄, bə́ nə kahiŋ ye bə́ mà duŋ lə bənnə. 4 Bə́ mà kɔna be gbaaŋ lə kkə bu nə bə́ je bən'yii kwáŋ ə nimi llɨŋ mə bənchɨnə bəne bbəŋ bə́ dùŋ bə Chu. 5 Bə́ mà fəə fieŋ ə jé yyɨŋ kkə mà kə hlee lə duŋ ə bə́ fə ə yi mə kə. Bə́ mà hlaa bwo nə go ŋəbə bə Baba, hlə nə dəŋ bə be ye Chu kiɛɛ lə.

6 Nəni, kkə hlə noŋ Taytu lə, ye i mà chɔɔ lə nimi lɨhŋ ə bəŋ mə, i gəŋ fwi bə li chɨnə bəŋ bəŋkaanə nimi li kinchɨnə lɨhŋ. 7 Ye bə kələ lə ba bənfə bieŋ binhliŋ kinwaakə, bieŋ bbɨŋ bi dùŋ ə wɛɛ wi kimbemi mə, bbɨŋ bi dùŋ ə wɛɛ wi biyɔɔnə mə, bbɨŋ bi dùŋ ə wɛɛ wi bufe mə, bbɨŋ bi dùŋ ə wɛɛ wi kinhle ki fənə fieŋ mə, bə bbɨŋ bi duŋ ə wɛɛ wi kinleki kkɨŋ bə duŋ bə ki ə wɛɛ waa mə, kkə hlə yee kkə lēki lə bə kələ ba bəŋ'wɛ kwáŋ ŋieeŋ kinwaa ə nimi li kinchɨnə lɨhŋ mə.

8 N'yɔ̄ɔ lə nəni nnə ə duŋ ŋkɨnə kə. Mmɔŋ bəŋ bu mɔŋnə bəŋəŋ lə kinleki kieeŋ duŋ dəŋ ki kichɛɛŋ, nfɛhiŋ bə ŋgɨŋ nnu bəne bədi kənə bənfə bieŋ. 9 N'yɔ̄ɔ nəni yulahalə bə kəla tɔŋ linwaa llɨŋ Baba ya Jisho Kleto mà kənə. Maa ye i mà duŋ lə mbɛɛ kiŋkuntaŋ, i mà jaa chu mbɛɛ njɨnənə yu bəŋ, fo njɨnənə kiih lə fə ə bə chu bəne bə bieŋ. 10 Ə diɛɛnə ki nnə lɨhŋ mə, ŋkiɛɛ lə nnə kɨŋŋ keehnə. Fi duŋ yəəŋ lə ə bəŋ bbəŋ bə mà chɔɔ bie ə kigoŋ kkɨŋ ki mà kah kie mə bənfə fieŋ, ə kə duŋ nə dəŋ bənfə fieŋ kwaa kə, bə mà duŋ dəŋ bəne bbəŋ bə́ mà chɔɔ bəŋkənə kinhle bənfə fieŋ. 11 Bə bu gəŋ fwi kaanə nimi le, fo bə kaanə li bələ ye muŋga mweeŋ duŋ, ə fi jaa gbu mwe bə ŋgɨŋ nnu bə kə̀nə yo bənfə fieŋ. 12 Yee bə kə̂lə lə, ə mbɛɛ lə kənə ŋgɨŋ bənnə, kəə Chu lə jə nnə liih bələ fieŋ ffɨŋ mbɛɛ yo duŋ bə fi. Ə i nakə bələ ə duŋ fieŋ ffɨŋ mbɛɛ yo duŋ fi hləŋ kə. 13 N'yɔ̄ɔ lə nəni lə bwɔɔ nnu bə nə̀ bənchɨnə bəne bədi lə bə́ kaka kpe bu kpenə kə. Ə fieŋ fi fənə fo wɛ́ɛ ŋənhliŋ lə yee ŋə kə̄nə yəəŋ. 14 Ye bə kənə lə bieŋ gbaaŋ fidiɛɛ, bəne bədi jɨ̀nə, duŋ ə bə chɨnə bə́. Bwɔɔ nnu bə́ kənə dəŋ gbaaŋ ə bwɔɔ yo bəŋ, ə bə jɨnə, ə bə́ chɨnə chuu bəŋ. Nəni ə kiwɛɛ kinhliŋ hlə yee ki kə̄nə yəəŋ. 15 Fi duŋ ye bə́ bieŋna lə lə,

“Mbɛɛ nnu i mà buhuŋ kiŋaaŋkə,

i mà kənə kwaa wunə wunə.

Mbɛɛ nnu i mà buhuŋ chɛɛ,

i mà kə jɨnə kə.”

Pwɔɔ faŋ Taytu ə Kɔlɛŋ

16 Nnə kimbaafɛɛ bə Chu nnu i chiee kinhle kieeŋ ə tɔŋ li Taytu mə yəəŋ ye kkɨŋ ŋkənə kie bə bəŋ. 17 I kə bemi bəmbwo ŋəŋ bəŋ yu kkə kɔna wu kwaa kə. I yu bwō ə bəŋ mə bə ŋgɨŋ wi ye i màa i kə̄nə lə ŋgɨŋ gbaaŋ bə bəŋ. 18 Kkə faŋ wu bə ŋgwoŋ ya nnu bə́ kələ yo ə bimbumə bi bəne bə kimbemi mə binhliŋ ə hlɨŋ nwaa go nni i jàa i dòntə. 19 Ə kwaa fimbini fie ki wu kə. I mà duŋ dəŋ mbɛɛ bimbumə bi bəne bə kimbemi nnu bə́ mà bwa lə yee i jāa bə be ye kkə jàa lə kkə fə̀ nimi ki kinchɨnə kɨhŋ. Nimi lɨhŋ duŋ bənfə lə bəne yee bə nə̄ kiŋkohi bə Baba kibɛɛ, maa bənyii lə kkə kənə ŋgɨŋ bənchɨnə bəne bədi. 20 Kkə kiɛɛ lə fieŋ fidi kə duŋ nə həmə ffɨŋ mbɛɛ lə yee i tōo be ŋgə ə fi go ki nnə liŋkuntaŋ llɨŋ kkə nɨ̀ŋ le ə li go kə. 21 Kkə jù ba gbaaŋ lə kkə fə ə duŋ fieŋ ffɨŋ fi dùŋ yəəŋ ə kə duŋ nə ə Baba di kwaa kə. Kkə jù bənfə ə duŋ fieŋ ffɨŋ fi dùŋ dəŋ yəəŋ ə bəne di.

22 Kkə bie kkə fāŋ dəŋ ŋgwoŋ ya ju bə bə́ nnu kkə mɔŋna ŋəŋ wu chá kiŋaaŋkə ə bieŋ mə kiŋaaŋkə, ŋəŋ lə i kə̀nə ŋgɨŋ bənfə bieŋ. I dùŋ fidiɛɛ i kə̀nə ŋgɨŋ weŋ gbaaŋ, yulahalə i yiila tɔŋ liih ə bəŋ mə gbaaŋ. 23 Mbɛɛ ye Taytu lə duŋ nnu i duŋ mbɛɛ nnu bee wu jàa gbu mwe, ə duŋ dəŋ mbɛɛ nnu bee wu nɨ̀ŋ ə fieŋ bəŋ fimwi yu bəŋ. Ə chu chuu ə wɛɛ wi bəŋgwoŋ biaa bədi bie mə, bə́ dùŋ bəne bə hlɨ́ŋ bə bimbumə bi bəne bə kimbemi bbəŋ bə́ fə̀ kiŋkohi gəŋ ə Kleto go. 24 Nəni, bə nyii kinleki kieeŋ bə bə́ wɛɛŋ, fo bimbumə bi bəne bə kimbemi lə ŋəŋ lə gbo wwuŋ kkə hlə̀ə we yu bəŋ dùŋ yəəŋ.