2 Kɔlɛŋ 7

Bəmbweŋ bəŋŋ bə tɔ́ŋ, ye Chu nəə lə bəŋkaachi bəhŋ bə be nəni, kkə wii fieŋ finhliŋ ffɨŋ fi bìhi go ŋiaa maa fiana ya. Yee kkə dūŋ wɛɛŋ gəŋ kpee həŋgbɔŋ ye kkə duhŋ lə lə kkə lɔ̀ Chu.

Pwɔɔ wo njənjə lə bəne bə Kɔlɛŋ gaana tɔ́ŋ ŋəbə

2 Bə wɛ tɔ́ŋ ŋieeŋ bə be. Kkə mà kə fəə yiwaha bə mbɛɛ ju kə. Kkə mà kə diee mbɛɛ ju kwe kwe kə, kkə mà kə fihi mbɛɛ kə. 3 N'yɔ̄ɔ lə nəni lə n'yu n'yīi bəŋ ə ŋgə mə kə. N'yɔɔla bə bəŋ lə bə duŋ tɔ́ŋ ŋiaa, bəŋkpe ləkə bənduŋ fa, kəə kkə lə yee kkə dūŋ kwaa mbuhuŋ. 4 N'yiila tɔŋ lɨŋŋ ə bəŋ mə gbaaŋ. Ŋkənə kiŋ'we kiŋkuntaŋ yu bəŋ. Tɔŋ lɨŋŋ le li də̀ gbaaŋ yu bəŋ. Ə bəŋgə bənhliŋ mə bbəŋ kkə ŋə̀ŋ, ndùŋ ŋ'wò kwaa ə duŋ njənjə.

5 Maa ye kkə mà lɛɛlə ə kitɨŋ ki Meshedonia mə, kkə màa kkə dūŋ kə kənə kindunshiiŋ kə. Kkə màa kkə kə̄nə bəŋgə kiwɛɛ kinhliŋ. Bəne màa bə́ kīɛɛ be kijə, kkə màa kkə kə̄nə dəŋ nɨŋ ə tɔ́ŋ ŋiaa go. 6 Kwaalə, Chu nnu i dìɛɛ yo tɔ́ŋ ŋə bəne bbəŋ bə́ dùŋ ə hlɨŋ yi kwonə mə mà bwoo diɛɛ tɔ́ŋ ŋiaa bəmbwo nnu Taytu mà bwo yo. 7 Ə màa kwaa mbwo wi yo nnu i mà diɛɛ tɔ́ŋ ŋiaa kə. Ə màa dəŋ ə je nni bə mà diɛɛ liih tɔŋ mu. I mà yɔɔla bə be lə bə bie bə kīnhle gbaaŋ bəŋəŋ ə mi go, bə ye bə juuli lə bə go ŋieeŋ bə fieŋ ffɨŋ fi mà kah, bə ye bə kənə lə kinhle ə mi mə. Ye ŋ'wo lə nəni, mbaa ŋ'wò njənjə gbaaŋ.

8 Maa ə fi lə duŋ dəŋ lə kiŋwaati kkɨŋ mmà mbieŋ kie bə bəŋ mà fəə yee bə dūŋ juu juu, kəə ndè lə gbo kə. Kwaalə, mmà ndee kwaa dəŋ gbo yulahalə n'yu ŋŋə̄ŋ lə kiŋwaati kɨŋŋ kie mà fəə bə chu duŋ juu juu. Kwaalə, bə mà duŋ juu juu ə bwɔɔ bəŋ chɛɛ kwaa. 9 Nhlə n'yee ŋ'wō njənjə fidiɛɛ, ə kə duŋ nə yu bə bie juu juu kə. Ə duŋ yu njuuli nu mà fəə bə gaanə tɔ́ŋ ŋieeŋ. Bə mà duŋ juu ə duŋ ə je nni Chu kìɛɛ mə. Nəni kkə mà kə fəə fieŋ fidi fiwaha bə bəŋ kə. 10 Ə mbɛɛ lə kənə juulinə ə je nni Chu kîɛɛ mə, kəə duŋ ə fi fə ə i gaanə tɔŋ liih. Ə fɨhŋ nini bwo wu ə duŋ bə kinfukwoo, ə fi nakə bwoo wu ə duŋ bə fieŋ ffɨŋ mə lə yee i dē gbo bə fi kə. Kwaalə, ə mbɛɛ lə kənə juulinə ə je bəne bə yaŋ mbiŋ nu nte mə, kəə ki yá bwo bə kpe.

11 Bə ŋəŋ fieŋ ffɨŋ juulinə kkɨŋ Chu kìɛɛ bwoo bəŋ bə fi. Bə ŋəŋ ye bə jəə bieŋ ntakə gbaaŋ. Bə ŋəŋ dəŋ ye bə fəə fieŋ finhliŋ bənyii lə bə lə bə kwáŋ ə fieŋ fiwaha fie mə kə. Bə ŋəŋ dəŋ lə fieŋ fie loo bəŋ go. Bə ŋəŋ nɨŋ nni bə kəna. Bə ŋəŋ kinhle kiŋkuntaŋ kkɨŋ bə kənə bəŋəŋ ə mi go. Bə ŋəŋ kinhle kkɨŋ bə kənə bənfə bieŋ ntiiŋ. Bə ŋəŋ dəŋ dɨŋ ŋgə nnu bə nə̀ yo bə mbɛɛ nnu i mà fəə həkunə. Ə fieŋ finhliŋ mə duŋ bə nyiila lə bə kənə lə dəŋ kwáŋ ə diɛɛnə kie mə kə dududu. 12 Nəni, maa ye mmà mbieŋ lə dəŋ kiŋwaati kie bə bəŋ, duŋ mmà ŋkə bieŋ nə yu mbɛɛ nnu i mà fə yo həkunə kə, ləkə mbɛɛ nnu bə́ mà fə yo həkunə bə wu. Mmà mbieŋ lə fo bə lə nyii go ŋieeŋ ə Chu fwi lə bə kə̀nə ŋgɨŋ ya. 13 Nəni fɨhŋ nini fəə tɔ́ŋ yee ŋə də̄ be.

Bənyiinə ə tɔ́ŋ ŋiaa ŋəndə go, kkə bie kkə wō njənjə gbaaŋ yu njənjə nnu Taytu yu wō yo yu bəŋ bənhliŋ fəə tɔŋ liih yee li də̄. 14 Maa ye mmàa nhlaa lə ŋ'wē bə bəŋ yu Taytu, bə nakə nəə mi giaali kə. Kiŋ'we khɨŋ kkə màa kkə wē kie bə bəŋ yu Taytu nyìi lə ə kichɛɛŋ. Ə duŋ dəŋ yəəŋ ye fieŋ finhliŋ ffɨŋ kkə màa kkə bā bən'yɔɔ bə bəŋ duŋ dəŋ chɛɛŋ. 15 Bwɔɔ nnu wu Taytu hlè ye bəŋ bənhliŋ mà wo wu, bə ye bə mà tɨŋ jə wu bə lɔ̄, bə nə̄nə, mə lə baa leki bəŋ gbaaŋ kah lə. 16 Ŋ'wò njənjə dəŋ yu n'yiila bufe buŋŋ ə bəŋ mə gəŋ kpee həŋgbɔŋ.