2 Kɔlɛŋ 6

Bəŋgə bbəŋ Pwɔɔ mbɛɛ hlɨŋ Jisho Kleto màa i ŋə̄ŋ

Ye kkə nɨŋ lə mbuhuŋ bə Chu, kkə hlə yee kkə kwī dəŋ bəŋ kwáŋ lə, bə kə jəə kinleki kkɨŋ Chu nəə bəŋ fə lə ki chu fieŋ fi nya kə. 2 Chu mà yɔɔla lə,

“Bwɔɔ yəəŋ mà bwo wunə, nnə bituŋ bɨŋŋ bə wə.

Butuu bu funə kwoo mà bwo wunə, nchɨnə wə.”

Bə kee ŋəŋ, fidiɛɛ lə bwɔɔ ntiiŋ, butuu buhŋ lə bu funə kwoo.

3 Kkə fə̀lə fieŋ ffɨŋ dududu lə yee fi bāŋ je mbɛɛ ju kə. Kkə fə̀ nəni fo bə́ lə nakə ŋəŋ nə gbenə kidi ə nimi liaa mə kə. 4 Kwaalə, kkə nyiila go ŋiaa ə jé mə yinhliŋ lə kkə dùŋ bəne bə nimi bə Chu. Kkə nyiila ə jé yyɨŋ kkə kwàa tɔ́ŋ gbaaŋ ə bəŋgə mə bbəŋ kkə ŋə̀ŋ bə bwɔɔ nnu bieŋ tà bə bwɔɔ nnu je dùŋ hləŋkə bə be. 5 Bəne ja bə́ ba bəŋkwuŋ be, bə́ ja bwɔɔ ju bə́ yìi be ə chə́ŋ yí munfwa mə, bəne ja bə́ kìɛɛ be bidiɛɛni. Kkə ja bwɔɔ ju kkə kə̀h gbo bə nimi, kkə nɔ̀ŋ bwɔɔ ju kinɨŋ kə nɔŋ nə, kkə ja bwɔɔ ju kkə kpè bə jəbulə. 6 Kkə nyii dəŋ ə jé yaa yí nchaa mə, bə ye kkə kə̀lə bieŋ ki Chu, bə ye kkə kwàa biwɛɛ, bə ye kkə kə̀nə tɔ́ŋ ŋənwaa bə bəne. Kkə dùhŋ kkə bə̀lə ye Fiana Wɛɛŋ nyii, kkə lèki bəne bə kinleki ki kichɛɛŋ. 7 Kkə ba bən'yɔɔ kwaa ə duŋ biyɔɔnə bi kichɛɛŋ, kkə fə̀ bieŋ ə muŋga mu Chu mə. Kkə ba bəŋkənə fwɔ wintiiŋ wi duŋ ye bieŋ bi ntɨmə lə ə kwaŋ wi diee bə wi məə mə. 8 Kkə nyìi dəŋ bəne bbəŋ kkə duŋ bie, ə hle bəne bwɔkwe bə be, ə hle bə́ nakə bwɔɔkwe bə be, ə hle bə́ yɔɔ bieŋ biwaha ə be go, ə hle bə yɔɔ bieŋ binwaa ə be go. Bəne jə̀ be lə kkə dùŋ bəne bə fihinə, kwaalə ə duŋ kkə dùŋ bəne bə kichɛɛŋ. 9 Bəne duŋ duŋ bə́ ja yee bə́ fə̄ nəni ye bə́ duŋ lə kə kələ be, kwaalə ə duŋ bəne kə̀lə be kinwaa. Kkə jà kkə nyìee lə kkə dùŋ bəŋkpi, kwaalə bə́ kee ŋəŋ, kkə duŋ bəŋkee. Bəne ba bənnə be ŋgə, kwaalə bə́ kə jii lə be kə. 10 Kkə dùŋ nəni ye bəne bbəŋ bə́ dùŋ lə ə hlɨŋ yi kwonə mə, kwaalə kkə tɨ̀ŋ bwɔɔ mənhliŋ, kkə dùŋ ye bəne bənjɨnənə lə, kwaalə kkə fə̀ bəne kiŋaaŋkə duŋ bəne bə kpo. Kkə dùŋ ə waalə kkə kənə lə dəŋ fieŋ kə dududu, kwaalə kkə kə̀nə bieŋ binhliŋ.

11 Bəne bə Kɔlɛŋ, kkə yɔɔla bə bəŋ kə nələ fieŋ kə. Kkə wɛɛ tɔ́ŋ ŋiaa chi yə bə bəŋ. 12 Kkə kə baŋ nə tɔ́ŋ ŋiaa bə bəŋ kə. Ə baŋ bəŋ tɔ́ŋ ŋieeŋ bə be. 13 N'yɔ̄ɔ bə bəŋ ye bwɔni bəŋŋ lə lə, yee bə fə̂ yəəŋ ye kkə fə̀lə bə bəŋ, bə wɛ̀ dəŋ tɔ́ŋ ŋieeŋ bə be.

Mbɛɛ kimbemi kə yee i dūŋ fieŋ fimwi bə mbɛɛ nnu i dùŋ kə duŋ nə mbɛɛ kimbemi kə

14 Bə kkə yee bə dûŋ fieŋ fimwi bə bəne bbəŋ bə́ dùŋ kə duŋ nə bə kimbemi kə. Ə duŋ ə fieŋ fintiiŋ bə fiwaha jaa ləhəŋ hlə yee fi dūŋ ə fieŋ mə fimwi lə? Kinchaa bə jɨbə duŋ ə bi kənə kimbumə lə? 15 Duŋ ə Kleto bə Beliya^ª duŋ die mi lə? Fieŋ ffɨŋ fi bùhuŋ mbɛɛ kimbemi bə mbɛɛ nnu i dùŋ kə duŋ nə mbɛɛ kimbemi duŋ laha lə? 16 Chəŋ ntofi Chu kənə laha bənfə bə bəcheh bə yaŋ mbiŋ nu nte lə? Yee bə kə̂lə lə kkə dùŋ chəŋ ntofi Chu nnu i dùŋ ŋkee. Fɨhŋ nini duŋ ye Chu mà yɔɔlə lə,

“Nlə n'yee ndûhŋ ə bə́ mə, njàa ə bə́ mə.

Nlə n'yee ndûhŋ Chu bə́,

bə́ dùŋ bəne bəŋŋ.”

17 Nəni, Baba yɔɔ lə,

“Bə fu ə bə́ mə, yee bə dûŋ chili ə bə́ mə.

Bə kə tuu lə ə fieŋ fi nyɛninə go kə,

ə nhlə tɨŋ jə bəŋ.

18 Nlə n'yee ndûhŋ chwa weŋ,

bə dùŋ bwɔni bəŋŋ bəniɛ bə bəkwɛ.

Fɨhŋ nini lə n'yɔɔ Baba nnu i Kə̀nə yo Muŋga Munhliŋ.”