2 Kɔlɛŋ 5

Gbo wifwɔ wwuŋ kkə yá kənə ə buh

Kkə kələ lə ə bə́ lə hlaki kikɔ kkɨŋ ki dùŋ kɨhŋ go ŋiaa ŋŋəŋ kkə dùŋ ŋie bə ŋə ə mbiŋ nu mə, kəə kkə kənə chəŋ ə Chu kwuŋ nni bə́ kə wɛɛ lə ə duŋ bə kwáŋ kə. Mbini ye lə chəŋ nni buh, ə duŋ nni i dùŋ bwɔɔ mənhliŋ. 2 Ye kkə duŋ lə fəŋ fidiɛɛ kkə kwìni gbaaŋ yulahalə kkə dè gbaaŋ lə bə́ lee chəŋ nni buh ye ə be go ye kindu lə. 3 Ə yá ə duŋ bwɔɔ nnu bə́ yá lee mbini ye ə be go, ə kkə nakə yee kkə dūŋ go ŋə ŋɨmə kə. 4 Ye kkə kaani lə kkə duŋ ə kikɔ kɨhŋ mə, bəŋgə bbəŋ kkə dùŋ ə bə mə fə̀ kkə kwìni gbaaŋ. Fi kə duŋ nə lə kkə kiɛɛ lə bə́ fwoo bindu bbɨŋ bi dùŋ bie ə be go kə. Kkə kìɛɛ lə bə́ lee be bindu bbɨŋ bi duŋ bie bi buh ə be go, fo kinduŋh ki kə kaa lə me go ŋiaa ŋəhŋ, ŋŋəŋ ŋə duŋ ŋie ə ŋə kpe. 5 Ə Chu nnu i bwɛ̀ɛ be lə kkə kənə fieŋ fɨhŋ. I nəə be Fiana Wɛɛŋ ye kwoo ki fieŋ finhliŋ ffɨŋ kkə yá bwo kənə ə wu kwáŋ.

6 Nəni, kkə hlə yee kkə dūŋ bwɔɔ mənhliŋ kkə kə̀lə fɨhŋ kə naamə kə. Kkə kələ lə ye kkə duŋ lə ə go ŋəŋ mə ə mbiŋ nu mə nəni, kkə duŋ je nyɛɛkə ə Baba go.

7 Kkə fə̀ bieŋ ə duŋ yu tɔŋ llɨŋ kkə yii le ə Chu mə, kə duŋ nə yu kkə ŋə̀ŋ ə wu go kə. 8 Kkə duŋ nə ba bə naamənə ki fɨhŋ kə, fi nwaa lə kkə she go ŋəhŋ, gəŋ yee kkə dūŋ bə Baba ə kwili liih mə. 9 Fi hlə yee fi dūŋ lə ləkə kkə bie bə wu ə wu kwuŋ, ləkə lə kkə kaani wɛɛ wudi, fieŋ ffɨŋ kkə kìɛɛ duŋ bənfə lə yee i wō ə duŋ njənjə. 10 Yee bə kə̂lə lə be bənhliŋ duŋ lə kkə yá bwo lemi ə Kleto fwi ə i hlaah be, fo mbɛɛ mwi mwi lə kənə bikoonə biih yu bieŋ bbɨŋ i màa i fə̄ ə gbo wiih mə, ləkə finwaa ləkə fiwaha.

Nimi li fənə lə yee bəne lɛ̂hiŋ bieŋ bə Chu

11 Ye kkə kələ lə fieŋ ffɨŋ fi dùŋ bənlɔ Baba, kkə hlə yee kkə jū bənfə lə bəne gaanə munhlenə mubə. Chu kələ ba bəne bbəŋ kkə dùŋ bie gbaaŋ. Nhle lə bəŋ dəŋ kələ kinwaa ə tɔ́ŋ ŋieeŋ mə bəne bbəŋ kkə duŋ bie. 12 Ye kkə yɔɔlə nəni, fi kə baa lə duŋ lə kkə kiɛɛ lə kkə baa nyii go ŋiaa bə bəŋ kə. Kkə nə kwaa bəŋ je lə yee bə bīhiŋ go yu be. Nəni ə bə hlə kənə fieŋ fidi ffɨŋ duŋ ə bə chuu bə bəne bbəŋ bə́ wè bə bieŋ bbɨŋ bə́ ŋə̀ŋ ə bəne go ə bə́ dí, ə kə duŋ nə bbɨŋ bi dùŋ ə tɔ́ŋ ŋəbə mə kə. 13 Ə duŋ lə bikuu jàa be, kəə bi jàa yu Chu. Ə duŋ lə bi lèmi be, kəə bi lèmi yu bəŋ. 14 Fieŋ ffɨŋ fi fə̀ kkə hlə yee kkə gə̄ŋ fwi fwi bə fieŋ ffɨŋ kkə fə̀lə kinleki kkɨŋ Kleto kə̀nə bə be. Kkə fə̀lə nəni yu kkə bema lə mbɛɛ mwi mà kpee yu bəne bənhliŋ, yee fi dūŋ lə bəne bə mu bie bənhliŋ mà kpee ba dəŋ. 15 I mà kpe yu bəne bənhliŋ fo bbəŋ bə́ dùŋ bie lə nakə yee bə́ dūŋ ə bə́ kwáŋ kə. Kwaalə yee bə́ dūŋ yu mbɛɛ mbini nnu i mà kpe yo fu ə kpe mə yu bə́.

16 Nəni, gbe jə fidiɛɛ gəŋ fwi duŋ kkə baa lə kee mbɛɛ ə je mbɛɛ ŋkee mə kə. Maa ə fi lə duŋ lə kkə mà hlaa kee Kleto ə je mbɛɛ ŋkee mə, kəə kkə baalə kee wu fidiɛɛ ə je mbini ye mə kə. 17 Fieŋ ffɨŋ fi dùŋ duŋ lə, ə mbɛɛ lə duŋ nnu i buma bə Kleto, kəə i yo mbɛɛ fwɔ. Bieŋ biko binhliŋ kaah, bieŋ binhliŋ choo bifwɔ. 18 Fɨhŋ nini finhliŋ duŋ ə fə Chu nnu i mà baa jə chuu yo be ə wu go ye i mà lɛhiŋ bieŋ bi kah ə Kleto mə. I nəə be nimi li fənə lə yee bəne lɛ̄hiŋ bieŋ bə Chu. 19 Fi duŋ lə, ə màa ə Kleto mə nnu Chu mà lɛhiŋ bieŋ bə bəne ə mbiŋ nu mə lə bə́ chu bə wu. I nakə yee i baa i gɔ̀ɔ bigaa bi yíwaha yibə kə. Ye i mà fələ nəni i hlə nə hlɨŋ lɛhinə bieŋ ni ə be kwáŋ lə yee kkə yɔ̂ bə bəne. 20 Kkə hlə yee kkə dūŋ fəŋ ə dɔhɔ ki Kleto mə, Chu kàh ə be mə i nòŋ bəne. Nəni kkə kwì bəŋ kwáŋ ə yiih li Kleto bəŋ lə bə chu dɨŋ gəŋ lɛhiŋ bieŋ bə Chu. 21 Ə yu be bbəŋ wu Chu mà fə Kleto nnu i mà kə kələ yiwaha, i ja chu yiwaha, fo kkə lə chu ntiiŋ ə Chu fwi yu wu.