2 Kɔlɛŋ 4

Nchu hlɨŋ nwaa ə shó mə

Nəni ye kkə kənə lə nimi lɨhŋ ə duŋ Chu nnu i kwoo hlɨŋ nə be, kəə duŋ ə go ŋiaa yee ŋə kpē be kə. 2 Kkə fiila kinhlaŋ kiaa bə bieŋ bbɨŋ bəne fə̀ ə nələ mə bbɨŋ bi dùŋ bi giaali. Kkə nɨhŋna je fihinə. Kkə yìi lə yo kaalənə ə die Chu mə kə. Kkə bà bən'yɔɔ kwaa ə duŋ kichɛɛŋ wɛɛŋ wɛɛŋ, kkə nyìi go ŋiaa bə mbɛɛ mənhliŋ ə Chu fwi, fo bə́ lə hle kələ bəne bbəŋ kkə dùŋ bie. 3 Maa ə duŋ dəŋ lə hlɨŋ nwaa nni kkə dòntə ni duŋ nni fieŋ bàŋ yi, kəə fi bàŋ kwaa ə duŋ bə bəne bbəŋ bə́ là bu lanə. 4 Bə bəne bbəŋ bə́ dùŋ bie kə bemi hlɨŋ nih, duŋ nnu Hlaata nnu i dùŋ yo fiŋkwini fi mbiŋ nu kəəla bufe bubə bə jɨbə. I fə nəni fo bə́ lə nakə ŋəŋ nə ə kinchaa ki hlɨŋ nwaa kkɨŋ ki dùŋ kie ki kiŋkuntaŋ ki Kleto nnu i bù yo Chu. 5 Yee bə kə̂lə lə kkə dòntə lə ə duŋ ki go ŋiaa kə. Kkə dòntə ə duŋ ki Kleto Jisho lə i dùŋ Baba. Kkə dùŋ fiaa bəne bbəŋ bə́ nɨ̀ŋ bə bəŋ yu Jisho. 6 Chu nnu i mà yɔɔ yo lə,

“Kinchaa fu ə jɨbə mə yee ki tə̄”,

ə Chu nu, nnu i fəə lə kinchaa kiih yee ki tə̄ ə tɔ́ŋ ŋiaa mə bənfə lə kkə kələ kiŋkuntaŋ ki Chu kkɨŋ ki dùŋ ə bushi bu Jisho Kleto go.

7 Nchu hlɨŋ nu dùŋ ə be mə, kwaalə kkə dùŋ ŋkwo ya shó. Kkə duŋ nəni fo fi lə yee fi nyīi lə muŋga mmuŋ mu kàh muŋga munhliŋ ə be go bwo ə Chu kwáŋ ə kə duŋ nə mwaa kə. 8 Bəŋgə bie bə yìilə be kiwɛɛ kinhliŋ, kwaalə bə́ bwuŋ nə be kə. Kkə ja bufe bwaa hlaamə bu hlaamə nə, kwaalə go ŋiaa kpè lə be kə. 9 Bə́ bà bənhlɔɔ wuh ə be dɨŋ, kwaalə Chu kə laamə be kə. Bə́ bà bəŋkəh be kkə gbè həkwe, kwaalə kkə kə kpee kə. 10 Kkə bwò kkə jàa kkə kpè dɨŋ kpe Jisho bwɔɔ mənhliŋ, fo kinduŋh ki Jisho lə yee ki nyīee dəŋ ə be go. 11 Ye kkə duŋ lə bəŋkee, fi duŋ lə kkə bie ba kwaa ə kpe jə bwɔɔ mənhliŋ yu Jisho, fo kinduŋh ki Jisho lə yee ki nyīee ə go ŋiaa ŋŋəŋ ŋə dùŋ ŋie ə ŋə kpe. 12 Nəni kkə hlə yee kkə kpè kpe, kwaalə kpe ya ni bwò ə duŋ bə kinduŋh ə bəŋ mə.

13 Kkə yiila tɔŋ ə Chu mə ye mbɛɛ ju mà yiilə, ye fi duŋ bə́ bieŋna lə,

“Mbema nhlə n'yee n'yɔ̄ɔ”,

be dəŋ bema kkə hlə n'yee kkə yɔ̄ɔ. 14 Kkə kələ lə wu nnu i mà fwoo yo Baba ya Jisho ə kpe mə, i yá yi fwoo dəŋ be bbəŋ kkə dùŋ bie bə Jisho ə kpe mə, hlə jə be bə bəŋ dəŋ gəŋ chi ə wu fwi. 15 Bieŋ bɨhŋ binhliŋ kàh yu bəŋ, fo ye kinleki ki Chu kàh'lə ki gə̀ŋ ə bəne kiŋaaŋkə go, kimbaafɛɛ kkɨŋ bəne nə̀ bə Chu yee ki yìinə, kiŋkohi gə̀ŋ bə Chu.

Bieŋ bbɨŋ kkə ŋə̀ŋ ə bi go kàh bu kahnə

16 Fiee fieŋ ffɨŋ gbo duŋ fie kə kpee be. Maa dəŋ ye go ŋiaa ŋəhŋ yùku lə ŋə gə̀ŋ nəni, tɔ́ŋ ŋiaa gàanə ŋə chù ŋənfwɔ joo ŋənhliŋ. 17 Bəŋgə bətənə bbəŋ kkə ŋə̀ŋ bəhŋ ə bwɔɔ nu bəŋ, duŋ bə́ bwɛɛ ə duŋ kintɨŋ kiŋkuntaŋ kkɨŋ ki dùŋ bwɔɔ mənhliŋ kkɨŋ duŋ ə mbɛɛ nakə fɛhiŋ ki kə. 18 Nəni, kkə kə yii lə ŋkwo ya bufe ə bieŋ bbɨŋ bə́ ŋə̀ŋ ə bi go kə. Kkə yìi ə duŋ ə bieŋ bbɨŋ bə́ duŋ kə ŋəŋ nə ə bi go, yu bieŋ bbɨŋ kkə ŋə̀ŋ bie ə bi go kàh bu kahnə, kwaalə bbɨŋ kkə duŋ bie kə ŋəŋ nə ə bi go, ə bbɨŋ bi dùŋ bwɔɔ mənhliŋ.