2 Kɔlɛŋ 3

Nfɛhiŋ ŋkɨnə ko bə fwɔ

N'yɔ̄ɔ nəni fi duŋ lə kkə baa chu dɨŋ nyii go ŋiaa bə bəŋ lə? Ləkə lə kkə kìɛɛ biŋwaati ye bəne bədi kìɛɛ lə biŋwaati bbɨŋ bə́ bieŋna ləkə bbɨŋ bə bieŋna bbɨŋ bi nyìi dɨŋ bəne bbəŋ kkə dùŋ bie lə? 2 Bəŋ kibɛɛ dùŋ kiŋwaati kiaa kkɨŋ bə́ bieŋna ə tɔ́ŋ ŋiaa go lə mbɛɛ mənhliŋ yee i kə̂lə i chèe dəŋ. 3 Bə nyìi lə bə dùŋ kiŋwaati ki Kleto kkɨŋ kkə bieŋna. Kiŋwaati kɨhŋ kə duŋ nə kkɨŋ bə́ bìeŋ bə fite fi kiŋwaati kə. Bə́ bieŋ ə duŋ bə Fiana Chu nnu i kə̀nə kinduŋh. Bə́ kə bieŋ nə ə duŋ ə ŋəŋgiini ŋə tə́ go kə. Bə́ bieŋ ə duŋ ə ŋəŋgiini ŋŋəŋ ŋə dùŋ tɔ́ŋ ŋə bəne.

4 Fɨhŋ lə fieŋ ffɨŋ kkə yɔ̀ɔ kə naamə ə Chu fwi kah ə Kleto mə. 5 Fi kə duŋ nə lə kkə wuna ə be kwáŋ bənfə fieŋ fidi ffɨŋ duŋ ə kkə ja yee kkə yɔ̄ɔ lə fieŋ fidi fu ə be kwáŋ. Ə Chu nnu i fə̀ kkə wunə. 6 I fəə kkə wuna bənɨŋ ə diɛɛnə ki tɨmə kifwɔ mə. Tɨmə kɨhŋ kə duŋ nə kkɨŋ ki bə̀lə bəŋkɨnə bbəŋ bə́ mà bieŋ bu bieŋnə bə kwáŋ kə. Ə wu Fiana Wɛɛŋ. Bəŋkɨnə bwò ə duŋ bə kpe. Kwaalə Fiana nə̀ ə duŋ kinduŋh bə bəne. 7 Je ko nni bə́ màa bə́ fə̄ ye bieŋ bɨhŋ mə, mà duŋ bə́ mà boo bəŋkɨnə bie ə ŋəŋgiini ŋə tə́ go. Bwɔɔ nnu Mushe màa i bò bəŋkɨnə bie, bəne Bəishlael mà kə baa lə kələ bəŋkee bushi bwii kə, yulahalə ə kinchaa ki Chu kkɨŋ ki màa ki tə̄ ə bushi bwii go. Ə mbini ye je ko nni i màa i bwō ye ə duŋ bə kpe, i bwò i kə̀nə kinchaa ki Chu, ə duŋ kinchaa kkɨŋ ki màa ki chāa nəni ki nyɨ̀ŋ ki gə̀ŋ bu gəŋnə, 8 kəə kinchaa ə je nni bə́ màa bə́ fə̄ bieŋ ə yi mə nni i duŋ Fiana Wɛɛŋ duŋ ə i nakə kaah maa dəŋ kinchaa kie ə ŋkah mə lə? 9 Ə duŋ lə je nni bə́ màa bə fə̄ ye bieŋ ə yi mə màa i bwō bə fieŋ ffɨŋ fi yìi bəne ə ŋgə mə, ki màa ki bwō bə kinchaa ki Chu, kəə je nni bə́ màa bə́ fə̄ ye bieŋ ə yi mə nni Chu jə̀ bəne lə bə́ dùŋ ntiiŋ ə wu dí duŋ ə yee i kə̄nə kinchaa kkɨŋ ki kah kimbini kie! 10 Kichɛɛŋ ki mu duŋ lə fieŋ ffɨŋ fi màa fi bwō fie fi kə̀nə kinchaa ki Chu, fi laala kinchaa ki fi yu kinchaa kkɨŋ ki kò kah kimbini kie bwoo. 11 Ə fieŋ ffɨŋ fi màa fi kā fi gə̀ŋ bu gəŋnə màa fi bwō bə kinchaa ki Chu, kəə kinchaa ki fieŋ ffɨŋ fi bwò bənduŋ bwɔɔ mənhliŋ ko kah fimbini fie bu konə!

12 Ye kkə kələlə nəni kə naamə kə, kəə kkə lə yee kkə dōntə kə lɔɔ kə. 13 Kkə kə duŋ nə ye Mushe nnu i màa i bā yo bəŋkəə bushi bwii bə kindu bənfə lə bəne Bəishlael kə ŋəŋ nə ye kinchaa kkɨŋ ki màa ki tə̄ kie ə bushi bwii go yee ki nyɨ̄ŋ ki kà ki gə̀ŋ. 14 Kwaalə bəne bie mà duŋ bufe bubə jɨka. Maa bwo bwii daŋ, duŋ bwɔɔ nnu bə́ chèe fieŋ ə Kiŋwaati ki Tɨmə Kiko mə, ə bə́ wo, fieŋ fidi yee fi dūŋ həmə ffɨŋ fi kəəla bufe bubə. Ə kwaa ə Kleto mə nnu duŋ ə bə fwoo fieŋ ffɨŋ fi kəə fie fi. 15 Bə kichɛɛŋ bwo bwii daŋ, bə́ chèe fieŋ ə kiŋwaati ki Mushe mə, fieŋ dùŋ kwaa ffɨŋ fi kə̀ə bufe bubə. 16 Kwaalə bwɔɔ nnu mbɛɛ chu yee i dūŋ bə Baba, bə́ hlə fwoo fieŋ ffɨŋ fi kə̀ə fie fi. 17 Baba nu lə Fiana, maa fəhəŋ nnu Fiana nu dùŋ, bəne fù ba ə munfwa mə. 18 Fi duŋ lə, be bənhliŋ bbəŋ kkə dùŋ bie lə fieŋ hləŋkə ffɨŋ fi kə̀ə mənshi miaa, kinchaa ki Baba tə̀ ə be go, ki fə̀ kkə chàa kkə hlə yee kkə gə̄ŋ fwi fwi kkə bù ə duŋ wu. Kiŋgaanə kɨhŋ duŋ ə duŋ nfə Baba nnu i dùŋ yo Fiana Wɛɛŋ.