2 Kɔlɛŋ 2

Ye fi duŋ lə nəni, nhlə kaachi lə mbaalə la bəŋ gbɛŋ wwuŋ wi lə bwo bəŋ bə nlogo kə. 2 Ə nlə nfə bə wo nlogo, ə nyəhə baa duŋ mu nnu duŋ ə i fə ə ŋ'wo njənjə, kahiŋ bəŋ bəmbini bie bbəŋ nfəə bie bə wō nlogo lə? 3 Fiee fieŋ ffɨŋ fi mà fə fie nhlə mbieŋ kiŋwaati kie ə je nni mmà mbieŋ ye mə. Fi mà duŋ lə fo bwɔɔ nnu nlə mbwo ə bəŋ mə, nnakə kənə nlogo ju nnu i fù ə bəŋ mə nnu ə bəŋ bbəŋ bə hə duŋ chəə bənfə lə n'yee ŋ'wō ə duŋ njənjə, yu ŋkələ gbaaŋ ki bəŋ bənhliŋ lə njənjə ŋgwəŋ lə njənjə weŋ bənhliŋ. 4 Yee bə kə̂lə lə kiŋwaati kie mmà mbieŋ nduŋ bə nlogo gbaaŋ, tɔŋ lo mi, ndəŋ yiila mi dí. Mmà ŋkə mbieŋ nə nəni bənfə lə bə wo ə duŋ nlogo kə. Fi mà duŋ bənfə lə bə kələ kinleki kiŋkuntaŋ kkɨŋ ŋkə̀nə bə bəŋ.

Bə laamə nə mbɛɛ nuu i gbee

5 Ə mbɛɛ mà bwo bə nlogo, kəə nlogo nu mà kə duŋ nə kwaa yu mi kə. I mà duŋ dəŋ ə je ji mə bə bəŋ bənhliŋ. (Fɨhŋ kə duŋ nə fieŋ ffɨŋ ŋkiɛɛ lə n'yee n'yɔ̄ɔ nlō ə fi bəŋ gbaaŋ kə). 6 Ŋgə nnu bəne kiŋaaŋkə ə bəŋ mə nəə bə mbini yo mbɛɛ, wuna nəni. 7 Fidiɛɛ duŋ lə, bə laamə nə gbenə kiih fə lə tɔŋ liih yee li də̄, fo hlɨŋ yi kwonə gbaaŋ lə nakə jaa jii wu bu jiinə kə. 8 Nəni, n'yu ŋkwī bəŋ kwáŋ lə bə baa nyii wu lə bə bie bə kaani bə lēki wu. 9 Fiee fieŋ ffɨŋ fi mà fə fie nhlə mbieŋ kiŋwaati kie bə bəŋ, bəmɔŋ bəŋ kələ ləə bə bie bə wō mi ə fieŋ finhliŋ mə lə. 10 Ə bə laamə nə gbenə ki mbɛɛ, kəə nlaama nə dəŋ. Ə nlaamə nə fieŋ, ə duŋ fieŋ ffɨŋ fi dùŋ lə nlaamə nə, kəə nlaama nə ə Kleto dí yu bəŋ. 11 Kkə fə̀ nəni fo hlaata lə nakə jaa lɛɛ mə kənə muŋga ə be bəŋ. Kkə naamə lə ye i ba lə bəŋwɛɛnə kə.

Die Chu tùu ə bəne go ə jé mə chili chili

12 Ə mà duŋ bwɔɔ nnu mmà ŋgəŋ bwii ə kibalaki ki Towa mə bəndontə hlɨŋ nwaa ki Kleto həmə, Baba wɛ mi wulə bənɨŋ nimi liih həmə. 13 Kwaalə bufe buŋŋ mà kə duŋ nə kə, yulahalə mmà ŋkə ŋŋəŋ nə ə ŋgwoŋ Taytu go həmə bəŋ'wo kieeŋ kə. Nəni nhlə nchee bə́ lə kkə she, nhlə mbwo ə Meshedonia bəŋkiɛɛ wu.

14 Kwaalə, kimbaafɛɛ duŋ bə Chu nnu i bà yo bəŋgəŋ be fwi ə Kleto mə bwɔɔ mənhliŋ i nə̀ mbete, kkə bə̀lə wu ye bəne bbəŋ i bəna ə ntɨmə mə. I hlə yee i kāh ə be mə i hlàhi hlɨŋ Kleto ə bidɔhɔ binhliŋ mə, bə́ kə̀lə wu, bə́ wò chee yih ye kijooni kkɨŋ bə́ tɔŋna lə. 15 Kkə dùŋ ye chee kijooni ki Kleto bə Chu ə bəne bbəŋ bə́ fù kwoo mə maa bbəŋ bə́ là. 16 Bə bəne bbəŋ bə́ laa gəŋ duŋ chee nni i bwò ə duŋ bə kpe ə bə́ mə. Bə bəne bbəŋ bə́ fukwoo duŋ bbəŋ chee bə́ bwo ə duŋ bə kinduŋh ə bə́ mə. Ye fi duŋ lə nəni, kəə ə nyəhə həmə nnu i wuna bənfə dɨŋ lɨhŋ nimi lə? 17 Kkə kə duŋ nə ye bəne kiŋaaŋkə bbəŋ bə́ jəə die Chu chuu fieŋ fi shi ffɨŋ bə́ jàa bə́ tàa kə. Kkə duŋ fiaa bəne bbəŋ bə́ dùŋ mbuhuŋ bə Kleto kkə dòntə die Chu ə wu Chu fwi bə tɔ́ŋ ŋənchaa ye bəne bbəŋ i faŋna.