2 Kɔlɛŋ 1

Kiŋwaati ki chá fie kkɨŋ Pwɔɔ mà bieŋ bə kimbumə ki

Kɔlɛŋ

Ə mi Pwɔɔ, nduŋ mbɛɛ faŋnə Kleto Jisho ə kinleki ki Chu mə. Ə bee ŋgwoŋ ya Timɔti. Mbīeŋ kiŋwaati kɨhŋ bə kimbumə ki bəne bə Chu bə Kɔlɛŋ, maa bə bəne bbəŋ bə́ dùŋ bə Chu bənhliŋ bə bidi bi Akeya mə binhliŋ. 2 Chu Tah ya bə Baba Jisho Kleto nyii bəŋ tɔŋ linwaa, baa nə bəŋ tɔ́ŋ ŋəndə.

Ə Chu nnu i dìɛɛ tɔ́ŋ

3 Yee kindohi dûŋ bə Chu nnu i dùŋ yo Chu Che Baba ya Jisho Kleto. I dùŋ Che hlɨŋ yi kwonə, i dùŋ Chu nnu i dìɛɛ tɔ́ŋ ŋə bəne ə bieŋ mə binhliŋ. 4 Ə wu nnu i bà bəndiɛɛ tɔ́ŋ ŋiaa ə bəŋgə biaa mə bənhliŋ fo kkə lə kələ dəŋ bəndiɛɛ tɔ́ŋ ŋə bəne bədi bwɔɔ nnu bə́ duŋ maa ə ŋgə nwɛhɛŋ mə. Duŋ ə yee kkə kə̄lə bəndiɛɛ nəni ə duŋ ndiɛɛ nnu Chu dìɛɛ tɔ́ŋ ŋiaa. 5 Kkə kələ dəŋ yəəŋ lə ye bəŋgə bə Kleto duŋ lə ə be go gbaaŋ, ə dəŋ yəəŋ ye Chu mà kah li ə Kleto mə diɛɛ tɔ́ŋ ŋiaa gbaaŋ. 6 Ə kkə duŋ ə fɨmənə mə, kəə fi duŋ bəndiɛɛ tɔ́ŋ ŋieeŋ maa bənfwoo bəŋ. Ə bə́ diɛɛ tɔ́ŋ ŋiaa, kəə fi duŋ bənfə lə yee tɔ́ŋ ŋieeŋ dē. Fɨhŋ nini lə fə ə bə kələ bəŋkwaa tɔ́ŋ bənduŋ shiiiŋ ə bəŋgə bbəŋ bə ŋə̀ŋ bəhŋ mə ye kkə ŋə̀ŋ lə. 7 Fieŋ ffɨŋ kkə kèe fwi kkə kə̀lə kieeŋ duŋ lə duŋ ə fieŋ fidi nɛhiŋ be kə. Kkə kə̀lə lə ye bə ŋə̀ŋ lə ə bəŋgə go ye be, duŋ dəŋ ə yee bə kə̄nə tɔ́ŋ ŋəndə ye be.

8 Bəŋgwoŋ biaa, kkə kə kiɛɛlə lə yee bə dūŋ kə kə̄lə dɨŋ ŋgə nnu kkə mà wo yo ə kitɨŋ ki Ɛshia mə kə. Mbini yo ŋgə mà taa kah muŋga, yee kkə ŋə̄ŋ lə duŋ ə kkə baa ŋwunə kə. 9 Bə kichɛɛŋ, kkə mà kəla lə fi lema lə kkə lə kpe kwaa bu kpenə. Kwaalə fɨhŋ mà kah nəni bənfə lə, kkə kə yee kkə yîimə ə go ŋiaa go kə, lə yee kkə yîimə ə duŋ ə Chu go. Ə wu mbɛɛ nnu i fwòo bəne ə kpe mə. 10 Wu nnu i mà fwoo yo be ə dɨŋ ŋgə nnu i màa i nyīi yo ə duŋ kpe, mə lə ba bənfwoo. Kkə chiee kwaa bufe bwaa ə wu mə lə mə lə ba kwaa yee i fwōo be bwɔɔ mənhliŋ, 11 ye bə lə yee bə chɨ̄nə lə be bə Chu cheenə weŋ. Nəni ə bəne kiŋaaŋkə hlə yee bə́ nə̄ kimbaafɛɛ bə Chu yu be yu fieŋ finwaa ffɨŋ i koha be bə fi yu Chu cheenə bəne kiŋaaŋkə.

Fieŋ ffɨŋ fi mà fə Pwɔɔ hlə gaanə kinhle ki gbɛŋ wiih

12 Fieŋ fie həmə ffɨŋ kkə wè bə fi, ə duŋ biwɛɛ biaa fwɔ̀ŋ be yu fi. Fi duŋ lə, fwɔ waa yaŋ mbiŋ nte kibɛɛ bə bəŋ duŋ wi wɛɛŋ, ə duŋ chɛɛŋ ye Chu kìɛɛ lə. Kkə fə̀ lə fwɔ wwuŋ wi bə̀lə ə duŋ bufe bu mbiŋ nu kə, kkə fə̀ kkə bə̀lə ə duŋ muŋga mmuŋ mu duŋ mu Chu. 13 Fiee fieŋ ffɨŋ kkə duŋ fie kə bieŋ nə fieŋ fidi bə bəŋ chili kə, kahiŋ ffɨŋ duŋ ə bə chee kələ fi. Ŋkələ lə bə chee kələ fi finhliŋ, 14 dəŋ yeeŋ ye bə kəla lə be fidiɛɛ chɛɛ, fo ə yáa ə dūŋ butuu bbuŋ Baba ya Jisho yá bwo, ə bə yáa bə wē yu be dəŋ yəəŋ ye kkə yáa kkə wēlə yu bəŋ. 15 Ye mmà ŋkələ lə fɨhŋ nəni kə naamə kə, nhlə n'yee ŋkīɛɛ bənhlaa bwo ə bəŋ go, fo bə lə kənə mbɨŋ bwonə ŋgwəŋ chá fie. 16 Mmàa ndɔ̄ lə bwɔɔ nnu n'yáa ŋgə̄ŋ ə Meshedonia, ə n'yá ŋkah je nni bəŋ kwuŋ, bə lə bwɔɔ nnu n'yáa chū dɨŋ ə n'yá baa kah je ə bəŋ kwuŋ, ə bə chɨnə mi ə gbɛŋ wuŋŋ mə ə Judia. 17 Bə hlè lə ye mmà nalə kə bwoo jaa kah nəni, lə mmàa ndɔ̄ nəni nfə̀ ə duŋ nyieenə lə? Ləkə lə ndɔ̀ fieŋ ndɔ̀ ye je mbɛɛ ŋkee nnu yaŋ kwe nnu i bèmi yo fieŋ lə “Eee” i hlə nɨhŋ chuu ə bwɔɔ yo bəŋ lə “Ye” lə? 18 Bə kichɛɛŋ, ye Chu bà lə bənlemi ə die yi bəŋ, fieŋ ffɨŋ kkə yɔ̀ɔ bə bəŋ kə duŋ nə ffɨŋ duŋ ə yee kkə bēmi lə “Eee” bwo fiimə nɨhŋ lə, “Ye” kə. 19 Fi duŋ nəni yulahalə Jisho Kleto Ŋwa Nchu nnu be bee Shila maa Timɔti mà dontə yo die Chu ə bəŋ mə, ŋkə duŋ nə nnu i bèmi yo fieŋ lə, “Eee” i hlə baa nɨhŋ chuu lə, “Ye” kə. Ə ba kwaa lə, “Eee” bwɔɔ mənhliŋ. 20 Yee bə kə̂lə lə ə fieŋ ffɨŋ Kleto fəə, ffɨŋ fi nyìi lə Chu bema bə bəŋkaachi biih bənhliŋ lə “Eee”. Ə duŋ yu fimbini fie ffɨŋ kkə kàh ə Kleto mə kkə yɔ̀ɔ bə Chu lə “Yee fi Dûŋ lə.” Ə nəni nnu kkə nə̀ kiŋkuntaŋ kiih. 21 Ə Chu nnu i lɛhiŋ chi be, lɛhiŋ chi dəŋ bəŋ bə lemi, kkə hlə yee kkə dūŋ ntakə ə Kleto mə. I shaala^ª chi be chili. 22 I gbaa kidaŋ kiih ə be go ə duŋ Fiana wi nnu i chiee ə tɔ́ŋ ŋiaa mə ye kwoo ki fieŋ finhliŋ ffɨŋ kkə yá bwo kənə ə wu kwáŋ.

23 Njaŋ Chu lə i bemi kah bə nhlaa ŋgwəŋ, mmà ŋkə choo dɨŋ ə Kɔlɛŋ yu mmà ŋkiɛɛ lə mbiaalə bəŋ kə. 24 Ə kə duŋ nə lə kkə kiɛɛ bənlemi kwaa lə ə lə nnu kimbemi kieeŋ kənə bənduŋ kə. Kkə kaka yee kkə nɨ̄ŋ bu nɨŋnə bə bəŋ bəmbwo bə kintɨŋ ə bəŋ mə. Kkə kə̀lə lə bə lèmi ntakə ə kimbemi kieeŋ bəŋ.