Jɔnah bemi bəŋgəŋ bə hlɨŋ Chu
3
Baba Chu baa yɔɔ bə Jɔnah ə chá bəŋ fie lə, 2 “Too wə gəŋ ə kibalaki kiŋkwuntaŋ ki Ninibɛ kie mə, wə jaa liŋ hlɨŋ ni n'yɔ̄ɔ ye wə bə bə́.” 3 Nəni Jɔnah wo die Baba Chu hlə ja gəŋ ə Ninibɛ. Ninibɛ nu mà duŋ kibalaki kiŋkwuntaŋ gbaaŋ kkɨŋ duŋ ə mbɛɛ jə joo tɔ ə i hlə jaa le ə ki mə. 4 Jɔnah chɔɔ bənjaa ə kibalaki kie mə butuu bu fwii i lîŋ bə bə́ lə, “Ə she joo mbweenya ə Chu bwo ləhə laa Ninibɛ .” 5 Ye bəne bə Ninibɛ bəŋ mà wo lə die Chu nəni, bə́ bemi yi. Bə́ liŋ lə bəne bənhliŋ shi biləə lee bindu biyi, gbe jə ə bəne bəŋkwuntaŋ go gəŋ bwii ə bətənə go bənyii lə bə́ tookwaŋ ə yíwaha yibə go.6 Bwɔɔ nnu ŋkɨŋ bə Ninibɛ mà wo hlɨŋ ni, i no ə kabala wi muŋkɨŋ bəŋ, fwoo bindu biih bi muŋkɨŋ bie, lee ə duŋ bindu biyi shii ə bu mə. 7 I hlə faŋ nlaŋ bə bənchinda biih lə bə́ jaa liŋ lə, ŋkɨŋ bə bənjii biih yɔɔla lə, “Mbɛɛ ləkə nyaŋ kə mɔŋnə fieŋ jə kə. Mbɛɛ mənhliŋ kə diee fieŋ ləkə ŋwi ŋgwiŋ maa nyáŋ yi chiinə ləkə bənaŋ ləkə shɔ́ŋ. 8 Mbɛɛ mənhliŋ lee bindu biyi kwaa maa bindu biyi bidi ə nyáŋ go. Mbɛɛ mənhliŋ de bə Chu ntakə, tukwaŋ ə yiwaha go maa bieŋ biwaha bintaabə go bbɨŋ i fə̂. 9 Ə kələ nyəhə ləkə Chu lə gaanə kinhle kii ki lo lii liŋkwuntaŋ llɨŋ i duŋ le bə li bə be, ə i nakə chu baa ləhə laa be.”
10 Ye Chu mà ŋəŋ lə fieŋ ffɨŋ bə́ fəə nəni, ye bə́ tu lə kwaŋ ə jé yibə yiwaha go, i hlə gaanə kinhle kii ə ŋgə nnu i mà duŋ yo bənlɛɛ ə bə́ fi, i nakə chu baa lɛɛ wu kə.