Jɔnah 2

Jɔnah Chee Chu

Ye Jɔnah mà duŋ lə mə fiɔɔnə ye bulə, yee i chēe bə Baba Chu nnu i dùŋ yo Chu wi. 2 I màa i chēe yɔɔ lə, “Baba Chu ndee bə wə ə ŋgə ŋgwəŋ nu mə, wə yo mi. Həmə hətə ə kitɨŋ ki bəŋkpi mə, mma ndee bə wə, wə wo ndəŋ məŋŋ. 3 Wə ma lɛɛla mi mmiili bwɔ gəŋ hətə kibɛɛ, maa mə nɔ yo hətə hətə, ŋgwiŋ lə̂əŋkə ə mi bəŋ, kɨmə ki ŋgwiŋ kintaabə fwiilə bə muŋga ə mi bəŋ. 4 Mmaa nhlê lə wə kohaŋ mi ə wə di, kwaalə mi mbema lə nlə mbaa ŋŋəŋ ə chəŋ wa ntofi wɛɛŋ go. 5 Ŋgwiŋ mie ma kəəla mi dududu, mə fɨ̂hɨŋ mi. Nɔ baŋ mi gbo winhliŋ, biyaa binjɔ kaala mi fi. 6 Mmà mbwɔɔ gəŋ ə dɔhɔ kkɨŋ bikɔni chɔɔ həmə, ə kitɨŋ kkɨŋ mbɛɛ gəŋ mə i kə baa lə chu dɨŋ kə. Kwaalə, ooo Baba Chu, nnu wə duŋ Chu ŋgwəŋ, wə fwoo mi mə hətə nyɛkii. 7 Bwɔɔ nnu mma nchu duŋ bəŋkpe, nhle wə Baba Chu, nchee bə wə, wə wo mi ə chəŋ wa ntofi wɛɛŋ mə. 8 Bəne bbəŋ bə́ bwɔ̂kwe bə bəcheh bə nya, bə́ lɛɛla tələ kichɨnə kkɨŋ duŋ ə bə́ hə bənə ə Chu kwaŋ. 9 Kwaalə bə mi, nlə nsheeni yii li kindohi mbaafɛɛ wə mu. Nlə ntofi wə, ə fieŋ ffɨŋ ndɔɔ fie chi bə wə ə nfə fi. Ə wə nnu wə duŋ ə wə fə ə mbɛɛ fukwoo.” 10 Jɔnah chee Chu nəni Baba Chu yɔɔ bə fiɔɔnə ye, i ŋaŋ fwoo Jɔnah həkpa.