Jɔnah 1

Kiŋwaati ki

Jɔnah

Jɔnah nɨhŋ bəŋgəŋ bə hlɨŋ Baba Chu

Butuu budi Baba Chu yɔɔ bə Jɔnah ŋwa mbɛɛ ju nnu bə́ chee lə Amita lə, 2 “Too fidiɛɛ wə gəŋ ə Ninibɛ kibalaki kiŋkwuntaŋ kie mə, wə jaa liŋ ki yíwaha yibə, yi biŋna bwo bwii ə mi go.” 3 Jɔnah kaka ja yee i gə̄ŋ ə duŋ ə Taashi lə i yu lɔ no ə Baba Chu di. I bwɔ gəŋ ə Jopa ŋəŋ chəŋ nni njɔ nni i gəŋ ə kitɨŋ ki Taashi mə. I hluŋ kwoo kiih lɛɛ, lə yee i gə̄ŋ ə Taashi bə bəne bə chəŋ nni njɔ ye ə dɔhɔ kkɨŋ i yu hle kie lə mə yu lɔ̀ no ə Baba Chu di. 4 Kwaalə Chu faŋ fwee kintaabə ki fɨhɨŋ chəŋ nni njɔ ye, kifwuŋ kintaabə kie nɛhiŋ ŋgwiŋ mie, chəŋ nni njɔ ye chu chəələ bənhlaki. 5 Nɨŋ kwo bəne bənhliŋ bbəŋ bə́ màa bə́ nɨ̄ŋ bie ə chəŋ nni njɔ ye mə, mbɛɛ mwi mwi yee i dē bə chu wi lə i chɨnə bə́. Bə́ fwòo bəntiɛ ə chəŋ nni njɔ ye mə bə́ lɛ̀ɛ ə njɔ, fo chəŋ nni njɔ ye lə yaalə ə bə́ nakə miili. Ye fi màa fi kalə nəni, Jɔnah hə bwɔɔ gəŋ ə chəŋ nni njɔ ye mə nte nɔŋ həkwe yee i gɔ̄ kinɨŋ. 6 Taŋ bəne bbəŋ bə́ nɨ̀ŋ bie ə chəŋ nni njɔ ye mə gəŋ dɔhɔ kkɨŋ i mà duŋ kie bii bə wu lə, “Wə nɔŋ ə duŋ kinɨŋ ŋkwo wa fieŋ dɨŋ fɨhŋ ka lə? Ja fa, wə chee bə chu wa ləkə duŋ ə i kwo hlɨŋ bə be ə kkə nakə kpee kə.”

7 Bəne bbəŋ bə́ nɨ̀ŋ bie ə chəŋ nni njɔ ye mə hlə yɔɔ bə go ŋəbə lə, “Bə bwo kkə fo nche, kkə ŋəŋ mbɛɛ nnu i yu bwo yo bə ŋgə nnu yaŋ ə be mə.” Ə chulə bə́ fo nche yo i kwo Jɔnah. 8 Lə i nyii lə, bə́ hlə bii bə Jɔnah lə, “Yɔɔ be mbɛɛ nnu i bwo yo bə ŋgə ə be mə. Wə nɨ̀ŋ laha lə? Wə bwo fəhəŋ lə? Kitɨŋ ko duŋ kiɛhɛŋ lə? Wə duŋ mbɛɛ nuɛhɛŋ lə?” 9 I chuu bə bə́ lə, “Nduŋ Hibulu. Mbɔkwe bə Baba Chu, Chu nnu buh nnu i mà fə yo nɔ bə shishɔ.” 10 Gbo ŋwi bəne bie bə fieŋ fɨhŋ, nəni bə́ hlə bii bə wu ləə, “Fɨŋ lə laha ffɨŋ wə fə̀ nəni lə?” Bə́ mà bii nəni yu bə́ mà kəla lə Jɔnah yu lɔ̀ ə Baba di yulahalə i mà hlaala yɔɔ bə bə́.

11 Ye kifwuŋ kie màa ki kô lə ki gə̂ŋ fwi fwi, bə́ hlə bii bə Jɔnah ləə, “Ə laha ffɨŋ duŋ ə kkə fə bə wə ə kifwuŋ kɨŋ hlə də bə be lə?” 12 I chuu bə bə́ lə, “Bə fwoo lɛɛ mi ə nɔ yo mə ə ŋgwiŋ məŋ hlə də bə bəŋ. Mi ŋkəla lə ə yu mi nnu kifwuŋ kiŋkuntaŋ kɨŋ chili bəŋ.” 13 Bəne bə chəŋ nni njɔ ye ju gbaaŋ bə muŋga munhliŋ bənua chəŋ nni njɔ ye lə i chu həkpa, kwaalə bə́ nakə kaalə mu yulahalə kifwuŋ kie mà kaa bə́ muŋga. 14 Nəni bə́ de bə Baba Chu lə, “Ooo Baba Chu, kkə bie kkə kwî wə kwáŋ lə wə kə jii lə be yu kinduhŋ ki mbɛɛ nu. Wə kə toolə ŋgɔŋ mə mbɛɛ nu ə be fi yulahalə kkə jiila mbɛɛ nnu i dùŋ gbenə hləŋ. Ooo Baba, wə fəə fɨhŋ nini duŋna ye wə kiɛɛlə lə fi duŋ.” 15 Ə chulə bə yɔɔla lə, bə́ jə Jɔnah lɛɛ ə nɔ yo mə, nɔ yo de shiiŋ. 16 Lə bəne bie ŋeŋ lə, bə́ lɔ Baba Chu gbaaŋ, bə́ tofi wu baa dɔ chi bə Chu.

17 Baba Chu bwa fiɔɔnə ŋkwuntaŋ ji i bwo me Jɔnah. Ə chulə fiɔɔnə ye mee Jɔnah, i nɔŋ joo tɔ ə fiɔɔnə ye bulə butuu bə bushi.