Lut 1

Ə mà duŋ ə jóo ŋŋəŋ bəne bəhlaanə kitɨŋ ki Ishlael màa bə hlāah, bwi wintaabə mà gbee ə kitɨŋ kie kwuŋ. Mbɛɛ ju ə kibalaki ki Bɛtuluhɛŋ ə wɛɛ wi kitɨŋ ki Juda mə no bəə kpɛɛ maa bwɔni bəniɛ biih bəfwe bwo kah yee bə́ gə̄ŋ ə kitɨŋ ki Moab mə2 Yii li mbɛɛ yo màa Alimelek, yii li kpɛɛ duŋ lə Naomi, yii ŋə bwɔni biih bəniɛ bəfwe duŋ lə Mahlɔŋ bə Kiliɔŋ, bə́ duŋ bəne bə Eflatis bə́ bwo ə Jelushalɛŋ ə kitɨŋ ki Juda mə. Ye bə́ mà gəŋ lə mə bə́ gəŋ kə ba mə.3 Kwaalə Alimelek nyimi Naomi kpe, i she kwaa bə bwɔni biih bəniɛ bə́ bə fwe bie4 Bwɔni bə bəfwe bəŋ jə bəkwɛɛ bə Moab. Yii li ju yo duŋ lə Ɔfa li ju yo duŋ lə Lut. Bə mà duŋna həmə bigoŋ yuufi.5 Mahlɔŋ bə Kiliɔŋ bwo kpe. Kpɛ yo bu she wu fiih bwɔni biih bəniɛ bəfwe maa nyimi hləŋkə.6 Bwɔɔ nnu Naomi mà bwo yo ə kitɨŋ ki Moab mə lə Baba bwoo bəchɨnə bəne biih bənnə bə́ biləə, Naomi bəə bəkwɛɛ bə bwɔni biih bie bwɛɛ gbo fiimə chu dɨŋ ə bə́ kwuŋ ə bwɔɔ yo bəŋ.7 I hlə no ə dɔhɔ kkɨŋ bə́ màa bə́ dūhŋ kie bə bəkwɛɛ bə bwɔni biih bie bəfwe yee bə́ chū dɨŋ ə kitɨŋ ki Juda mə.8 Kwaalə, i ja yɔɔ bə bəkwɛɛ bə bwɔni biih bie lə, bə kwələ chu dɨŋ ə bəmwah bieeŋ kwuŋ. N'noŋ lə Baba nyii bəŋ kinleki dəŋ yəəŋ ye bə mà nyii lə bə bbəŋ bə́ mà kpe bie maa bə mi.9 Baba hləmə bəŋ, i nə bəŋ bənhliŋ je bə mbənə bənəə. Ye i yɔɔlə nəni, i hlə chee yohiŋ bə́, chii bə́. Bə́ buu ndəŋ yee bə́ dē.10 Bə́ yɔɔ bə Naomi lə, “Ye, kkə kiɛɛ lə kkə gəŋ bə wə ə bəne bwo kwuŋ.”11 Kwaalə, Naomi chuu lə, “Bwɔni bəŋŋ, bə fiimə. Bə bələ mi yulaha lə? Mi ŋkaani bə bwɔni ə bulə bbəŋ duŋ ə mbaa bwee ə bə́ bwo duŋ bənəə bieeŋ lə?12 Bə chu dɨŋ bwɔni bəŋŋ, yee bə gə̄ŋ bəŋ fieeŋ. Mi ndɨŋna bə mbaa ba nyo. Ə nlə nhle dəŋ lə duŋ ə mbaa ba nyo, ləkə lə njəə nyo fidiɛɛ ə kitaŋ bwee bwɔni bəniɛ,13 ə bə ke gəŋ bwii bwɔɔ nnu bə́ yá ta kə jəə bənəə bədi kə lə? Ye, bwɔni bəŋŋ. Fi loo mi go gbaaŋ kah bəŋ yulahalə Baba gbeela ntɨmə bə mi.”14 Bə́ baa de gbaaŋ, Ɔfa baŋ gəŋ ə Mah nyimi go yohiŋ wu lə kkə she. Kwaalə Lut baha ba ə Naomi go.15 Naomi yɔɔ lə, “Ŋəŋ, kpaani wa choo dɨŋ ə bəne bii kwuŋ bə ə bəcheh bə bə́ kwuŋ. Chu wə fo dɨŋ yee bəə wu kwə̄lə.16 Kwaalə, Luth yɔɔ lə, “Wə kə yɔɔlə bə mi lə nshe wə ləkə lə nchu dɨŋ kə. Dɔhɔ kkɨŋ wə gə̄ŋ, nlə ŋgəŋ həmə. Dɔhɔ kkɨŋ wə nɔ̄ŋ, nlə nnɔŋ həmə. Bəne bwo lə yee bə́ dūŋ bəne bəŋŋ, Chu wa dūŋ Chu ŋgwəŋ.17 Dɔhɔ kkɨŋ wə kpe, ə həmə nnu nlə ŋkpe, ə bə́ diih mi həmə. Baba fɨhɨŋ mi lə ŋgaa gbo bəə wə kahiŋ kpe.”18 Bwɔɔ nnu Naomi má ŋəŋ lə Lut yɔɔla ba lə mə lə bələ wu, i wii kə baalə yɔɔ fieŋ kə.19 Bəə wu bəfwe ja yee bə́ gə̄ŋ, jaa gəŋ bwii ə Bɛtuluhɛŋ. Ye bə́ má bwii lə ə Bɛtuluhɛŋ, kibalaki kie kinhliŋ nənə bə kintɨŋ yu bə́. Bəkwɛɛ bə həmə bie naamə ləə, “Nu lə Naomi kibɛɛ lə?”20 Naomi yɔɔ bə bə́ lə, “Bə kə baalə chee mi lə Naomi kə, Yee bə chēe mi fidiɛɛ lə Mala, yulahalə Chu Muŋgeni Munhliŋ fəə kinduhŋ kɨŋŋ nlokə.21 Mmá n'ja fəŋ nduŋ baa, kwaalə Baba fəə ŋ'kwəla ə kwaŋ. Bə baa chee mi lə Naomi lə ləhəŋ lə? Baba fəə ŋ'woo ŋgə. Chu Muŋgeni Munhliŋ gbeela ntɨmə ə mi fi.”22 Ə nəni nnu Naomi bəə Lut kpɛɛ ŋiaani nnu i mà duŋ ŋiaa nu Moab nnu i mà no ə Moab bwo chu ə Bɛtuluhɛŋ. Bə́ mà bwii ə Bɛtuluhɛŋ ə duŋ bwɔɔ nnu bə́ gbē bəŋkaalə gɨŋ ŋə bəjaa.