Lut 2

Fidiɛɛ Naomi duŋ bə́ dɨŋ nyimi ə kichəŋ ki Alimelek mə, i duŋ mbɛɛ ntiiŋ, yii lii duŋ lə Boash.2 Ə bwo chu butuu budi Lut kpɛ nnu Moab yo hlə yɔɔ bə Naomi lə, “Ŋ'kiɛɛlə nla ŋgəŋ ndɔɔ sháŋ yyɨŋ bə́ kwi ye she ə wɛɛh ki mbɛɛ kkɨŋ mə lə bemi lə ndɔɔ mə.” Naomi yɔɔ bə wu lə, “Gəŋ fwi, ŋiaa kpɛ.”3 Nəni Lut gəŋ yee i dɔ̄ɔ sháŋ ye, i bə̄lə bəne bə kwinə bie dɨŋ. Fi bwo duŋ lə, i yu dɔɔ sháŋ ye ə duŋ ə wɛɛh ki Boash mə nnu i mà duŋ dɨŋ che nyimi Alimelek.4 Boash bu bwii bwo, i bwo ə Bɛtuluhɛŋ. I chee bəne bə nimi bbəŋ bə́ màa bə́ kwī bie sháŋ ye lə, “Chu hləmə bəŋ,” Bəne bie chee chuu wu lə, “Chu hləmə dəŋ wə.”5 Boash ŋəŋ ə Lut go bii bə ŋkafwi wi bəne bə nimi bie ləə, “Kwi lə hlɔŋ kpɛ nuɛhɛŋ lə?”6 Ŋkafwi wi yo chuu bə wu lə, “Ə kpɛ nu Moab nnu bə́ mà kwələ yo bwo bəə mah nyimi Naomi.7 Mə hə yɔɔ bə mi lə, ‘Butee, ntukwaŋ i dɔɔ buhuŋ sháŋ baha ə bintu bbɨŋ bəne bə kwinə bie buhuŋ bie mə.’ Lə mbemi, mə chɔɔ yee i dɔ̄ɔ chɔɔ jə həmumbwaa hləŋ hləŋ bwo bwii fidiɛɛ. Mə hə ŋɔɔni kwaa chɛɛ hə kichaŋ.”8 Nəni Boash yɔɔ bə wu lə, “Ŋiaŋ kpɛ, wələ wo mi. Wə kə gəŋ nə dɔɔ sháŋ ə wɛɛh ki mbɛɛ ju mə kə. Wə kə noo fəŋ kə. Yee wə dûŋ fəŋ bə bwɔni bəkwɛ bəŋŋ bə nimi.9 Chiini ŋəŋ wɛɛh kkɨŋ bəne bə nimi bəŋ kwi kie, yee wə bə̂lə bwɔni bəkwɛ bie dɨŋ. N'yɔɔla bə bəne bə nimi bie lə bə́ kə tuulə ə wə go kə. Bwɔɔ nnu hlɔɔ ŋgwiŋ kwuŋ wə, wə gəŋ ŋwi ŋgwiŋ mməŋ bəne bə nimi hə to mie chaa chi ə shó mə.”10 Nəni i bwɔ kwe chɨŋ kwoo kwe, hlə yɔɔ bə wu lə, “Wə chiina buŋ mi, nyii maa tɔŋ lo linuaa bə mi nfuuntə lə?”11 Boash chuu lə, “Fieŋ finhliŋ ffɨŋ wə fəə bə Naomi mah nua chɔɔ jə bwɔɔ nnu nua mà kpe, bə́ yɔɔla mi fi finhliŋ, ye wə mà she bə chwa bə mwa, she maa kwili li kitɨŋ ki bəne bə bəŋ kwuŋ bwo yee wə dūŋh ə bəne bbəŋ wə duŋ kə kələ mə kə.12 Nchèe Chu lə Baba yee i kôhi wə bə bieŋ binuaa bbɨŋ wə fə̄, nchèe Chu dəŋ lə, Baba nnu i duŋ yo Chu bəne bə Ishlael nə wə bikoonə biŋkuntaŋ. Ə wu nnu wə mà bwoo bəŋkiɛɛ dɔhɔ ki niminə ye ŋwa finyini ə biwunə bi mahni kwe.”13 Lut chuu bə wu lə, “Chu nə wə muŋgeni ye wə chee lə kwáŋ ə mi go lə n'yee nnɨ̄ŋ bə wə baba ye ŋwuŋ wa nimi lə, yu wə fəə tɔŋ lɨŋŋ dəə, maa ye nduŋ lə kə duŋ nə mbɛɛ ə bəne bwo bə nimi mə kə.”14 Lə hlɨŋ bushi bwii bwɔɔ dinə biləə, Boash yɔɔ bə Lut lə, “ Le bwo yaŋ wə bwo di kibele bə bəne bə nimi bəŋh, wə duulə dəŋ ə mbiŋ mə biniga mə.” Bwɔɔ nnu i mà shii həkwe bə bəne bə nimi bie, Boash nə wu sháŋ yi wuunə yyɨŋ mbɛɛ ju hə wuula, Lut di fiili, yidi she, i kwələ bə yi ə bweenə.15 Lə Lut ja gəŋ gbe bənɨŋ nimi, Boash yɔɔ bə bəne biih bə nimi bie lə, “Bə chee kwáŋ yee i dɔ̂ɔ maa baha ə bintu bie go. Mbɛɛ ju kə kɨnə wu kə.”16 Bə kaka fwoo nə wu binuu bidi ə bintu bie mə yee i dɔ̄ɔ, mbɛɛ ju kə chɔɔ lə bə wu kə.”17 Nəni, Lut dɔɔ sháŋ ye mə wɛɛh kie mə hləŋ hləŋ bwii hə kitaŋ. I tuu sháŋ yyɨŋ i mà dɔɔ ye, yi yii ə kijee ki ŋkuntaŋ mə.18 I tu jə ki yee i kwə̄lə i chù bweenə, gəŋ nyii ki bə mah nyimi ye i dɔɔ. Lut nyii dəŋ wu sháŋ yyɨŋ yi she ye, ə chu duŋ mə hə diee yi kiŋaŋ ə yyɨŋ Boash hə nə ye wu mə.19 Mah nyimi Naomi biih bə Lut ləə, “Wə həə wə dɔɔ fəhəŋ daŋ lə? Wə həə wə nɨŋ fəhəŋ daŋ lə? Kinhləmə kiŋkuntaŋ duŋ bə mbɛɛ nnu mə hə chiini yo buŋ wə.” Nəni Lut hlə yɔɔ bə mah nyimi Naomi mbɛɛ nnu mə həə i nɨŋ yo ə wu sho. “Yii li mbɛɛ nnu mi nhəə nnɨŋ yo ə wu sho daŋ lə Boash.”20 Naomi yɔɔ bə kpɛɛ ŋiaani lə, “Yee Chu hlə̂mə wu. I yaa cheekwaŋ bənchɨnə bəne bəŋkee bə bəŋkpi kə” Naomi baa yɔɔ dəŋ bə wu lə, “Mbɛɛ yo duŋ dəŋ kichəŋ ki bə nyɨmə kibɛɛ nnu duŋ ə di kwili.”21 Lut kpɛ bə Maob yo yɔɔ lə, “Mə hə yɔɔla dəŋ bə mi lə, ‘N'yee nduŋ baha ə bəne bə nimi biih tɨŋ hləŋ hləŋ ye bə́ yá kaa bə nimi lə.’ ”22 Naomi yɔɔ bə Lut lə, “Kpɛɛ ŋiaa, fi nuaala ŋiaa lə yee wə lā bə hlɔŋ yi bəkwɛɛ biih bə nimi bie, ləkə ə bə́ yá nə wə ŋgə ə wɛɛh kidi mə.”23 Nəni i bu ba yee i lā bə hlɔŋ yi bəkwɛɛ bə nimi bə Baosh bie, i dɔ̄ɔ sháŋ hləŋ hləŋ kíi ŋə dɔɔnə ŋie sháŋ ye bwo ka. Ə bwɔɔ nu bəŋ Lut yee i dūŋh bə mah nyimi Naomi.