Jɔnah 4

Jɔnah fwoo lo bə Chu

Ye Chu mà kwolə hlɨŋ bə bəne bə Ninibɛ bie nəni, biwɛɛ bi Jɔnah kaka bee gbaaŋ, yee i fwoo lo. 2 Jɔnah chee Chu yɔɔ bə Baba Chu lə, “Ooo Baba Chu fɨhŋ kə duŋ nə fieŋ ffɨŋ mmàa n'yɔ̄ɔ fie bə wə ŋkaani bweenə maa nhlə nfwoo lo chichii kɨkə bənlələ gəŋ ə Taashi lə? Mmàa ŋkə̂lə lə wə duŋ Chu nnu wə kənə tɔŋ linuaa bə bəne, wə kwo hlɨŋ bə bə́, wə fwoolə lo chichii, kinleki kkɨŋ wə kə̂nə bə bəne kalə kə, wə gaanə kinhle ko kə bwoo bə bəŋgə ə bəne bəŋ. 3 Ə bwɔɔ nu bəŋ, ooo Baba Chu n'yu ŋkɔ̀nɔ wə lə wə jə ŋɔɔninə kɨŋŋ. Bə mi bənduhŋ fa, ə nuaa lə nhə ŋkpe bu kpenə.” 4 Baba Chu hlə bii bə Jɔnah ləə, “Wə yo bə muŋgeni bənfwoo lo lə?” 5 Jɔnah hlə fu ə kibalaki kie mə, gəŋ shii dɔhɔ kidi wɛɛ wwuŋ kitaŋ bɛɛ. I fə kikɔ kii kidi shii mə yee i dūŋ ə nfweeyo mə, i kê bəŋəŋ fieŋ ffɨŋ fi lə́ fə kibalaki ki Ninibɛ kie.

6 Baba Chu nnu i dùŋ yo Chu hlə fə wii wi tiɛɛ kidi diɛɛni ko bwo kəə wu, fo mə lə́ ŋɔɔni kinuaakə. Nəni Jɔnah yee i dūŋ bə kintɨŋ gbaaŋ bə wii wu tiɛɛ kie. 7 Ə chulə butuu fu wu, Chu bwa kintutu kidi ki gəŋ di wii wu tiɛɛ kie ki dɨlə. 8 Ə chulə kitaŋ bɛɛ, Chu faŋ fwee kidi ki yoo ə wɛɛ wwuŋ kitaŋ bɛɛ we mə, wwuŋ wi shi nəŋ choo. Ŋwiŋ we chɔɔ bəŋkə Jɔnah fi gbaaŋ, hləŋ hləŋ bikəllə biih biaŋ. I noŋ lə, “Chu jə ŋɔɔninə kɨŋŋ. Bə mi bənduhŋ fa, ə nuaa lə nhə ŋkpe bu kpenə.” 9 Chu hlə bii bə wu ləə, “Wə yo bə muŋgeni bənfwoo lo bə wii wu tiɛɛ kɨŋ lə?” Jɔnah chuu bə wu lə, “N'yo bə muŋgeni bənfwoo lo, fwoo lo maa dəŋ lə nhə ŋkpe bu kpenə.” 10 Baba Chu yɔɔ lə, “Wə dê gbo yu tiɛɛ kɨŋ, ə duŋ kə duŋ nə wə nnu wə ma dɔ ki ləkə fə lə ki ko kə. Tiɛɛ kkɨŋ ki ma mɛŋ fu butuu kah ki kpe. 11 Ə chu duŋ lə nduŋ ə nnakə kwoo hlɨŋ bə Ninibɛ kibalaki kiŋkwuntaŋ kie lə? Kibalaki kie kənə bəne ka gbi bə bibwa mbweenfie (120,000) bbəŋ bə́ dūŋ kə kələ yinuaa bə yíwaha yibə, ki kə̂nə dəŋ maa nyáŋ kiŋaaŋki.”