1 Kɔranti 4

Kriisitoo kpambaliŋ

1 Míǹ puee ní nīn nyí yii ti sá Kriisitoo tɔntɔnliibi bin bin ní Unimbɔti dū u-bɔbalkaati ki ŋá ti-ŋaan tí sòoǹee ní. 2 Bi yaa dū ditundi ki ŋá a-ŋaanee, tin bi kíǹ ki kpèé a-ceeyee di sá á tɔ̄ ditundee bí béé a-baamɔŋyi. 3 Mamee, nimbi di yaa bíi sòoǹ m-bɔtaaa, an yaa tí sá bibɔsoonliibaaa, tíǹ kaa ká-mi. Man m-ba kaa tí bíi sòoǹ m-ba bɔti. 4 Ibaamɔn, m-pɔbil poonee maa gbìl̄ yii m ŋá tiba, ama míǹ di kaa dàkà yii maa ŋá tiba. Ti-Dindaan di sá un sòoǹ man bɔtee. 5 An puee ní taa sòoǹ ubɔ bɔti kí nīn cí ŋyunti ń bàń. Ní taa sòoǹ ubɔ bɔti kí nīn cí ŋyunti ŋun ti-Dindaan làá bàńee. U yaa láa bāańee, u làá yàntī ŋwalifi ń ŋmíntí tin bál̀ dibɔmbɔndinee kí nyāntí binib landɔkɔi mpaampiin pu. Niin ní báà ŋma dāa fòol̄ kupampakau kun u máaǹee Unimbɔti cee.

6 Nnabiyaamu, m dū man nì Apooloosi bɔti tin m sòon̄ee ki dàkā kí cántí-ni tibɔti ní. Ní bīfì man nì Apooloosi cee min ni máaǹ kí nīn bée kí taa lákatí tin bi ŋmàn̄ Unimbɔti gbɔŋku poonee pu. Ní taa ŋá dilambil kí lēē ti-kansikin ubɔ, kí bí yii úǹ di sá tiba kí kpèè un kíǹee fám. 7 Ŋma di yōoǹ-si yilpu ní a jítiǹ a-juti ní? Tin a cááyee Unimbɔti di kaa tīī-saaa? Kin Unimbɔti di yaa tīī-si ní, ba pu ní a cáá dilambil kii ubɔ di kaa tīī-see?

8 Ni pūtì kpáàa ká tin kɔkɔ ni lèe! Ki pūtì kpáàa kpántì bigaajab ki kpántì bibɔtiibi timbi boon! Ni yaa bàà lafun kpántì bibɔtiibi ti mun ń bàà dāá kūtì ni-pu, an bàà ŋān̄! 9 An bí-mi kii Unimbɔti gíiǹ timbi akpambal boon binib kansikinee ní. Ti bí kii binib bin bi làá kpɔ̀ kunipaau nimbiinee, kun puee ti kpántì tinimbikɔntiwan ní duulinya nì ituun nì binib kpèé. 10 Kriisitoo puee, timbi kpántì biwaatiibi ní, ní nimbi nín fōō-u ki kíí puee, ni kpántì biciŋfitiibi. Míǹ ní timbi sá ŋwɔsɔfimu ní nimbi sá bipɔɔbi. Binib kpèé timbi fám ní ki tìì nimbi jilma. 11 Áli ki dāa sāā ŋyunti ŋun poon ti bí nee ti gbíntì ki bí ki jīǹ ŋkùm nì nnyinnyoo falaau. Taa cáá tiwampeeŋkaal, ní bi gbáà-ti ní ti tú ki yìiǹ ajan kɔkɔ pu. 12 Míǹ boonee ti tūǹ atuun ki gì kí ŋmā kí ká tiba kí jī^a. Bi yaa sìí-tee, timbi mèé Unimbɔti ń bìin̄ bi-pu. Míǹ ní bi yaa sàantí-tee ní timbi jīǹ bi-pu kimɔtii. 13 Bi kúŋfí ti-boon ní timbi sòoǹ-bi tin mɔ̄ee, áli nìn díǹee, bi kpèé-ti kii duulinya tampummootee ní, a lì kii tiwaŋkpitil tin kaa bí tibanee.

14 Maa ŋmàn̄ tibɔti nee kí kɔ́ǹ-ni icoo, ama kí kpāafì-ni kii ni nín sá m-biyaamu m néeń-ni puee ní. 15 Báà binib kutukub saalaa di yaa làá kpòotī-ni nnimbɔtisan poon, ni-baa làá nīn pée sá ubambaanti ní. Ní nīn nyí yii man di sá ni-baa, kun puee man di cáań Tibɔmɔntiil ki sòon̄ nì ni, ní ni fōō ki kíí. 16 An puee, m bàlifī-ni yii ní fōō man bimbim kí nīn ŋáań man nín ŋáań puee. 17 An pu ní m dū m-jipɔɔn Tiimootee^b un sá m-bineeŋkaaki ki yú deedee ti-Dindaan saŋŋunee ki túnní ni-cee. U làá téetí-ni man nín dī Kriisitoo saŋŋu miŋyee, kii m nín dàkà Kriisitoo nikitiŋ kɔkɔ kansikin puee.

18 Ni-kansikin biba nín dākafì yii maa ti làá gítiń ni-ceeyee puee, bi bí ki yòontí bi-ba yilpu. 19 Ama ti-Dindaan yaa là, an kaa làá ti yúntí, m làá dāan̄ ni-cee. M yaa láa bāańee, an kaa dāa sá bilambidambi gbanti nyɔɔbuŋŋi ní m làá pīlifì, ama tin bi ŋūǹ kí ŋée ní m làá kpèè. 20 Di sá yii Unimbɔti Beel kaa sá nì anyɔɔbun ŋmaniŋma, an sá Circir Fam nín tìì unil mpɔn ú ŋá kuŋkuŋyee. 21 Ni là ḿ dāan̄ ni-cee nì mbambaanaaa, ḿ dāan̄ nì dineendi nì nsɔŋfi ní?