Tijɔkɔndi kɔ́ Kriisitoo nikitil kansikin
5
1 M gbìl̄ bi sòoǹ tijɔkɔndi tin bí ni-kansikinee pu. An jɔkɔntee, bin kaa fōō Yeesu ki kííyee kaa kíikí kí ŋá míǹ gba. M gbìl̄ yii ni-kansikin ubɔ cáá u-baa nimpuaa! 2 Ni ŋáań míǹ ní ki gíti cáá dilambil kaa bí kunimbaaun kí nyāntí un ŋá an tundee ni-kansikin. 3 Maa bí ni-cee ni wāĺ-mi, ama m-landɔkɔŋu bí ni-cee. M pūtì kpáàa kūū un ŋá an tuŋkpitilee bɔti a lì kii m bí ni-kansikinee. 4 Ní kpāfìmaan nì ti-Dindaan Yeesu yindi pu, m-landɔkɔŋu làá dāá nīn bí ni-kansikin. Nì ti-Dindaan Yeesu pɔŋŋu puee, 5 ní dāá dū an niliuee kí tīī Sitaana. U làá sàaǹ u-wunti ní u-naŋki ń dāá ŋmátí ti-Dindaan gítintam.6 Kun pu ní ni dàkafī ki cáá dilambilee kaa ŋān̄. Naa nyí yii ŋkpɔnɔnyɔkɔ fiiiyee ní bi dù kí ŋá bukpɔnɔsaa ní án jɔ̄m̀aaab? 7 Nyāntímaan nnyɔɔkpiki gbanti ŋun sá ikpitee kí nīn sá circirdambi kii bukpɔnɔsaa bun kaa cáá nnyɔkɔee. Ni kpántì míǹ ki dóò, kun puee Kriisitoo un sá-ti Dilákatil jiŋaaliu pibilee dū u-ba ki ŋá saraa ipii yil pu ki tīī timbi. 8 An puee, tí jīmaan ti-jiŋaaliu gbanti nì kpɔnɔb bin poon baa ŋá ŋkpɔnɔnyɔkɔ ŋun sá kii ikpiti nì tijɔkɔndee, ama án nīn sá kii kpɔnɔb bin kaa cáá nnyɔkɔee, ki sá circir nì ibaamɔneec.
9 M nìn ŋmàn̄-ni kugbɔŋu ki tùkū-ni yii ní taa yàntī ni nì bin tūǹ ajɔkɔntuunee ń nīn kpáfí. 10 Maa nìn lì bin bí duulinyan ki tūǹ ajɔkɔntuunee nì nnimbitaataam dambi nì binaayub nì biwaatootiliibi. An yaa bàà sá bíǹ pu ní m lèe, m bàà lì yii ní nyā duulinya poon ní. 11 M nín baasii là kí lì min kugbɔŋu gbanti poonee di sá: unil un lì yii u sá Kriisitoo yɔu, ama ní ki tūǹ ajɔkɔntuun àá ki cáá nnimbitaataam àá ki sá uwaatootil àá ki sìí binib àá ki sá udanyɔgbil àá unaayuuyee ní m lì. Ni nì an niliuee ń taa kpāfì kí jī tijin.