1 Kɔranti 3

Unimbɔti tɔntɔnliu tundi

1 Nnabiyaamu, m nín dɔ́miń ni-ceeyee, maa ŋúń ki sòon̄ nì ni kii m nín sòoǹ bin cáá Unimbɔti Famee puee, ama m sòon̄ nì ni kii binib bin dī duulinyee ní, kii bin sá mbiyaapɔmu Kriisitoo saŋŋu poonee. 2 An puee m tīī-ni nnaabiim, an kaa sá tijin tin pɔ̄ɔ̄ naa ŋūǹee^a. Áli gba ki dāa sāā nìn díǹee, naa ŋūǹ tin pɔ̄ɔ̄yee, 3 kun puee ni dáá bí kii duulinya nib nín bí puee ní. Di sá ŋyunti ŋun ní ipoompoon nì kunikpɔŋkpɔkɔu dáá bí ni-kansikinee, an dàkà yii ni sá duulinya yab dee ki ŋáań nniyaamin. 4 Ni-kansikin biba lì yii bíǹ sá Pɔɔl yab ní, ní biba mun lì yii bíǹ sá Apooloosi yab. Ni yaa bíi ŋáań mimmee, naa bíi ŋáań nniyaamin deeee?

5 Ŋma di sá Apooloosi? Ní ŋma di sá Pɔɔl ní? Ti sá Unimbɔti tɔntɔnliibi bin pu ni dī ki fōō Unimbɔti ki kííyee ní. Unimbɔti di yākatì min sá tí ŋée ki tīī-ti. 6 Man búĺ ní Apooloosi yāaǹ nnyim, ní Unimbɔti yāntì an nyáń ki wíiǹ. 7 An puee, an kaa sá un búĺee di sá tiba, kaa tí sá un yāaǹ nnyimee di tí sá tiba, ama Unimbɔti un yāntì an nyáń ki wíiǹee baba di sá tiba. 8 Un búĺee nì un yāaǹ nnyimee ŋmà ní. Unimbɔti dāa pà-bi bi-tundi din bi túńee nín máaǹ puee ní. 9 Kun puee ti nì Unimbɔti di pēē ki tūǹ ditundi.

Nimbi di sá u-saaku, ní ki sá u-diiku. 10 Diyimɔɔl din Unimbɔti pú-mi ḿ nīn sá udimakpaan un cáá iciinee puee, m bíl̀ kudiiyee nyeel ní ubɔ ń dāá mā kí tɔ́kɔń, ama báà ŋma ń béé u nín māā ki tɔ̄kɔntí puee. 11 Bi cóoǹ kudii ki bíl̀, kúǹ di sá Yeesu Kriisitoo. Báà ubɔ kaa ti ŋūǹ kí cóoń kupɔŋu. 12 Biba làá dū sindaariya ní kí mā kí tɔ́kɔń, ní biba ń dū animbil kúti kí mā, ní biba ń dū ataŋkpanyaan kí mā. Ama biba mun làá dū idɔ, biba ń dū ikpaŋkpaan, biba ń dū timool kí mā kí tɔ́kɔń. 13 Un yaa dū kun ní ki máń ki tɔ́kɔǹ kudiiyee puee, daliŋkin Unimbɔti làá dāá sòoǹ binib bɔtee, yaadal ní báà ŋma tuuŋŋi dāa nyēē mpaampiin pu. Di sá bi làá dāá dū báà ŋma tuuŋŋi ní kí ŋá ŋŋmin. Ŋŋmi ní bi làá dāá dūú cɔ̄ŋkì báà ŋma tundi kí béé di nín sá diŋyee. 14 Sii un di yaa dū kun ní ki máń ki tɔ́kɔǹ kudiiyee pu ní ŋŋmi kaa wùn̄ee làá dāá fōō a-paati. 15 Ama un cee ní ŋŋmi yaa wùn̄ee, asaluu gbáń udaan dee. U làá dāá ká difiil, ama an dāa sá kii unil diiku nín fòol̄ pu ú sāǹ kí nyā kaa báb́ tiba puee ní.

16 Naa nyí yii ni sá Unimbɔti diiku ní u-Fam kóò ni-naaa? 17 An puee, unil yaa kɔ́ǹ Unimbɔti diiku tijɔkɔndee, see Unimbɔti ń dāá dáaĺ udaan tafal, kun puee Unimbɔti diiku bí circir ní, ní nimbi di sá kudii gbanti.

18 Ubɔ ń taa kīil̀ u-ba. Un yaa bí ni-kansikin ki dàkafī yii u cáá duulinya ciiŋyee, ú kpántí ugbaan kí ŋmā kí ká iciin in nyēeń Unimbɔti ceeyee. 19 Kun puee duulinya ciiŋyi sá Unimbɔti cee digbaandi ní. Míǹ ní an ŋmàn̄ Unimbɔti gbɔŋkun yii: «Unimbɔti gīintí biciŋfitiibi ciiŋyi ní ki fàtīi cáa cútí-bi.» 20 An gíti tí lī yii: «Ti-Dindaan nyí biciŋfitiibi landɔkɔi, ki nyí i nín sá fámee^b.» 21 An puee, an kaa sá ubɔ pu ní ni làá nīn gà ni-biŋŋi, kun puee nimbi di yì tikɔkɔ: 22 an yaa sá Pɔɔlaaa, Apooloosaaa, Peetrooyaaa, an yaa tí sá duulinyaaa, dimaŋfalaaa, ŋkúmaaa, an yaa tí sá tiwan tin bí kɔŋkɔnneeyaaa, tin bí ki dòońeeyaaa, nimbi di yì tikɔkɔ, 23 ní Kriisitoo yì nimbi, ní Unimbɔti yì Kriisitoo.