Maatiiu 19

Unimpu nì uninja ń taa yàkatī tɔbin

(Kpèè Maar 10.1-12, Luuki 16.18)

1 Yeesu dàkā an bɔti ki dóòyee, ní ki yíkì Galiilee tiŋkin ki póotì Juudee watil, Jɔɔdan buŋgbandi lapu pu. 2 Kunipaau nìn nóó-u ní u cāantí bi-weeŋyi. 3 Niinee Fariisab biba dɔ́miń u-cee kí píĺ-u tibɔti kí kpèè u-nyɔkɔn ní ki bālifì-u yii: «Ti-marau pú nsan yii á jà a-nimpuu báà tin ní u yaa pée ŋéeee?» 4 Ní Yeesu kíí-bi yii: «Naa kàan̄ Unimbɔti gbɔŋku ki ká an nín lī puee níii? Yii ŋkilkaaminee, Unimbɔti unáanli náań uninja nì unimpu ní^a, ní ki bí yii: 5 <An sá uninja ń nyā u-baa nì u-na cee ní u nì u-nimpuu ń nīn bí ní bi-liitil ń kpántí unibaanti^b.> 6 Mimmee, baa ti sá bili, bi ŋá unibaanti dee. Míǹ puee, unil ń taa yàkatī tin Unimbɔti dūu kpáfèe.» 7 Niinee ní bi bālifì-u yii: «Kin mimmee ba pu ní Mooyiisi nìn pú nsan yii á ŋmà kugbɔŋu kun dàkà yii a jìn̄ a-nimpuuee kí ŋúbíǹ-u ní kí nín jà-u ní^c?>» 8 Ní u kíí-bi yii: «An sá ni-pɔɔgbifiŋŋu di yì-tì ní Mooyiisi pú-ni nsan yii ní jà ni-nimpoobi. Ŋkilkaaminee an kaa nìn sá míǹ. 9 M tùkù-ni yii, sii un cáá unimpu ní an kaa sá ticati tin kòóyee, ní a jìn̄-u ki fātìi cáá ubɔee, a ŋá tilaakpaal Unimbɔti nimbiin.»

10 Ní u-boonnooliibi bí yii: «An yaa sá míǹ ní uninja nì u-nimpuu kansikinee, mimmee, a yaa kaa pūtì cáá unimpu, an sɔ́ dee.» 11 Ní u bí-bi yii: «An kaa sá báà ŋma di ŋūǹ tibɔti nee, see bin an pú bí ŋmēe. 12 Kun yàntī bininjab biba kaa cāab̀ binimpoobee bí tɔbin. Bibee, an sá doooo bi-na poon ní baa sá bininjab, ní bi fāatì biba, ní biba muee, an sá Unimbɔti Beel puee ní bi dū bi-ba ki ŋá kii baa sá bininjabee. Un yaa ŋūǹ kí gbìl̄ tibɔti nee taapuee ń gbìl̄.»

Yeesu mēē mbiyaamu pu

(Kpèè Maar 10.13-16, Luuki 18.15-17)

13 Bi nìn cáań mbiyaamu Yeesu cee ú dū u-ŋalii kí páań mu-pu kí mèè kí tīī-mu, ní u-boonnooliibi bíi wòoǹ bin cáań-muee. 14 Ní Yeesu bí-bi yii: «Càntīmaan mbiyaamu nee! Yàntīmaan mú dāan̄ m-cee kí taa pìin̄-mu nsan, kun puee Unimbɔti Beel sá ki tīī bin náań nì muee ní.» 15 Ní u dū u-ŋalii ki páaǹ mu-pu ki mēē ki tīī-mu ní ki búntì.

Ugaaja ubɔ bɔti

(Kpèè Maar 10.17-31, Luuki 18.18-30)

16 Uninja ubɔ nìn dɔ́miń Yeesu cee ní ki bālifì-u yii: «Ukpil, ditummɔntiil dilal ní m làá ŋá ní kí ká dimaŋfal din kaa cáá dikúntilee ní?» 17 Ní Yeesu kíí-u yii: «Ba pu ní a bàlifī-mi timɔntiil pu? Unimbɔti baba di sá umɔnti. A yaa là kí kɔ́ dimaŋfal din kaa cáá dikúntilee nee, á nīn tɔ́ marab.» Ní u fātìi bālifì Yeesu yii: «Marab bilab?» 18 Ní Yeesu bí-u yii: «Taa kpɔ̀ unil, taa ŋá tilaakpaal, taa yɔ̀, taa mɔ̄ntì ubɔ nyɔkɔ pu, 19 kí nīn tɔ́ a-baa nì a-na, kí nīn néeń a-juti kii sii a-bee^d.» 20 Ní unaacimpɔɔnee bí-u yii: «M ŋá míǹ kɔkɔ, tilati di gíti kíǹ?» 21 Ní Yeesu kíí-u yii: «A yaa là kí ŋá min sá páaayee, cù kí dū tin kɔkɔ a cááyee kí nyāfì kí dū animbil kí yàkatī bifalaadambi, ní kí tin ká tigaajati Unimbɔti cee. A yaa ŋá míǹ ki dóòyee ní á dāá nīn nóó-mi.» 22 Unaacimpɔɔnee nín gbìl̄ an nyɔɔbundee, ní kunimbaau kɔ́-u ní u búntì soooo, kun puee u nìn cáá tigaajati tikpil.

23 Niinee ní Yeesu bí u-boonnooliibi yii: «Ibaamɔn ní m tùkù-ni, an dāa pɔ̄ɔ̄ ki tīī ugaaja ń kɔ́ Unimbɔti Beelin. 24 M gíti tùkù-ni yii, an pɔ̀fì ki tīī ugutaamu ń jītí ujoo buŋŋun ki jítiǹ ugaaja ń kɔ́ Unimbɔti beelin.» 25 U-boonnooliibi nín gbìl̄ mimmee, ní bi bākatì tikpil, ní ki bí yii: «Kin, ŋma di nín ŋūǹ kí ká difiil dee?» 26 Ní Yeesu kpēē-bi dímmm ní ki bí yii: «An pɔ̄ɔǹ unil, ama Unimbɔti ceeyee tikɔkɔ sá sɔkɔmii ní.» 27 Niinee ní Peetroo bí-u yii: «Kin, timbi nín yíkì ki fá tikɔkɔ nì tikɔkɔ ki nóó-si nee, timbi paati dāa sá ba?» 28 Ní Yeesu bí yii: «Ibaamɔn ní m tùkù-ni duulinyapɔɔn^e un dòońee nee, man Kinibiki yaa láa kāl̀ m-beejal pu nì tinyoolee, nimbi bin nóó-mee mun dāa kàal̀ abeejal saalaa nì ali pu ní kí sòoǹ Isirayeel naakɔti saalaa nì tilee bɔti. 29 Ní un kamaa yaa yíkì ki fá u-diiŋŋi nì u-nabiyaamu, nì u-niisalib, nì u-baa, nì u-na, nì u-biyaamu, nì u-kpaatanti man puee, Unimbɔti làá tin pà udaan míǹ dilaataal pu, ní ú gíti fōō dimaŋfal din kaa cáá dikúntilee. 30 Ama bisanlintiliibi tikpil dāa kpántí biboompaanliibi, ní biboompaanliibi mun tikpil ń kpántí bisanlintiliibi.»